ଢେଙ୍କାନାଳ: ନିକଟରେ ସଦର ବନାଞ୍ଚଳର ପୋଡପଡା ଗ୍ରାମ ନିକଟରେ ଟ୍ରକ ଧକ୍କାରେ ଗୋଟିଏ ହାତୀ ମରିଥିବାବେଳେ ଅନ୍ୟ ଏକ ଗୁରୁତର ଦନ୍ତା ହାତୀକୁ ଏଯାଏଁ ଠାବ କରିପାରିନି ବନବିଭାଗ । ଏପରିସ୍ଥଳେ ଗୁରୁବାର ପୁଣି ପୋଡପଡା ଗ୍ରାମ ନିକଟସ୍ଥ ଟ୍ରେନ ଲାଇନ ପାଖରୁ ଏକ ହାତୀ ଛୁଆର ମୃତଦେହ ଠାବ କରାଯାଇଛି ।
ପୋଡପଡା ଗ୍ରାମ ନିକଟରେ ଯାଇଥିବା ପୂର୍ବତଟ ରେଳ ଲାଇନଠାରୁ ପ୍ରାୟ ଶହେ ମିଟର ଦୂରରେ ପଡିଛି ଏହି ହାତୀ ଛୁଆର ମୃତଦେହ। ମୃତ୍ୟୁର ସଠିକ କାରଣ ଜଣାନପଡିଥିଲେ ମଧ୍ୟ ଏହା ଟ୍ରେନ ଧକ୍କାରେ ମୃତ୍ୟୁ ଘଟିଥିବା ସନ୍ଦେହ କରାଯାଉଛି ।
ସ୍ଥାନୀୟ ଲୋକେ ଏହାଦେଖି ଘଟଣାସ୍ଥଳରେ ରୁଣ୍ଡ ହୋଇଥିଲେ । ମୃତ ହାତୀ ଛୁଆର ପାଟି ଓ ଶୁଣ୍ଢରେ ଗଭୀର କ୍ଷତ ହୋଇଥିବାରୁ ଏହା ଟ୍ରେନ ଧକ୍କା ଜନିତ ଦୁର୍ଘଟଣାରେ ମୃତ୍ୟୁ ବୋଲି ସନ୍ଦେହ କରାଯାଇଛି ।
ତେବେ ହାତୀ ଛୁଆର ବୟସ ୨ରୁ ୩ମାସ ହେବ ବୋଲି କୁହାଯାଉଛି । ଖବର ପାଇ ଘଟଣାସ୍ଥଳକୁ ସଦର ବନକର୍ମଚାରୀ ପହଞ୍ଚି ହାତୀ ଛୁଆର ମୃତ ଦେହ ଉଦ୍ଧାର କରିଛନ୍ତି । ଡାକ୍ତରୀ ଦଳ ମାଧ୍ୟମରେ ବ୍ୟବଚ୍ଛେଦ କରାଉଥିବାବେଳେ ଘଟଣାର ତଦନ୍ତ ଆରମ୍ଭ କରିଛନ୍ତି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
