ଢେଙ୍କାନାଳ: ମହାମାରୀ କୋରୋନାରୁ ରକ୍ଷା ପାଇବା ପାଇଁ ଲକଡାଉନରେ ଦେଶ । ଯାହା ଫଳରେ ଦୋକାନ ବଜାର ବନ୍ଦ ସାଙ୍ଗକୁ ମଦ ଦୋକାନ ମଧ୍ୟ ସିଲ ରହିଛି । ଫଳରେ ଦେଶୀ ମଦ ମାଫିଆମାନେ ସକ୍ରିୟ ହୋଇ ପଡିଛନ୍ତି। ଏପରିସ୍ଥଳେ ଚୋରା ମଦର ପେଣ୍ଠସ୍ଥଳୀ କୁହାଯାଉଥିବା ଭୁବନ ଅଞ୍ଚଳରେ ଅବକାରୀ ବିଭାଗ ଓ ଭୁବନ ପୋଲିସ ମିଳିତ ଭାବେ ଚଢାଉ କରିଛି । ଚଢାଉରେ ବିପୁଳ ପରିମାଣରେ ନକଲି ମଦ ଓ ମଦ ପ୍ରସ୍ତୁତିରେ ବ୍ୟବହୃତ ସାମଗ୍ରୀ ଜବତ କରାଯାଇଛି ।
ରବିବାର ଭୁବନ ପୋଲିସ ନେତୃତ୍ବରେ ମହୁଲପାଳ ପଞ୍ଚାୟତର ନୟାନୀଳକଣ୍ଠପୁର ଗ୍ରାମ ଜଙ୍ଗଲରେ ଏହି ଚଢାଉ କରାଯାଇଥିଲା । କୌଶଳକ୍ରମେ ଘଟଣାସ୍ଥଳରୁ 6 ଜଣ ଫେରାର ହୋଇଥିଲେ ମଧ୍ୟ ଜଣକୁ ଗିରଫ କରିବାରେ ସଫଳ ହୋଇଛି ପୋଲିସ । ଗିରଫ ଜଣକ ନୟାନୀଳକଣ୍ଠପୁରର ବାବୁ ପାତ୍ର । ତେବେ ଘଟଣାସ୍ଥଳରୁ ମଦ ପ୍ରସ୍ତୁତିରେ ବ୍ୟବହୃତ ତିନୋଟି ହାଣ୍ଡି, ଦୁଇଟି ଜାରକିନ ମହୁଲି ମଦ ଓ ଗୋଟିଏ ଜାରକିନ ସ୍ପିରିଟ ଜବତ କରିଛି ଭୁବନ ପୋଲିସ ।
ଫେରାର ହୋଇଯାଇଥିବା ସମ୍ପୃକ୍ତ ଗ୍ରାମର ଜଳଧର ସାମଲ, ରବି ସାମଲ, ଅକ୍ଷୟ ସାମଲଙ୍କ ସମେତ 6 ଜଣଙ୍କ ନାମରେ ମାମଲା ରୁଜୁ କରି ତଦନ୍ତ ଚଳାଇଛି ଭୁବନ ପୋଲିସ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
