ଢେଙ୍କାନାଳ: ସ୍ଥାନୀୟ ସଦର ଥାନା ଅନ୍ତର୍ଗତ ବଣସିଂହଠାରେ ଥିବା ଏକ କାଠ ଫର୍ଣ୍ଣିଚର ତିଆରି କାରଖାନା ଉପରେ ଅଚାନକ ଚଢାଉ କରିବା ଷଡଙ୍ଗୀ ବନାଞ୍ଚଳ କର୍ମଚାରୀଙ୍କ ପାଇଁ ବୁମେରାଂ ସାଜିଛି । ଏପରିକି ଚଢାଉ ଆଳରେ କିଛି କାଠ ଜବତ କରିବା ସହ 25 ହଜାର ଟଙ୍କା ନେଇ ରସିଦ ଦେଉନଥିବା ଅଭିଯୋଗ ଉଠାଇ କାର୍ଯ୍ୟାନୁଷ୍ଠାନ ପାଇଁ ଅଡ଼ି ବସିଛନ୍ତି ଗ୍ରାମବାସୀ । ଫଳରେ ଏହି ଚଢ଼ାଉର ନେତୃତ୍ବ ନେଇଥିବା ଷଡଙ୍ଗୀ ଡେପୁଟି ରେଞ୍ଜ ଅଫିସର ହରଡ଼ ଘଣାରେ ପଡି ଯାଇଛନ୍ତି ।
ସୂଚନା ଅନୁଯାୟୀ ବଣସିଂହ ଗ୍ରାମର କାଠ ପର୍ଣ୍ଣିଚର ତିଆରି କାରଖାନାରେ ଅତର୍କିତ ଚଢାଉ କରି ଷଡଙ୍ଗୀ ଡେପୁଟି ରେଞ୍ଜ ଅଫିସର ଗୌତମ ପ୍ରଧାନ ହରଡ ଘଣାରେ ପଡିଯାଇଛନ୍ତି । ଚଢ଼ାଉ ଆଳରେ ବେଆଇନ ଭାବେ ସେ 30 ସିଫ୍ଟ କାଠ ଜବତ କରିଥିବା ସହ 25 ହଜାର ଟଙ୍କା ନେଇଥିଲେ ମଧ୍ୟ ରସିଦ କିମ୍ବା ସିଜ କରିଥିବା ଦ୍ରବ୍ୟର ଲିଷ୍ଟ ଦେଇନଥିଲେ । ଏ ସମ୍ପର୍କରେ ଭାଇରାଲ ହେଉଥିବା ଏହି କାଠ କାରଖାନାର ଏକ ସିସିଟିଭି ଫୁଟେଜକୁ ନେଇ ଟାର୍ଗେଟ ହୋଇଛନ୍ତି ଷଡଙ୍ଗୀ ଡେପୁଟି ରେଞ୍ଜର । ଏହି ସିସି ଟିଭି ଫୁଟେଜରେ ବନ କର୍ମଚାରୀମାନେ ଗତ 7 ତାରିଖରେ ଏହି ଫର୍ଣ୍ଣିଚର କାରଖାନାରେ ଚଢ଼ାଉର ଦୃଶ୍ୟ ସ୍ପଷ୍ଟ ଦେଖିବାକୁ ମିଳୁଛି ।
ତେବେ ଦୃଶ୍ୟରେ ଜଣେ ବନ କର୍ମଚାରୀ ଜଣଙ୍କଠାରୁ କିଛି ଟଙ୍କା ପକେଟରେ ପୁରାଉଥିବା ଦୃଶ୍ୟ ମଧ୍ୟ ଦେଖିବାକୁ ମିଳୁଛି । ବେଆଇନ ଭାବେ ଟଙ୍କା ଆଦାୟ ପାଇଁ ଏହି କାରଖାନାରେ ଉଦ୍ଦେଶ୍ୟମୂଳକ ଭାବେ ଚଢ଼ାଉ କରି ତାଙ୍କୁ ଧମକ ଚମକ ଦେଇ ବେଆଇନ ଭାବେ 50 ହଜାର ଟଙ୍କା ଦାବି କରିଥିଲେ ବୋଲି କାରଖାନା ମାଲିକ ସଙ୍ଗୀନ ଅଭିଯୋଗ ଉଠାଇଛନ୍ତି । କାରଖାନାର ମାଲିକ ବଣସିଂହ ଗ୍ରାମର ରମଣୀ ରଞ୍ଜନ ମହାରଣା। ବନ କର୍ମଚାରୀମାନଙ୍କ ଏପରି ବେଆଇନ କାରନାମାର ପ୍ରତିବାଦ କରିଛନ୍ତି ବଣସିଂହ ଗ୍ରାମବାସୀ । ଏପରିକି ଗ୍ରାମବାସୀମାନେ ଜିଲ୍ଲା ବନଖଣ୍ଡ ଅଧିକାରୀଙ୍କ କାର୍ଯ୍ୟାଳୟରେ ପ୍ରତିବାଦ ପ୍ରଦର୍ଶନ କରିବା ସହ ଏପରି ଦାଦାଗିରି କରିଥିବା ଡେପୁଟି ରେଞ୍ଜରଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦାବି କରିଛନ୍ତି ।
ଏ ସମ୍ପର୍କରେ ବନଖଣ୍ଡ ଅଧିକାରୀଙ୍କୁ ଲିଖିତ ଭାବେ ଗୁହାରୀ କରିଛନ୍ତି ଗ୍ରାମବାସୀ । ତେବେ ଏପରି ବେଆଇନ ଓ ଦାଦାଗିରିର ଶିକାର ହୋଇଥିବା କାଠ କାରଖାନା ମାଲିକଙ୍କୁ ନ୍ୟାୟ ନମିଳିଲେ ବାଧ୍ୟ ହୋଇ ଗ୍ରାମବାସୀ ଭୟଙ୍କର ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି । ଏପଟେ କିନ୍ତୁ ବନଖଣ୍ଡ ଅଧିକାରୀଙ୍କ କହିବା କଥା ଠିକ ଓଲଟା । ଏହି କାରଖାନାରେ ବେଆଇନ କାମ ନେଇ ପୂର୍ବରୁ ସୂଚନା ମିଥିବାରୁ ଏହି ଚଢ଼ାଉ କରାଯାଇଥିଲା । ତେବେ ଚଢ଼ାଉ ବେଳେ ଆମ କର୍ମଚାରୀଙ୍କୁ ଥଣ୍ଡା ପାନୀୟ ଯାଚିବାରୁ ଏମାନେ ନିଜେ ପଇସା ଦେଇଥିଲେ । ଫଳରେ ବଳକା ପଇସା ଫେରାଉଥିବା ଖୋଦ ଲୋକଟି ତାଙ୍କର ସାକ୍ଷୀ ଭାବେ ଯାଇଥିବା ଲୋକ ବୋଲି ବନଖଣ୍ଡ ଅଧିକାରୀ ପ୍ରକାଶ କରିଛନ୍ତି ।
ସେପଟେ କାଠ ଜବତର ଲିଷ୍ଟ ଦେବା କଥାରେ ବନ ବିଭାଗର କହିବା ଅନୁଯାୟୀ ଏହି ଅଭିଯୋଗର ସତ୍ୟତାର ଯାଞ୍ଚ କରି ରିପୋର୍ଟ ଦେବା ପାଇଁ ସେ ଦୁଇ ଜଣ ବରିଷ୍ଠ ପଦାଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ଯାଞ୍ଚ ରିପୋର୍ଟ ମୁତାବକ ସେ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ପ୍ରକାଶ କରିଛନ୍ତି । ଏପଟେ ସଦର ଥାନା ତରଭା ପୋଲିସ ଫାଣ୍ଡିରେ ହୋଇଥିବା ଅଭିଯୋଗକୁ ନେଇ ପୋଲିସ ତଦନ୍ତ କରିବା ବୋଲି ଜଣା ପଡିଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
