ଗଜପତି: କୋରୋନା ସଂକ୍ରମଣକୁ ଦୃଷ୍ଟିରେ ରଖି ରାଜ୍ୟ ସରକାର ଚଳିତ ବର୍ଷ ବାଣ ବିକ୍ରି ଓ ଫୁଟାଇବା ଉପରେ କଟକଣା ଲଗାଇଛନ୍ତି । ହେଲେ ଏ ନିୟମକୁ ବାଣ ବ୍ୟବସାୟୀ ଖୁଲମଖୁଲା ବେଖାତିର କରିଥିବାର ଦେଖିବାକୁ ମିଳିଛି । ଗଜପତି ଜିଲ୍ଲା ପାରଳାଖେମୁଣ୍ଡିରେ ଏକ ବାଣ ଗୋଦାମରେ ଆଗପଟୁ ତାଲା ମାରି ପଛପଟେ ବାଣ ପ୍ରସ୍ତୁତ କରାଯାଉଥିବା ଘଟଣା ସାମ୍ନାକୁ ଆସିଛି ।
କଟକଣା ସତ୍ତ୍ବେ କିଛି ବାଣ ବ୍ୟବସାୟୀ ବାଣ ଆଣି ଗଚ୍ଛିତ ରଖିଥିଲେ । ଏହି ଖବର ପାଇଁ ପ୍ରଶାସନ ପକ୍ଷରୁ ଚଢାଉ କରାଯାଇ ଦୋକାନଗୁଡିକୁ ତାଲା ମରାଯାଇଥିଲା । ତଥାପି ବ୍ୟବସାୟୀମାନେ ଦୋକାନ ଆଗରେ ତାଲା ମାରି ପଛ ରାସ୍ତାରେ ବାଣ ବ୍ୟବସାୟ ଚଲାଇଥିଲେ । ଏହାର ଖବର ପାଇ ପାରଳାଖେମୁଣ୍ଡି ଥାନା ଅଧିକାରୀ ବିଦେବାନନ୍ଦ ସ୍ବାଇଁଙ୍କ ନେତୃତ୍ବରେ ଘଟଣାସ୍ଥଳରେ ଚଢାଉ କରାଯାଇଥିଲା । ଏହା ପରେ ପାରଳାଖେମୁଣ୍ଡି ତହସିଲଦାର ଅଚ୍ୟୁତାନନ୍ଦ ଜାନୀ ପହଞ୍ଚି ବାଣ ଗଚ୍ଛିତ ଥିବା କୋଠାର ବିଭିନ୍ନ ପଥକୁ ସିଲ କରିଥିଲେ ।
ବିନା ଅନୁମତିରେ ବାଣ ରଖିବା ଏକ ବେଆଇନ କାର୍ଯ୍ୟ ହୋଇଥିଲେ ମଧ୍ୟ ପ୍ରଶାସନ କେବଳ ବାଣ ଗୋଦାମ ସିଲ୍ କରିଥିଲେ ହେଲେ ଏହାକୁ ଗଚ୍ଛିତ ରଖିଥିବା ବ୍ୟକ୍ତିଙ୍କୁ ଗିରଫ କରିନାହିଁ । ତେଣୁ ପ୍ରଶାସନର କାର୍ଯ୍ୟକୁ ନେଇ ସ୍ଥାନୀୟ ବୁଦ୍ଧିଜୀବୀ ପ୍ରଶ୍ନ କରିଛନ୍ତି । ସେମାନଙ୍କ କହିବା ଅନୁସାରେ, ସରକାର ଘୋଷଣା କରିବା ପରେ ବି ପାରଳାଖେମୁଣ୍ଡି ସମେତ ବିଭିନ୍ନ ସ୍ଥାନରେ ଅବାଧ ବାଣ ବିକ୍ରି କରାଯାଉଛି । ତେଣୁ ପ୍ରଶାସନ ତୁରନ୍ତ ସମସ୍ତ ବାଣ ଗୋଦାମ ସିଲ୍ କରିବା ସହ ବେଆଇନ ଭାବେ ବାଣ ଗଚ୍ଛିତ ରଖି ସରକାରଙ୍କ ନିଷ୍ପତ୍ତିକୁ ଚ୍ୟାଲେଞ୍ଜ କରିଥିବା ବ୍ୟକ୍ତିଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
