ଗଜପତି: ଶତାୟୁ ପୁରାତନ ପାରଳାଖେମୁଣ୍ଡି ପୌରପରିଷଦରେ 16ଟି ୱାର୍ଡ ରହିଥିବା ବେଳେ ମୋଟ ଭୋଟର ସଂଖ୍ୟା ହେଉଛି 34076 । ଏମାନଙ୍କ ମଧ୍ୟରୁ 16584 ଜଣ ପୁରୁଷ ଭୋଟର, 17490 ଜଣ ମହିଳା ଏବଂ 2 ଜଣ କିନର ରହିଛନ୍ତି । ସେହି ଗଡକୁ ଗତ ୨୦୧୩ ମସିହା ପୌର ନିର୍ବାଚନରେ କଂଗ୍ରେସ ନିଜ କବଜାରେ ରଖିଥିଲା । ଏହାର ମୋଟ 16ଟି ୱାର୍ଡ ମଧ୍ୟରୁ କଂଗ୍ରେସ 9 ବିଜୟୀ ହୋଇଥିବା ବେଳେ ବିଜେଡି 6ଟିରେ, ବିଜେପି ମାତ୍ର ଗୋଟିଏ ଆସନରେ ବିଜୟୀ ହୋଇଥିଲା । ହେଲେ ଚଳିତ ନିର୍ବାଚନରେ ଏହି ଧାରାକୁ ଭାଙ୍ଗି ବିଜେଡି ସଦ୍ୟ ସମାପ୍ତ ପଞ୍ଚାୟତ ନିର୍ବାଚନର ସଫଳତାକୁ ପୁଣିଥରେ ଦୋହରାଇବା ପାଇଁ ଜୋରଦାର ପ୍ରୟାସ କରିଛି । ସେହିପରି ପଞ୍ଚାୟତ ନିର୍ବାଚନରେ ଶୋଚନୀୟ ପରାଜୟର ସାମ୍ନା କରିଥିବା ବିଜେପି ନିଜର ସମ୍ମାନ ରକ୍ଷା ପାଇଁ ପୌର ନିର୍ବାଚନରେ ବଜୟୀ ହେବାକୁ ଆଶା ରଖିଛି ।
ପାରଳାଖେମୁଣ୍ଡି କଂଗ୍ରେସର ଗଡ ଭାବେ ପରିଚିତ ଥିଲା । ତେଣୁ, ନିଜର ଗଡ ରକ୍ଷା ପାଇଁ କଂଗ୍ରେସ ମଧ୍ୟ ସବୁ ପ୍ରକାର ପ୍ରୟାସ କରିଛି । ହେଲେ ବିଜେଡି ହିଁ ସମସ୍ତ ୱାର୍ଡରେ ପ୍ରାର୍ଥୀ ଦେଇଥିବା ବେଳେ ବିଜେପି କିମ୍ବା କଂଗ୍ରେସ ସମସ୍ତ ୧୬ୱାର୍ଡରେ ୧୬ ଜଣ ପ୍ରାର୍ଥୀ ଦେଇପାରି ନାହାନ୍ତି । ପାରଳାଖେମୁଣ୍ଡି ଅଧ୍ୟକ୍ଷ ଆସନ ଅନୁସୂଚିତ ଜାତି ପାଇଁ ସଂରକ୍ଷିତ ରହିଛି । ତେଣୁ, ସେହି ବର୍ଗର ଜଣେ ମହିଳାଙ୍କୁ ପ୍ରାର୍ଥୀ କରିବା ପାଇଁ ସବୁଦଳ ବେଶ କସରତ କରିଛନ୍ତି । ଏହି ନିର୍ବାଚନରେ ଲୋକେ ଅଧ୍ୟକ୍ଷ ପାଇଁ ସିଧାସଳଖ ଭୋଟ ଦେବେ । ତେଣୁ, ସବୁ ଦଳ ନିଜନିଜ ଦୃଷ୍ଟିରୁ ବିଚାର କରି ଜଣେ ଜଣେ ଶିକ୍ଷିତା ଅନୁସୂଚିତ ଜାତି ବର୍ଗର ମହିଳାଙ୍କୁ ପ୍ରାର୍ଥୀ କରିଥିବା ବେଳେ ବିଜୟୀ ନେଇ ଦୃଢୋକ୍ତି ପ୍ରକାଶ କରିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ବଚ୍ଛ ଭାବମୂର୍ତ୍ତି ଏବଂ ରାଜ୍ୟ ସରକାରଙ୍କ ଜନକଲ୍ୟାଣ ଯୋଜନାକୁ ପାଥେୟ କରି ବିଜେଡି ଏହି ନିର୍ବାଚନରେ ସଫଳତା ହାସଲ କରିବାକୁ ଆଶା ବାନ୍ଧିଛି । ଚଳିତ ନିର୍ବାଚନରେ ଅଧ୍ୟକ୍ଷା ପ୍ରାର୍ଥୀ ଏବଂ ସମସ୍ତ ୱାର୍ଡରେ ବିଜେଡି କାଉନ୍ସିଲର ପ୍ରାର୍ଥୀ ବିଜୟୀ ହେବେ ବୋଲି କହିଛି ବିଜେଡି ।
୨୦୧୩ରୁ ୨୦୧୮ ମଧ୍ୟରେ ପାରଳାଖେମୁଣ୍ଡିରେ ବହୁ ଉନ୍ନୟନମୂଳକ କାମ ହୋଇଛି । ନୂତନ ବସଷ୍ଟାଣ୍ଡ ନିର୍ମାଣ ଠାରୁ ଆରମ୍ଭ କରି ବିଜୁ କଲ୍ୟାଣ ମଣ୍ଡପ, ପାଠାଗାରର ପୁନଃଉଦ୍ଧାର ଭଳି ଅନେକ ଉନ୍ନୟନମୂଳକ କାମ ସହ ରାସ୍ତାଘାଟ ନିର୍ମାଣ ଆଦି କରାଯାଇଛି । ତେଣୁ, କାମକୁ ଦେଖି ଲୋକେ ପୁଣିଥରେ କଂଗ୍ରେସକୁ ଭୋଟ ଦେବେ ଏବଂ ପୁଣିଥରେ କଂଗ୍ରେସ ହିଁ ଏହି ଆସନ ଦଖଲ କରିବ ବୋଲି ଦଳ ପକ୍ଷରୁ କୁହାଯାଇଛି । ସେହିଭଳି ବିଜେପି ଏହି ନର୍ବାଚନରେ ବିଜୟୀ ହୋଇ ପଞ୍ଚାୟତ ନିର୍ବାଚନର ପ୍ରତିଶୋଧ ନେବାକୁ ଅଣ୍ଟା ଭିଡିଛି । ଅର୍ଥବଳ ଏବଂ ପ୍ରଶାସନିକ କଳକୁ ବ୍ୟବହାର କରି ବିଜେଡି ଗତ ପଞ୍ଚାୟତ ନିର୍ବାଚନରେ ବିଜୟୀ ହୋଇଛି । ତେବେ ସହରି ଭୋଟରଙ୍କ ଉପରେ ଏହାର କୌଣସି ପ୍ରଭାବ ପଡିବ ନାହିଁ । ଦଳର ଅଧ୍ୟକ୍ଷା ପ୍ରାର୍ଥୀଙ୍କ ସମେତ ଅଧିକାଂଶ ୱାର୍ଡରେ ବିଜେପି ପ୍ରାର୍ଥୀ ବିଜୟୀ ହେବେ ବୋଲି ବିଜେପି ପକ୍ଷରୁ କୁହାଯାଇଛି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
