ଗଜପତି: ଦୀର୍ଘ ବର୍ଷ ହେଲା ଅବହେଳିତ ହୋଇ ପଡିରହିଥିବା ପାରଳା ମହାରାଜାଙ୍କ ସମାଧୀ ପୀଠ ଏବେ ଝଲସିଛି ବିଭିନ୍ନ ଆଲୋକମାଳାରେ । ବିଳମ୍ବରେ ହେଉ ପଛେ ଏହି ଐତିହାସିକ ସ୍ଥଳୀର ପୁନଃଉଦ୍ଧାର କରାଯାଇଥିବାରୁ ବିଭିନ୍ନ ମହଲରେ ସ୍ବାଗତ କରାଯାଇଛି । ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ ଓ ପାରଳାଖେମୁଣ୍ଡି ବିଧାୟକ କେ.ନାରାୟଣ ରାଓ ଏହାକୁ ଉଦଘାଟନ କରିଛନ୍ତି ।
ସ୍ବତନ୍ତ୍ର ଉତ୍କଳ ପ୍ରଦେଶ ଗଠନର ମୁଖ୍ୟ କର୍ଣ୍ଣଧାର କୃଷ୍ଣଚନ୍ଦ୍ର ଗଜପତିଙ୍କ ସମାଧି ପୀଠ ହେବା ପରେ ଏହି ସ୍ଥାନର ଗୁରୁତ୍ବ ଢେର ବଢିଥିଲା । ହେଲେ ଏହାକୁ ଆକର୍ଷଣର କେନ୍ଦ୍ର ବିନ୍ଦୁ କରିବା ପାଇଁ କେହି ପ୍ରୟାସ କରିନଥିଲେ । ଏହି ସ୍ଥାନର ପୁନଃଉଦ୍ଧାର ପାଇଁ ପ୍ରାୟ 2ବର୍ଷ ତଳେ ପରିକଳ୍ପନା କରିଥିଲା ପାରଳାଖେମୁଣ୍ଡି ପୌରପରିଷଦ । ତତ୍କାଳୀନ କାଉନସିଲ ଏବଂ ତାର ଅଧ୍ୟକ୍ଷା ଏମ.ଲଳିତା ଏହାକୁ ସ୍ବତନ୍ତ୍ର ଭାବେ ଧ୍ୟାନ ଦେଇଥିଲେ । ଏହି କାମ ପାଇଁ 37ଲକ୍ଷ ଟଙ୍କା ବ୍ୟୟ ହୋଇଛି । ଏହାକୁ ସୁନ୍ଦର ଆଲୋକମାଳାରେ ସଜାଯିବା ସହ ବିଭିନ୍ନ ପ୍ରକାର ଖେଳ ଉପକରଣ ମଧ୍ୟ ଖଞ୍ଜାଯାଇଛି । ଏହାକୁ କିଭଳି ସଠିକ ଭାବେ ପରିଚାଳନା କରାଯାଇ ପାରିବ, ସେ ଦିଗରେ ପୌରପରିଷଦ ପ୍ରୟାସ ଜାରି ରଖିଥିବା ନିର୍ବାହୀ ଅଧିକାରୀ କହିଛନ୍ତି ।
ଏହି କାର୍ଯ୍ୟକୁ ବୁଦ୍ଧିଜୀବୀମାନେ ସ୍ବାଗତ ଜଣାଇଛନ୍ତି । ଏହା କେବଳ ପାରଳାଖେମୁଣ୍ଡିର ନୁହେଁ ସମଗ୍ର ଓଡିଶା ପାଇଁ ଗର୍ବର ବିଷୟ ବୋଲି ସେମାନେ କହିଛନ୍ତି । ଅନେକ ବର୍ଷ ହେଲା ଅସମାଜିକ ଯୁବକଙ୍କ ଆଡ୍ଡା ସ୍ଥଳ ପାଲଟିଥିବା ଏହି ସ୍ଥାନ ଆଜି ଯେଉଁ ଭଳି ଭାବେ ବିକଶିତ କରାଯାଇଛି ତାହା ନିଶ୍ଚିତ ଭାବେ ପ୍ରତି ଓଡ଼ିଆଙ୍କୁ ଗର୍ବିତ କରିଛି ବୋଲି ମତ ପ୍ରକାଶ ପାଇଛି । ତେବେ ଏହାକୁ ଶିଶୁ ଉଦ୍ୟାନ କରିବାକୁ ଗ୍ରହଣ କରିପାରିନାହାଁନ୍ତି ବିଧାୟକ । ସେ କହିଛନ୍ତି ଯେ,ମହାରାଜାଙ୍କ ସମାଧୀ ପୀଠର ପୁନଃଉଦ୍ଧାର କରିବା ନିଶ୍ଚିତ ଭାବେ ସ୍ବାଗତଯୋଗ୍ୟ । କିନ୍ତୁ ପ୍ରତ୍ୟେକ ଓଡିଆଙ୍କ ସ୍ପନ୍ଦନ ମହାରାଜାଙ୍କ ସମାଧୀ ପୀଠରେ ପିଲାମାନେ ଖେଳିବା ଠିକ ନୁହେଁ ବୋଲି ବିଧାୟକ କହିଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
