ଢେଙ୍କାନାଳ: ବର୍ଷା ହେଲେ ଢେଙ୍କାନାଳ ସହରର ଟାଉନ ପ୍ଲାନିଂବାସୀଙ୍କ ସମସ୍ୟା ବଢି ଯାଏ । ଡ୍ରେନ ପାଣିରେ ବୁଡି ଯାଏ କଲୋନୀ ରାସ୍ତା ଘାଟ । ଦୀର୍ଘ 25 ବର୍ଷ ହେଲା ଏପରି ସମସ୍ୟାରେ ସନ୍ତୁଳି ହେଉଛନ୍ତି କଲୋନୀ ବାସିନ୍ଦା । ଢେଙ୍କାନାଳ ପୌରାଞ୍ଚଳର ୱାର୍ଡ ନଂ 16 ଓ 20ରେ ରହିଥିବା ଦେବୋତ୍ତର ଜାଗାରୁ 11 ଏକର ଜାଗାକୁ ଗତ 1986 ମସିହାରେ ଟାଉନ ପ୍ଲାନିଂକୁ କଲୋନୀ ପାଇଁ ହସ୍ତାନ୍ତର ହୋଇଥିଲା । ପରେ ଏହି ଜାଗାକୁ ପ୍ଲଟିଂ କରି ଲୋକମାନଙ୍କୁ ବିକ୍ରି କରାଯାଇଥିଲା । ହେଲେ 25 ବର୍ଷ ହେବ କୃତ୍ରିମ ବନ୍ୟା ସମସ୍ୟା ଯୋଗୁଁ ଜର୍ଜରିତ ଏହି କଲୋନୀବାସୀ ।
ଲୋକମାନଙ୍କ ପାଇଁ ରାସ୍ତା ଘାଟ ବିଦ୍ୟୁତ ଆଦି ବ୍ୟବସ୍ଥା କରି ଦିଆଯିବ, କୌଣସି ଅସୁବିଧା ହେବ ନାହିଁର ପ୍ରତିଶୃତି ଦେଇ ଲୋକଙ୍କୁ ପ୍ଲଟ ହସ୍ତାନ୍ତର କରି ଦିଆଗଲା । ମାତ୍ର ଏହି ଟାଉନ ପ୍ଲାନିଂବାସୀଙ୍କ ଦୁଃଖ ଏବେ କେହି ଶୁଣି ନାହାନ୍ତି । ବର୍ଷା ହେଲେ କଲୋନୀର ଘରେ ଘରେ ପଶି ଯାଉଛି ଡ୍ରେନ ପାଣି । କଲୋନୀର ରାସ୍ତା ଘାଟ ଡ୍ରେନ ପାଣିରେ ବୁଡି ରହୁଛି । ସହର ସାରା ଡ୍ରେନ ପାଣି ଏହି କଲୋନୀରେ ପଶି କୃତ୍ରିମ ବନ୍ୟା ସୃଷ୍ଟି କରୁଛି । ଫଳରେ କଲୋନୀବାସୀ ନାହିଁ ନଥିବା ସମସ୍ୟାରେ ପଡି ଯାଉଥିବା ପ୍ରକାଶ କରନ୍ତି।
ତେବେ କଲୋନୀରେ 300 ପରିବାର ବସବାସ କରନ୍ତି । ଗତ 1996 ମସିହାରେ ଟାଉନ ପ୍ଲାନିଂ ବିକାଶ ପରିଷଦ ଗଠନ କରି ଏହି ସମସ୍ୟା ପାଇଁ ବାରମ୍ବାର ପୌର କର୍ତ୍ତୃପକ୍ଷଙ୍କଠାରୁ ଆରମ୍ଭ କରି ଉପଜିଲ୍ଲାପାଳ ଓ ଜିଲ୍ଲାପାଳଙ୍କ ପର୍ଯ୍ୟନ୍ତ ଗୁହାରି କରୁଛନ୍ତି । ମାତ୍ର କର୍ତ୍ତୃପକ୍ଷମାନଙ୍କ ପ୍ରତିଶୃତିରେ ଅଟକି ରହିଛି ସମାଧାନ । ଫଳରେ ନିରାଶ ହୋଇଥିବା ପ୍ରକାଶ କରନ୍ତି ଟାଉନ ପ୍ଲାନିଂ ବିକାଶ ପରିଷଦର ଉପଦେଷ୍ଟା ।
ଗତ 25 ବର୍ଷ ହେଲା ଏପରି ସମସ୍ୟା ଲାଗି ରହିଛି । ବର୍ଷା ହେଲେ ଘର ଭିତରକୁ ପଶିଯାଉଛି ପାଣି । ଆଉ ବର୍ଷା ଲାଗି ରହିଲେ କଲୋନୀବାସୀଙ୍କ ବଢିଯାଏ ଦୁର୍ଦଶା । ଘରେ ଘରେ 2 ଫୁଟର ପାଣି ଜମିଯାଏ । ରାତି ଅନିଦ୍ରା ହୋଇ ଖଟ ଉପରେ ବସି ରୁହନ୍ତି କଲୋନୀବାସୀ । ଆଉ ଚାରିଆଡେ ଜଳମଗ୍ନ ହୋଇ ସୃଷ୍ଟି କରେ କୃତ୍ରିମ ବନ୍ୟା । ତେବେ ପ୍ରତ୍ୟେକ ବର୍ଷ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରାଯାଉଥିବା ପ୍ରକାଶ କରନ୍ତି ପୌର କର୍ତ୍ତୃପକ୍ଷ । ମାତ୍ର ଫଳ ଶୂନ । ସୁଧୁରୀ ପାରୁନି ସମସ୍ୟା । ପାଲଟା କଲୋନୀ ତିଆରି ବେଳେ ଭୁଲ ଯୋଜନା ଯୋଗୁଁ ଏପରି ଅବସ୍ଥା ହେଉଥିବା ନିଜର ଅସହାୟତା ପ୍ରକାଶ କରନ୍ତି ପୌର କର୍ତ୍ତୃପକ୍ଷ ।
ଏପରିସ୍ଥଳେ ଗତ ଦୁଇ ଦିନ ହେଲା ଲଗାଣ ବର୍ଷା ତ ଛାଡିଯାଇଛି । ମାତ୍ର ଏହି କଲୋନୀବାସୀଙ୍କ ଦୁର୍ଦଶା କମିନି । ଏପଟେ ପୌର କର୍ତ୍ତୃପକ୍ଷ ସମାଧାନ ଦିଗରେ ନିଜର ଅସହାୟତା ପ୍ରକାଶ କରିବା ଏହି ସମସ୍ୟା ସୁଧାରିବ କେବେ ତାକୁ ଚାହିଁ ରହିଛନ୍ତି କଲୋନୀ ବାସିନ୍ଦା ।
ଢେଙ୍କାନାଳରୁ ଉର୍ମିଳା ପାତ୍ରଙ୍କ ରିପୋର୍ଟ, ଇଟିଭି ଭାରତ
