ଗଜପତି: ଧରାପଡିଲେ ମିଛୁଆ ସାମ୍ବାଦିକ । ଗତ କିଛି ବର୍ଷ ହେଲା ଗଜପତି ଏବଂ ରାୟଗଡ଼ା ଜିଲ୍ଲାରେ ମିଛ ସାମ୍ବାଦିକ ନାମରେ ଲୋକଙ୍କୁ ଠକି ଆସୁଥିବା ଜଣେ ଯୁବକକୁ ଗଜପତି ପୋଲିସ ଗିରଫ କରିଛି । ଗିରଫ ପରେ ତାକୁ କୋର୍ଟ ଚାଲାଣ କରାଯାଇଛି ।
ଗିରଫ ହୋଇଥିବା ଯୁବକ ଜଣଙ୍କ ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ଅନ୍ତର୍ଗତ ମହାଛାଇ ଗାଁର କୃଷ୍ଣ ଚନ୍ଦ୍ର ସାହୁ ଏବଂ ତାଙ୍କ ଘର ପାରଳାଖେମୁଣ୍ଡି ଥାନା ପରିସରରେ ବୋଲି ବୁଧବାର ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଅତିରିକ୍ତ ଏସପି ସୀତାରାମ ଶତପଥୀ ପ୍ରକାଶ କରିଛନ୍ତି ।
ସୂଚନା ଅନୁଯାୟୀ, ନିଜକୁ ସାମ୍ବାଦିକ କହୁଥିବା କୃଷ୍ଣ ଚନ୍ଦ୍ର ସାହୁ ଗଜପତି ଜିଲ୍ଲା ଗୁରାଣ୍ଡି ଗାଁର ସୁବ୍ରତ କୁମାର ପାତ୍ରଙ୍କ ରେଳୱେରେ ଚାକିରୀ କରାଇଦେବା ପ୍ରତିଶୃତି ଦେଇ 60ହଜାର ଟଙ୍କା ଅଗ୍ରୀମ ନେଇଥିଲେ । ତେବେ ଦୀର୍ଘ ଦିନ ପରେ ମଧ୍ୟ ଚାକିରୀ ସଂପର୍କରେ କୌଣସି ସୂଚନା ନମିଳିବାରୁ ଟଙ୍କା ଫେରାଇବା ପାଇଁ ସୁବ୍ରତ ଦାବି କରିଥିଲେ ।
ମାତ୍ର ଟଙ୍କା ଫେରାଇବା ବଦଳରେ ବିଭିନ୍ନ ପ୍ରକାର ଧମକ ଚମକ ଦେଇଥିଲେ କୃଷ୍ଣ ଚନ୍ଦ୍ର । ଫଳରେ କୌଣସି ଉପାୟ ନପାଇ ସୁବ୍ରତ ପୋଲିସର ଦ୍ବାରସ୍ଥ ହୋଇଥିଲେ । ଏହାପରେ ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ତଦନ୍ତରେ ଘଟଣାର ସତ୍ୟତା ଜଣାପଡିବା ପରେ ବୁଧବାର କୃଷ୍ଣ ଚନ୍ଦ୍ରଙ୍କୁ ପୋଲିସ ଗିରଫ କରିବା ସହ କୋର୍ଟ ଚାଲାଣ କରିଥିବା ଆୟୋଜିତ ସାମ୍ବାଦିକ ସମ୍ମିଳନୀରେ ଏସପି ସୂଚନା ଦେଇଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
