ଢେଙ୍କାନାଳ: ମହିଳାଙ୍କ ଉପରେ ଚଢ଼ିଗଲା କାର । ରାସ୍ତା ପାର ହେଉଥିବାବେଳେ କାର ଧକ୍କାରେ ଜଣେ ମହିଳାଙ୍କ ମୃତ୍ୟୁ ଘଟିଥିବା ନେଇ ସ୍ଥାନୀୟ ଲୋକଙ୍କ ଉତ୍ତେଜନା ଦେଖିବାକୁ ମିଳିଛି । ଢେଙ୍କାନାଳ ଜିଲ୍ଲା ସଦର ଥାନା ଅନ୍ତର୍ଗତ ନାଗିଆପଶି ଠାରେ ରାସ୍ତା ପାରି ହେବାବେଳେ ଏକ କାର ଧକ୍କାରେ ମହିଳାଙ୍କ ମୃତ୍ୟୁ ଘଟିଛି ।
ମହିଳାଙ୍କ ଉପରେ ଚଢ଼ିଗଲା କାର, କ୍ଷତିପୂରଣ ଦାବିରେ ଦୁଇଘଣ୍ଟା ଧରି ରାସ୍ତା ଅବରୋଧ
ମୃତ ମହିଳା ଜଣକ ସ୍ଥାନୀୟ ନଗିଆପଶି ଗ୍ରାମର ଶୈଳବାଳା ସାମଲ । ଏହି ଘଟଣାରେ ସ୍ଥାନୀୟ ଲୋକଙ୍କ ଉତ୍ତେଜନା ଦେଖିବାକୁ ମିଳିଥିଲା । ଦୁର୍ଘଟଣାରେ ମହିଳାଙ୍କ ମୃତ୍ୟୁ ଜନିତ କ୍ଷତିପୂରଣ ପାଇଁ ସ୍ଥାନୀୟ ଲୋକେ ଢେଙ୍କାନାଳ-ଗଁନ୍ଦିଆ ମୁଖ୍ୟ ରାସ୍ତାକୁ ଅବରୋଧ କରିଥିଲେ। ଫଳରେ ସାଧାରଣ ଯାତାୟାତ ସମୂର୍ଣ୍ଣ ବାଧାପ୍ରାପ୍ତ ହୋଇଥିଲା ।
ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝା ସୁଝା କରିବା ପରେ ଦୀର୍ଘ ଦୁଇଘଣ୍ଟା ପରେ ରାସ୍ତା ଅବରୋଧ ହଟିଥିବା ଜଣାପଡ଼ିଛି । ତେବେ ଦୁର୍ଘଟଣା ଘଟାଇଥିବା କାର ଚାଳକକୁ ଅଟକ ରଖିଛି ପୋଲିସ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
