ଢେଙ୍କାନାଳ: ଶିକ୍ଷକ ନିଯୁକ୍ତି ଦାବିରେ ଭୁବନ ସରକାରୀ ବାଳକ ଉଚ୍ଚ ବିଦ୍ୟାଳୟରେ ଛାତ୍ରଛାତ୍ରୀ ଓ ଅଭିଭାବକମାନେ ତାଲା ପକାଇଛନ୍ତି । ଏହା ସହ ପାଞ୍ଚ ଶହରୁ ଅଧିକ ଛାତ୍ରଛାତ୍ରୀ ଧାରଣାରେ ବସିଛନ୍ତି । ବିଦ୍ୟାଳୟ କମିଟି ସଭାପତିଙ୍କ ଉପସ୍ଥିତିରେ ଉପଜିଲ୍ଲାପାଳଙ୍କ ସହ ଆଲୋଚନା ପରେ ପ୍ରତିଶ୍ରୁତି ପାଇଲା ପରେ ପିଲାମାନେ ଧାରଣାରୁ ହଟିଛନ୍ତି । ଯଦି ଏକ ସପ୍ତାହ ମଧ୍ୟରେ ବିଦ୍ୟାଳୟର ଶିକ୍ଷକଙ୍କ ପଦବୀ ପୂରଣ ନ ହୁଏ ତେବେ ଅନିର୍ଦ୍ଧିଷ୍ଟ ସମୟ ପାଇଁ ବିଦ୍ୟାଳୟରେ ତାଲା ପଡିବ ବୋଲି କହିଛନ୍ତି ବିଦ୍ୟାଳୟର କମିଟି ସଭାପତି ।
ଭୁବନ ସରକାରୀ ବାଳକ ଉଚ୍ଚ ବିଦ୍ୟାଳୟରେ ଷଷ୍ଠରୁ ଦଶମ ଶ୍ରେଣୀ ପର୍ଯ୍ୟନ୍ତ ଥିବାରୁ ପାଞ୍ଚ ଶହରୁ ଉର୍ଦ୍ଧ୍ବ ଛାତ୍ର ଅଧ୍ୟୟନ କରନ୍ତି । ଏହି ବିଦ୍ୟାଳୟରେ 15 ଜଣ ଶିକ୍ଷକଙ୍କ ପଦବୀ ଥିବାବେଳେ ଏବେ ଅଛନ୍ତି 6 ଜଣ ଶିକ୍ଷକ । ଯାହାଫଳରେ କି ପିଲାମାନଙ୍କ ପାଠ ପଢାରେ ଅସୁବିଧା ହେଉଛି । ଏ ସଂପର୍କରେ ଅଭିଭାବକମାନେ ଜିଲ୍ଲା ଶିକ୍ଷାଧିକାରୀଙ୍କୁ ବାରମ୍ବାର ଅବଗତ କରାଇଥିଲେ ବି ଫଳ ଶୂନ । ଫଳରେ ଆଜି ଛାତ୍ରମାନେ ଫାଟକରେ ତାଲା ପକାଇ ବିକ୍ଷୋଭ କରୁଥିଲେ । ସେହି ସମୟରେ କାମାକ୍ଷାନଗର ଉପଜିଲ୍ଲାପାଳ ଭୁବନ ବ୍ଲକ କାର୍ଯ୍ୟାଳୟରୁ ସେହି ବାଟ ଦେଇ ଫେରୁଥିବା ବେଳେ ତାଙ୍କୁ ଘେରିଯାଇଥିଲେ ସମସ୍ତ ଛାତ୍ର । ପରେ ବିଦ୍ୟାଳୟର କମିଟି ସଭାପତି ଘଟଣାସ୍ଥଳରେ ପହଞ୍ଚି ଉପଜିଲ୍ଲାପାଳ ବିଷ୍ଣୁପ୍ରସାଦ ଆଚାର୍ଯ୍ୟଙ୍କ ସହିତ ଆଲୋଚନା କରିବା ପରେ ଆନ୍ଦୋଳନରୁ ଓହରିଥିଲେ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
