ଗଜପତି: ରାସ୍ତା କଡ ବୁଦାରୁ ଯୁବକଙ୍କ ମୃତଦେହ ଉଦ୍ଧାର । ଘଟଣା ଘଟିଛି ଗଜପତି ଜିଲ୍ଲା ଆର. ଉଦୟଗିରି ଥାନା ପରିମଳ ଗାଁ ନିକଟ ରାସ୍ତାରେ । ମୃତକ ହେଲେ ଏନ୍. ଜାଲରିସଂର କୁରାମଣି ସାହୁଙ୍କୁ ପୁଅ ବାସୁଦେବ ସାହୁ ।
ମଙ୍ଗଳବାର ସକାଳେ ସ୍ଥାନୀୟ ଲୋକମାନେ ବୁଦାରୁ ବାସୁଦେବର ମୃତଦେହ ଦେଖିବାକୁ ପାଇଥିଲେ । ତାଙ୍କ ମୃତଦେହ ନିକଟରେ ଏକ ବାଇକ ମଧ୍ୟ ମିଳିଛି । ତେବେ କିଛି ଲୋକ ଏହାକୁ ଦୁର୍ଘଟଣା କହୁଥିବାବେଳେ ଅନେକ ଏହାକୁ ହତ୍ୟା ବୋଲି କହୁଛନ୍ତି । ମୃତ ବାସୁଦେବର ବେକର କିଛି ସ୍ଥାନରେ କ୍ଷତ ଚିହ୍ନ ଦେଖିବାକୁ ମିଳିଥିଲା । ରାସ୍ତା ଉପରେ ମଧ୍ୟ ଦୁର୍ଘଟଣାକୁ ନେଇ କୌଣସି ସୁରାକ୍ ମିଳିନଥିବାରୁ ପୋଲିସ ଏହାକୁ ହତ୍ୟା ବୋଲି ସନ୍ଦେହ କରୁଛି ।
ସେପଟେ ଘଟଣାସ୍ଥଳରେ ଆର ଉଦୟଗିରି ପୋଲିସ ଓ ଏସଡ଼ିପିଓ ଅଶୋକ କୁମାର ମହାନ୍ତି, ଆଇଆଇସି ମମତା ନାୟକ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରି ତଦନ୍ତ ଚଳାଇଛି । ବ୍ରହ୍ମପୁରରୁ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ପରେ ଘଟଣା ସ୍ପଷ୍ଟ ହେବ ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
