ଢେଙ୍କାନାଳ: 5T ସଚିବ ଭିକେ ପାଣ୍ଡିଆନ ଆସନ୍ତା ୧୨ତାରିଖରେ ଢେଙ୍କାନାଳ ଜିଲ୍ଲା ପରଜଙ୍ଗ ବ୍ଲକ ଗସ୍ତ କାର୍ଯ୍ୟକ୍ରମ ରହିଛି । ତେବେ ଉକ୍ତ କାର୍ଯ୍ୟକ୍ରମକୁ ଦଦରାଘାଟି ବିସ୍ଥାପିତ ପ୍ରଜାମଞ୍ଚ ବିରୋଧ କରିଛି । ଦଦରାଘାଟି ବିସ୍ଥାପିତ ପ୍ରଜାମଞ୍ଚର ଦୀର୍ଘ ଦିନର ବିଭିନ୍ନ ଦାବିଗୁଡ଼ିକ ପୂରଣ ନହେଲେ କାର୍ଯ୍ୟକ୍ରମକୁ ବିରୋଧ କରାଯିବାକୁ ଚେତାବନୀ ଦେଇଛି ମଞ୍ଚ ।
ପ୍ରେସ୍ମିଟ୍ ମାଧ୍ୟମରେ ବିସ୍ଥାପିତ ପ୍ରଜାମଞ୍ଚ ସଭାପତି ଦିଲୀପ ନାଥ କହିଛନ୍ତି, "ଆସନ୍ତା ୧୨ତାରିଖ 5T ସଚିବ ଭିକେ ପାଣ୍ଡିଆନଙ୍କ ଢେଙ୍କାନାଳ ଜିଲ୍ଲା ପରଜଙ୍ଗ ବ୍ଲକ ଗସ୍ତ କାର୍ଯ୍ୟକ୍ରମ ରହିଛି । ତେବେ ଦୀର୍ଘ ଦିନ ଧରି ଦଦରାଘାଟି ବିସ୍ଥାପିତ ପ୍ରଜାମଞ୍ଚର ବିଭିନ୍ନ ମୌଳିକ ସମସ୍ୟାକୁ ନେଇ ସ୍ଥାନୀୟ ଲୋକପ୍ରତିନିଧି ଓ ଜିଲ୍ଲା ପ୍ରଶାସନଙ୍କୁ ଦାବି ଉପସ୍ଥାପନା କରିଥିଲେ ମଧ୍ୟ ଉଭୟ ଆଜି ପର୍ଯ୍ୟନ୍ତ କର୍ଣ୍ଣାପାତ କରୁନାହାନ୍ତି । ତେଣୁ ଗସ୍ତ ପୂର୍ବରୁ ଯଦି ଦାବି ପୂରଣ ପାଇଁ ପ୍ରଶାସନ କୌଣସି ବ୍ୟବସ୍ଥା କିମ୍ବା 5T ସଚିବଙ୍କୁ ଭେଟି ଦାବି ପତ୍ର ଦେବାକୁ ସୁଯୋଗ ଦିଆଯାଉ । ଯଦି ଦବି ଉପସ୍ଥାପନର ସୁଯୋଗ ନ ଦିଆଯାଏ ଶତାଧିକ ବିସ୍ଥାପିତ ପ୍ରଜା ଏକତ୍ରିତ ହୋଇ ତାଙ୍କ ଗସ୍ତଙ୍କୁ ଅଭିନବ ଉପାୟରେ ବିରୋଧ କରିବୁ ।"
ସେ ଆହୁରି ମଧ୍ୟ କହିଛନ୍ତି, "ଦୀର୍ଘ 42 ବର୍ଷ ଧରି ସରକାର ଆମକୁ ସ୍ଥାୟୀତ୍ବ ଦେବାର ପ୍ରତିଶ୍ରୁତି ଦେଇ ପ୍ରତାରଣ କରି ଆସୁଛନ୍ତି । ଘର ପଟ୍ଟା ସହ ଗୋଚର ଭୂମି, ଶ୍ମସାନ ଆଦିର ସ୍ଥାୟୀ ନକ୍ସା ପ୍ରଦାନ କରାଯାଇ ନାହିଁ । ସରକାରଙ୍କ ପାଖରେ ବାରମ୍ବାର ଦାବି କରୁ ଆସୁଥିଲେ ମଧ୍ୟ ସରକାର କର୍ଣ୍ଣପାତ କରୁ ନହାଁନ୍ତି । ତେଣୁ 5T ସଚିବ ଭିକେ ପାଣ୍ଡିଆନଙ୍କ ଢେଙ୍କାନାଳ ଗସ୍ତ ପୂର୍ବରୁ ସମସ୍ୟାର ସମାଧାନ କରିବାକୁ ଆମର ଦାବି ରହିଛି ।"
