ଗଜପତି: ରାଜ୍ୟରେ କୋଭିଡ-୧୯ ସଂକ୍ରମିତଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏନେଇ ଜିଲ୍ଲାବାସୀ ଭୟଭୀତରେ ରହୁଛନ୍ତି । ତେବେ ପଜିଟିଭଙ୍କ ସଂଖ୍ୟା ବୃଦ୍ଧି ନେଇ ବ୍ୟସ୍ତ ହେବାର କୌଣସି କାରଣ ନାହିଁ, ବରଂ ସମସ୍ତେ ସରକାର ଏବଂ ପ୍ରଶାସନର ନିୟମକୁ ମାନି ଚଳିଲେ ଆମେ ନିଶ୍ଚିତ କୋରୋନାକୁ ହରାଇବା ବୋଲି ଗଜପତି ଜିଲ୍ଲାପାଳ ଏକ ଭିଡ଼ିଓ ବାର୍ତ୍ତାରେ କହିଛନ୍ତି ।
ବର୍ତ୍ତମାନ ଜିଲ୍ଲାରେ ଆଣ୍ଟିଜେନ ଟେଷ୍ଟ ମାଧ୍ୟମରେ ଅଧିକ ପରୀକ୍ଷା ହେଉଥିବାରୁ ଅଧିକ ଆକ୍ରାନ୍ତ ଚିହ୍ନଟ ହେଉଛନ୍ତି । ଯାହା ଏକ ଭଲ ଖବର। ତେବେ ସଂକ୍ରମିତ ଚିହ୍ନଟ ହୋଇ ଚିକିତ୍ସିତ ହୋଇପାରିଲେ, ଅନ୍ୟମାନଙ୍କ ପାଇଁ ବିପଦ ନାହିଁ । ତେଣୁ ଯାହାଙ୍କ ଠାରେ କିଛି ଲକ୍ଷଣ ଦେଖାଯାଉଛି, ସେମାନେ ନଲୁଚାଇ ପ୍ରଶାସନକୁ ଜଣାନ୍ତୁ । ଫଳରେ ସେମାନଙ୍କ ପରୀକ୍ଷା କରାଯାଇ ଅତିଶୀଘ୍ର ଚିକିତ୍ସା ଯୋଗାଇ ଦିଆଯିବ । ଫଳରେ ସେ ନିଜେ ସୁରକ୍ଷିତ ହେବା ସହ ନିଜର ପରିବାର, ବନ୍ଧୁ ପରିଜନ ଏବଂ ଅନ୍ୟମାନଙ୍କୁ ବିପଦର କାରଣ ହେବେ ନାହିଁ ବୋଲି ଜିଲ୍ଲାପାଳ ଅନୁପମ ଶାହା କହିଛନ୍ତି ।
ସୂଚନା ଅନୁଯାୟୀ, ଗତ ଦୁଇମାସ ମଧ୍ୟରେ ଜିଲ୍ଲାରେ ପଜେଟିଭଙ୍କ ସଂଖ୍ୟା ୯ ଶହ ପାର ହୋଇଛି । ପ୍ରଥମେ ସଙ୍ଗରୋଧରୁ କୋରୋନା ଆକ୍ରାନ୍ତ ଚିହ୍ନଟ ହୋଇଥିଲେ । କିନ୍ତୁ ବର୍ତ୍ତମାନ ଚିହ୍ନଟ ହେଉଥିବା ପଜେଟିଭଙ୍କ ମଧ୍ୟରୁ ଅଧିକାଂଶ ସ୍ଥାନୀୟ ବାସିନ୍ଦା କିମ୍ବା କୋରୋନା ଯୋଦ୍ଧା । ତେଣୁ ଜିଲ୍ଲାର ସ୍ଥିତି ବିଗିଡ଼ିବାରେ ଲାଗିଛି । ଲୋକଙ୍କ ମଧ୍ୟରେ କୋକୁଆ ଭୟ ଦେଖାଦେଇଛି ।
ଜିଲ୍ଲାରେ ଗତକାଲି(ଶନିବାର) ଗୋଟିଏ ଦିନରେ ସର୍ବାଧିକ ୯୦ଜଣ ଆକ୍ରାନ୍ତ ଚିହ୍ନଟ ହୋଇଥିବାବେଳେ ଆଜି(ରବିବାର) 74 ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ତେବେ ପ୍ରଶାସନ ପକ୍ଷରୁ ସହରାଞ୍ଚଳରେ ନିର୍ମାଣ ହୋଇଥିବା ଫିଭର୍ କ୍ଲିନିକ୍ ସହ ଆଣ୍ଟିଜେନ ଟେଷ୍ଟ ଜାରି ରହିଥିବାରୁ ଅଧିକରୁ ଅଧିକ ପଜେଟିଭ ଚିହ୍ନଟ ହେଉଛନ୍ତି । ତେଣୁ ବ୍ୟସ୍ତ ହେବାର କିଛି କାରଣ ନାହିଁ । ବରଂ ଆକ୍ରାନ୍ତମାନେ ଚିହ୍ନଟ ହେବା ଦ୍ବାରା ସଂକ୍ରମଣ ବ୍ୟାପିବା ଆଶଙ୍କା କମ ବୋଲି ଜିଲ୍ଲାପାଳ କହିଛନ୍ତି ।
ଏହାସହ ଜିଲ୍ଲାରେ କୋରୋନା ନିୟନ୍ତ୍ରଣ ପାଇଁ ପ୍ରଶାସନ ପକ୍ଷରୁ ବିଭିନ୍ନ ପ୍ରକାର ପଦକ୍ଷେପ ଗ୍ରହଣ କରାଯାଉଛି । ତେବେ ଜିଲ୍ଲାର ସ୍ଥିତିକୁ ଦେଖି ରାଜ୍ୟ ସରକାର ଗଜପତି ଜିଲ୍ଲାକୁ ୨ ଜଣ ବରିଷ୍ଠ ଓଏଏସ ଅଧିକାରୀ ଏବଂ ୧୧ ଜଣ ଏଓଆରଏସ ଅଧିକାରୀଙ୍କୁ ପଠାଇଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
