ପାରଳାଖେମୁଣ୍ଡି: ସମସ୍ୟା ଘେରରେ ଗଜପତି ଜିଲ୍ଲା ରାୟଗଡ଼ ବ୍ଲକର ଲାଇଲାଇ ଗାଁ । ହଜାରରୁ ଅଧିକ ଜନସଂଖ୍ୟା ବିଶିଷ୍ଟ ଏହି ଗାଁରେ ବିକାଶ ଅପହଞ୍ଚ । ଏହି ଗାଁକୁ ଯିବାକୁ ହେଲେ PMGSY ରାସ୍ତାରୁ ପ୍ରାୟ ୨ କିଲୋମିଟର ରାସ୍ତା ଅତିକ୍ରମ କରିବାକୁ ହୁଏ । ଏହି ରାସ୍ତା ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲେ ମଧ୍ୟ ନିର୍ମାଣ କାମ ହୋଇପାରୁନାହିଁ । ଗ୍ରାମ୍ୟ ନିର୍ମାଣ ବିଭାଗ ପକ୍ଷରୁ ଏହି ୨ କିଲୋମିଟର ରାସ୍ତା ନିର୍ମାଣ କରାଯିବ ବୋଲି ପ୍ରତିଶୃତି ଦିଆଯାଇଥିଲେ ବି ତାହା ପାଣିର ଗାର ସାଜିଛି । ଫଳରେ ସାଧାରଣ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ।
ଯେଉଁ ଅଞ୍ଚଳର ଯୋଗାଯୋଗ ବ୍ୟବସ୍ଥା ଯେତେ ସୁଦୃଢ଼ ସେହି ଅଞ୍ଚଳର ସାମାଜିକ ଓ ଆର୍ଥିକ ସ୍ଥିତି ସେତେ ଉନ୍ନତ । ଏହାକୁ ଉପଲବ୍ଧି କରି ସରକାର ଦୁର୍ଗମ ଅଞ୍ଚଳର ଯାତାୟତ ବ୍ୟବସ୍ଥାରେ ଉନ୍ନତି ପାଇଁ ଯୋଜନା ପରେ ଯୋଜନା କରିବା ସହ କୋଟିକୋଟି ଟଙ୍କା ଖର୍ଚ୍ଚ କରୁଛନ୍ତି । ହେଲେ ବିଭାଗୀୟ ଅଧିକାରୀଙ୍କ ଖାମଖିଆଲି ମନୋଭାବ ଯୋଗୁଁ ଅନେକ ଅଞ୍ଚଳକୁ ଏଯାଏଁ ଭଲ ରାସ୍ତା ଖଣ୍ଡିଏ ନିର୍ମାଣ ହୋଇପାରିନାହିଁ । ଏହାସହ ନେଟୱାର୍କର ସମସ୍ୟା ଲୋକଙ୍କୁ ଆହୁରି ଅସୁବିଧାରେ ପକାଇଛି । ଏଠାକାର ଲୋକେ ଏହି ସମସ୍ୟାର ପାଇଁ ବାରମ୍ବାର ଦାବି କରିଥିଲେ ମଧ୍ୟ କୌଣସି ସୁଫଳ ମିଳିନଥିବା ଅଭିଯୋଗ ହୋଇଛି ।
ଏହା ବି ପଢନ୍ତୁ...କେଉଁଠି ବିକାଶ: ଆଦର୍ଶ ଗାଁରେ ନାହିଁ ରାସ୍ତା, ଚୌକିରେ ବୁହା ହେଲେ ପ୍ରସୂତି
ଆଦିବାସୀ ଅଧ୍ୟୁସିତ ଏହି ଗାଁର ଅନତି ଦୂରରେ ଚିକିତ୍ସାଳୟ ରହିଥିଲେ ମଧ୍ୟ ରାସ୍ତା ଅଭାବରୁ ଲୋକେ ସେଠାକୁ ଯିବାରେ ଅସୁବିଧା ହେଉଛି । ପାଠ ପଢ଼ିବା ପାଇଁ ପିଲାମାନେ ସ୍କୁଲ ଓ ଅଙ୍ଗନୱାଡ଼ିକୁ ଏହି ରାସ୍ତାରେ ଯାଉଥବା ବେଳେ ଲୋକେ ବ୍ୟବସାୟ ପାଇଁ ମଧ୍ୟ ବିପଦଶଙ୍କୁଳ ଅବସ୍ଥାରେ ଏହି ରାସ୍ତାରେ ଯାତାୟତ କରିଥାଆନ୍ତି । ଅନ୍ୟପଟେ ନେଟୱାର୍କ ଖୋଜିବା ପାଇଁ ଗାଁରୁ ଅନେକ ଦୂର ପାହାଡ଼ କିମ୍ବା ଗଛ ଉପରକୁ ଚଢ଼ିବାକୁ ପଡ଼ୁଛି ।
ଗମନାଗମନ ବାଧାପ୍ରାପ୍ତ ହୋଇଥିବାରୁ ସ୍ବାସ୍ଥ୍ୟସେବା ମଧ୍ୟ ଅପହଞ୍ଚ । ଅନ୍ୟପଟେ ମୋବାଇଲ ନେଟୱାର୍କ ଆସୁନଥିବାରୁ ଆମ୍ବୁଲାନ୍ସକୁ ଯୋଗାଯୋଗ ମଧ୍ୟ ହୋଇପାରେ ନାହିଁ । ଫଳରେ ଗାଁରେ କାହାର ଦେହ ଖରାପ ହେଲେ ଭାରରେ ବୋହି ନେବାକୁ ପଡ଼େ । ଏନେଇ ବିଭାଗୀୟ ଅଧିକାରୀ ଏବଂ ପ୍ରଶାସନକୁ ବାରମ୍ବାର ଜଣାଇଲେ ସୁଫଳ ମିଳୁନଥିବା ଅଭିଯୋଗ କରିଛନ୍ତି ଗ୍ରାମବାସୀ । ପିଲାମାନଙ୍କୁ ସ୍କୁଲ ଓ ଅଙ୍ଗନୱାଡ଼ିକୁ ଯିବାକୁ ହେଲେ ଏହି ରାସ୍ତା ଦେଇ ଯିବାକୁ ପଡ଼େ। ଆଉ ବର୍ଷା ଦିନେ ରାସ୍ତାର ସ୍ଥିତି ଆହୁରି ସଙ୍ଗୀନ ହୋଇପଡ଼ୁଛି। ଏହାସହ ଲୋକେ ବ୍ୟବସାୟ ପାଇଁ ମଧ୍ୟ ବିପଦଶଙ୍କୁଳ ଅବସ୍ଥାରେ ଏହି ରାସ୍ତାରେ ଯାତାୟତ କରିଥାଆନ୍ତି । ଏନେଇ ବିଡିଓଙ୍କୁ ପଚାରିବାରୁ ସେ କହିଛନ୍ତି, "ସମସ୍ୟାର ଅନୁଧ୍ୟାନ କରାଯାଇ ପଦକ୍ଷେପ ଗ୍ରହଣ କରାଯିବ।"
ଇଟିଭି ଭାରତ, ଗଜପତି
