ଢେଙ୍କାନାଳ: କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଦିନିକିଆ ଢେଙ୍କାନାଳ ଗସ୍ତରେ ଆସି ସ୍ୱାଧୀନତା ସଂଗ୍ରାମୀଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି । 'ମୋ ମାଟି ମୋ ଦେଶ' ଅଭିଯାନରେ କେନ୍ଦ୍ରମନ୍ତ୍ରୀ ଢେଙ୍କାନାଳ ଆସି ବିପ୍ଲବୀ ସାରଙ୍ଗ ଧର ଦାସଙ୍କ ଗାଁରୁ ମାଟି ନେଇଛନ୍ତି । ଦେଶ ସ୍ବାଧୀନତା ପାଇଁ ଯେଉଁ ବୀର ପୁରୁଷମାନେ ନିଜର ଜୀବନକୁ ବାଜି ଲଗାଇଥିଲେ ସେମାନଙ୍କୁ ମନେ ପକାଇ ଆରମ୍ଭ ହୋଇଛି 'ମୋ ମାଟି ମୋ ଦେଶ' ଅଭିଯାନ । ସ୍ୱାଧୀନତା ସଂଗ୍ରାମୀ ତଥା ଗଡ଼ଜାତ ଆନ୍ଦୋଳନର ନାୟକ ଗଡ଼ଜାତ ଗାନ୍ଧୀ ବିପ୍ଲବୀ ସାରଙ୍ଗ ଧର ଦାସଙ୍କ ଜନ୍ମମାଟି ଢେଙ୍କାନାଳ ହରେକୃଷ୍ଣପୁରରେ ଆୟୋଜିତ ହୋଇଛି ଏହି କାର୍ଯ୍ୟକ୍ରମ ।
ସ୍ବାଧୀନତାର ଅମୃତ ମହୋତ୍ସବ ଅବସରରେ ସେହି ସ୍ୱାଧୀନତା ସଂଗ୍ରାମୀଙ୍କ ପବିତ୍ର ଜନ୍ମମାଟିରେ ପହଞ୍ଚି ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଏହି ଉପଲକ୍ଷେ ନେହେରୁ ଯୁବ କେନ୍ଦ୍ର ସଂଗଠନ ପକ୍ଷରୁ ବିଶିଷ୍ଟ ସ୍ୱାଧୀନତା ସଂଗ୍ରାମୀ ତଥା ଗଡ଼ଜାତ ଆନ୍ଦୋଳନର ନାୟକ ଗଡ଼ଜାତ ଗାନ୍ଧୀ ବିପ୍ଲବୀ ସାରଙ୍ଗ ଧର ଦାସଙ୍କ ଜନ୍ମମାଟି ଢେଙ୍କାନାଳ ହରେକୃଷ୍ଣପୁରରୁ ରାଷ୍ଟ୍ରୀୟ ଯୁଦ୍ଧ ସ୍ମାରକୀକୁ ମାଟି ନିଆଯାଇଛି । ଆଜି ସକାଳ ସାଢ଼େ ୧୦ଟା ସମୟରେ କେନ୍ଦ୍ର ଶିକ୍ଷା, ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହି କାର୍ଯ୍ୟକ୍ରମରେ ଯୋଗ ଦେଇଛନ୍ତି ।
ଏହି କାର୍ଯ୍ୟକ୍ରମ ଅବସରରେ ସ୍ୱାଧୀନତା ସଂଗ୍ରାମୀମାନଙ୍କର ଦେଶ ପାଇଁ ଆତ୍ମବଳୀ ଓ ସଂଗ୍ରାମ ବିଷୟରେ ଜନ ସଧାରଣଙ୍କୁ ଅବଗତ କରାଇ ସ୍ୱାଧୀନତା ସଂଗ୍ରାମୀଙ୍କ ଜନ୍ମମାଟିରେ ସ୍ବର୍ଗତ ସାରଙ୍ଗ ଧର ଦାସଙ୍କୁ ମନେପକାଇ ତାଙ୍କର ସ୍ମୃତିଚାରଣ କରିଛନ୍ତି କେନ୍ଦ୍ରମନ୍ତ୍ରୀ । ଏହି ଅବସରରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବିପ୍ଲବୀ ସାରଙ୍ଗ ଧର ଦାସଙ୍କ ସ୍ମୃତି ସ୍ତମ୍ଭରେ ପୁଷ୍ପମାଲ୍ୟ ଅର୍ପଣ କରିଛନ୍ତି । ପରେ ସାରଙ୍ଗ ଧର ଦାସଙ୍କ ଘରଠାରୁ ପୂଜାର୍ଚ୍ଚନା କରି ଶୁଭ କଳସରେ ମାଟି ସଂଗ୍ରହ କରିଛନ୍ତି । ପରେ ପରେ ହରେକୃଷ୍ଣପୁର କୋଠ ଘରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମନ କି ବାତ୍ କାର୍ଯ୍ୟକ୍ରମରେ ଯୋଗଦେଇଥିବା ଦେଖିବାକୁ ମିଳିଛି ।
ଏହା ପରେ ଏକ ବିଶାଳ ପଦଯାତ୍ରାରେ ସ୍ୱାଧୀନତା ସଂଗ୍ରାମୀ ସାରଙ୍ଗ ଧର ଦାସଙ୍କ ଗ୍ରାମ ପରିକ୍ରମା କରାଯାଇଥିଲା । ଏହି ଅବସରରେ ହରେକୃଷ୍ଣପୁର ପ୍ରାଥମିକ ବିଦ୍ୟାଳୟ ପରିସରରେ ଶହୀଦମାନଙ୍କର ଏକ ସ୍ମୃତି ଫଳକକୁ ଉନ୍ମୋଚନ କରିଥିଲେ କେନ୍ଦ୍ରମନ୍ତ୍ରୀ । ସ୍କୁଲ ପରିସରରେ ସଂଗ୍ରାମୀଙ୍କ ଉଦ୍ଦେଶ୍ୟରେ ବୃକ୍ଷରୋପଣ କରିଥିଲେ । ପରେ ପରେ ଆୟୋଜିତ ସାଧରଣ ସଭାରେ ଉଦବୋଧନ ଦେଇ ବୀର ସ୍ୱାଧୀନତା ସଂଗ୍ରାମୀମାନଙ୍କୁ ଶ୍ରଦ୍ଧାଞ୍ଜଳି ଜଣାଇ ସ୍ମୃତି ଚାରଣ କରିଥିଲେ ।
ଇଟିଭି ଭାରତ, ଢେଙ୍କାନାଳ
