ଢେଙ୍କାନାଳ: ହାତୀପଲଙ୍କ ଉପରେ ଚଢିଗଲା ଟ୍ରକ । ଢେଙ୍କାନଲ ଜିଲ୍ଲା ମୋଟଙ୍ଗା ଥାନା ଅନ୍ତର୍ଗତ ଜାତୀୟ ରାଜପଥ-55ର ପୋଡପଡା ଛକ ନିକଟରେ ଘଟିଛି ଏହି ମର୍ମନ୍ତୁଦ ସଡକ ଦୁର୍ଘଟଣା । ରାସ୍ତା ଅତିକ୍ରମ କରୁଥିବା ଏହି ହାତୀପଲଙ୍କ ଉପରେ ଉକ୍ତ ଟ୍ରକ ମାଡିଯାଇଛି ।
ଏହି ଦୁର୍ଘଟଣାରେ ଟ୍ରକ ତଳେ ଏକ ହାତୀ ଛୁଆ ଚାପି ହୋଇ ପ୍ରାଣ ହରାଇଛି । ଅପର ପକ୍ଷରେ ଘଟଣା ସ୍ଥଳରେ ଏକ ହାତୀଦାନ୍ତ ପଡିଥିବା ଦେଖାଯାଇଥିଲା । ଫଳରେ ଏହି ଟ୍ରକ ଧକ୍କାରେ ଅନ୍ୟ ଏକ ହାତୀର ଦାନ୍ତ ଭାଙ୍ଗି ଯାଇଥିବାବେଳେ ସେ ଗୁରୁତର ହୋଇଥିବା ଜଣାପଡିଛି । ତେବେ ଦୁର୍ଘଟଣା ପରେ ହାତୀପଲ ପାଖ ଜଙ୍ଗଲକୁ ପଳାଇଥିବା ଜଣାପଡିଛି । ଆଜି ଭୋର ପ୍ରାୟ ସାଢ଼େ 5ଟା ସମୟରେ ଏହି ଦୁର୍ଘଟଣା ଘଟିଛି ।
ଖବର ପାଇ ବନ କର୍ମଚାରୀମାନେ ପହଞ୍ଚି ହାତୀର ମୃତଦେହ ଓ ରାସ୍ତାରେ ପଡିଥିବା ଦାନ୍ତ ଜବତ କରିଛନ୍ତି । ପରେ ସ୍ବତନ୍ତ୍ର ଡାକ୍ତରଙ୍କ ମାଧ୍ୟମରେ ହାତୀ ମୃତଦେହକୁ ବ୍ୟବଚ୍ଛେଦ କରି ପୋତି ଦେଇଛନ୍ତି । ଏସମ୍ପର୍କରେ ବନ ବିଭାଗ କିମ୍ବା ପୋଲିସ କେହି କୌଣସି ଉତ୍ତର ଦେବାକୁ ନାରାଜ । ତେବେ ଉକ୍ତ ସ୍ଥାନରେ ହାତୀପଲ ଗତ କିଛି ଦିନ ହେଲା ଉପଦ୍ରବ ଜାରି ରଖିଛନ୍ତି । ମାତ୍ର ବନବିଭାଗର ଅବହେଳାରୁ ଏପରି ଦୁର୍ଘଟଣା ଘଟିଛି ବୋଲି ଅଭିଯୋଗ ଉଠାଇଛନ୍ତି ସ୍ଥୀନାୟଲୋକେ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
