ବ୍ରହ୍ମପୁର: କୋରୋନା ସଙ୍କଟରେ ଅସହାୟଙ୍କ ସାହାରା ପାଲଟିଥିବା ବଲିଉଡ ଅଭିନେତା ସୋନୁ ସୁଦଙ୍କ ମନ୍ତବ୍ୟକୁ ଖଣ୍ଡନ କରିଛି ଗଞ୍ଜାମ ପ୍ରଶାସନ । କୋରୋନା ଆକ୍ରାନ୍ତଙ୍କ ପାଇଁ ଗଞ୍ଜାମ ସିଟି ହସ୍ପିଟାଲରେ ପର୍ଯ୍ୟାପ୍ତ ଶଯ୍ୟା ବ୍ୟବସ୍ଥା ନେଇ ଟ୍ବିଟରରରେ ସୋନୁ ସୂଚନା ଦେଇଥିଲା ବେଳେ ଏ ନେଇ କୌଣସି ଖବର ଆସିନଥିବା ନେଇ ସ୍ପଷ୍ଟ କରିଛନ୍ତି ଗଞ୍ଜାମ ଜିଲ୍ଲାପାଳ ।
ଘଟଣାଟି ହେଉଛି କି, ପ୍ରଦୀପ ବେହେରା ନାମକ ଜଣେ ବ୍ୟକ୍ତି କୋରୋନା ଆକ୍ରାନ୍ତ ସ୍ତ୍ରୀଙ୍କ ପାଇଁ ବେଡ ନଥିବା ନେଇ ସୋନୁ ସୁଦଙ୍କୁ ଟ୍ୟାଗ କରି ଟ୍ବିଟରରେ ପୋଷ୍ଟ କରିଥିଲେ । ସେ କହିଥିଲେ କି, ମୋ ସ୍ତ୍ରୀଙ୍କ ଅବସ୍ଥା ଗୁରୁତର ହେଉଥିବା ବେଳେ ବହୁ ପ୍ରଚେଷ୍ଟା ପରେ ବି ବ୍ରହ୍ମପୁର କିମ୍ବା ଭୁବନେଶ୍ବରରେ ବେଡଟିଏ ବ୍ୟବସ୍ଥା କରିପାରୁନାହାନ୍ତି । ଏଣୁ ‘ସାର’ ( ସୋନୁ ସୁଦ) ଆମକୁ ସହଯୋଗ କରନ୍ତୁ ବୋଲି ଲେଖି ଅନୁରୋଧ କରିଥିଲେ ବ୍ୟକ୍ତି ଜଣଙ୍କ । ଆଉ ଏହି ଟ୍ବିଟର ଗୋଟିଏ ଦିନ ପରେ ସୋନୁ ସୁଦ ନିଜ ଟ୍ବିଟରରେ ଏକ ପୋଷ୍ଟ କରି ଉକ୍ତ ବ୍ୟକ୍ତିଙ୍କୁ ଆଉ ଚିନ୍ତା ନ କରିବା ପାଇଁ କହିବା ସହ ଗଞ୍ଜାମ ସିଟି ହସ୍ପିଟାଲ , ବ୍ରହ୍ମପୁରରେ ବେଡ ବ୍ୟବସ୍ଥା ହୋଇଥିବା ନେଇ କହିଥିଲେ ।
ଏ ନେଇ ଖବର ପ୍ରକାଶ ପରେ ପ୍ରତିକ୍ରିୟା ରଖିଛି ଜିଲ୍ଲା ପ୍ରଶାସନ । ଜିଲ୍ଲାପାଳଙ୍କ ଅନୁସାରେ ଆମେ ଏ ସମ୍ବନ୍ଧରେ ଅର୍ଥାତ ବେଡ ବ୍ୟବସ୍ଥା ନେଇ ସୋନୁ ସୁଦ ଫାଉଣ୍ଡେସନ କିମ୍ବା ସୋନୁ ସୁଦଙ୍କ ଠାରୁ କୌଣସି ସୂଚନା ପାଇନାହୁଁ । ଏପରିକି ବେଡ ପାଇଁ ଅନୁରୋଧ କରିଥିବା ରୋଗୀଙ୍କ ବର୍ତ୍ତମାନ ହୋମ ଆଇସୋଲେସନରେ ସୁସ୍ଥ ଅଛନ୍ତି । କୌଣସି ବେଡ ଜାରି ହୋଇନଥିବା ବେଳେ ବ୍ରହ୍ମପୁର ପ୍ରଶାସନ ପକ୍ଷରୁ ଏହି ମାମଲାକୁ ମନିଟରିଂ କରାଯାଉଛି ।
ତେବେ ଏଭଳି ସ୍ଥିତିରେ ପ୍ରଶ୍ନ ଉଠିଛି କିଏ ସତ କହୁଛି ?
