ଢେଙ୍କାନାଳ: ଜଙ୍ଗଲରୁ ଜନ୍ତୁ ଶିକାର ପଡିଲା ମହଙ୍ଗା । କାମାକ୍ଷାନଗର ବନବିଭାଗକୁ ବଡ ସଫଳତା । ବନ ବିଭାଗ ହାତରେ ଧରାପଡିଲେ 5 ଶିକାରୀ । ଗୋଟିଏ ବନ୍ଧୁକ ଓ ଧନୁତୀର ସହ ୫ ଶିକାରୀଙ୍କୁ ଗିରଫ କରିଛି ବନ ବିଭାଗ । କାମାକ୍ଷାନଗର ପୁର୍ବାଞ୍ଚଳ ରେଞ୍ଜ ଏକୁଲ ଗ୍ରାମରେ ବନବିଭାଗ ବିଶେଷ ସୂତ୍ରରୁ ଖବର ପାଇ ୫ ଜଣ ଜନ୍ତୁ ଶିକାରୀକୁ ଗିରଫ କରିଛି ।
ଗିରଫ ଶିକାରୀମାନେ ହେଲେ ସେହି ଗ୍ରାମର ଭିମସେନ ଦେହୁରି, ବିମ୍ବାଧର ଦେହୁରୀ, ଲୋଚନ ଦେହୁରୀ,ନର ଦେହୁରୀ ଓ ନିରଞ୍ଜନ ଦୈହୁରୀ । ଏମାନେ ବିଭିନ୍ନ ସମୟରେ ଜନ୍ତୁ ଶିକାର କରୁଥିବା ଅଭିଯୋଗ ହେଇଆସୁଥିଲା । ବିଶେଷ ସୂତ୍ରରୁ ଖବର ପାଇ ଆଜି ଗ୍ରାମରୁ ସମସ୍ତ ୫ ଜଣ ଅଭିଯୁକ୍ତଙ୍କୁ ଗିରଫ କରିଛି କାମାକ୍ଷା ନଗର ବନବିଭାଗ । ଏହା ସହ ଶିକାରରେ ବ୍ୟବହାର କରୁଥିବା ଗୋଟିଏ ଦେଶୀ ବନ୍ଧୁକ, ଦୁଇଟି ଧନୁ ଓ ତୀର ସହ ଗୋଟିଏ ସମ୍ବର ଶିଙ୍ଗ ଜବତ ହୋଇଛି । ଗିରଫ ପରେ ଆଜି(ଶନିବାର) ସେମାନଙ୍କ ଡାକ୍ତରୀ ପରୀକ୍ଷା କରାଯାଇଛି । ଖୁବଶୀଘ୍ର ଅଭିଯୁକ୍ତଙ୍କୁ ପୋଲିସ ହାଜତକୁ ପଠାଯିବ ବୋଲି ସୂଚନା ଦେଇଛି ବନ ବିଭାଗ।
ଇଟିଭି ଭାରତ, ଢେଙ୍କାନାଳ
