ଢେଙ୍କାନାଳ: ଦୁର୍ଷ୍କମକାରୀକୁ ଗିରଫ କରିଛି ପୋଲିସ । ଢେଙ୍କାନାଳ ଜିଲ୍ଲା ମୁଖ୍ୟ ଡାକ୍ତରଖାନାରେ ଚିକିତ୍ସିତ ହେଉଥିବା ନାତୁଣୀ ପାଖକୁ ଆସିଥିବା ଜଣେ ବୃଦ୍ଧାଙ୍କୁ ଡାକିନେଇ ଦୁଷ୍କର୍ମ କରାଯାଇଥିବା ଲଜ୍ୟାଜନକ ଘଟଣାର ପର୍ଦାଫାସ କରିଛି ପୋଲିସ । ଏହି ଦୁଷ୍କର୍ମ ଘଟଣାର ତଦନ୍ତ କରୁଥିବା ଟାଉନ ପୁଲିସ ଡାକ୍ତରଖାନାର ସିସିଟିଭି ଫୁଟେଜ ଯାଞ୍ଚକରି ଘଟଣାର ଅଢେଇ ମାସ ପରେ ଅଭିଯୁକ୍ତ ଯୁବକକୁ ଗିରଫ କରିବାରେ ସକ୍ଷମ ହୋଇଛି ।
ଗିରଫ ଅଭିଯୁକ୍ତ ଜଣକ ହେଉଛନ୍ତି ଗୋବିନ୍ଦପୁର ଫାଣ୍ଡି ଅନ୍ତର୍ଗତ ମହୁଲପଡ଼ାରେ ଥିବା ଏକ ଶିଶୁଗୃହର କର୍ମଚାରୀ ଶିଶିର ମଲ୍ଲିକ ବୋଲି ଜଣାପଡିଛି । ସୂଚନାନୁଯାୟୀ ମହୁଲପଡାସ୍ଥିତ ଶିଶୁ ଗୃହରେ ରହୁଥିବା ନାତୁଣୀ ପାଖକୁ ଗଁନ୍ଦିଆ ଅଞ୍ଚଳର ଏହି ଦୁଷ୍କର୍ମ ପୀଡିତା ବୃଦ୍ଧା ଜଣଙ୍କ ଆସିଥିଲେ । ତେବେ ନାତୁଣୀର ଚିକିତ୍ସାପାଇଁ ଢେଙ୍କାନାଳ ମୁଖ୍ୟ ଡାକ୍ତରଖାନାରେ ଭର୍ତ୍ତି ହୋଇଥିବା ଖବର ପାଇ ବୃଦ୍ଧା ଜଣଙ୍କ ଡାକ୍ତରଖାନାରେ ଆସି ନାତୁଣୀ ପାଖରେ ରହିଥିଲେ । ଗତ ଏପ୍ରିଲ ୨୮ ତାରିଖ ରାତିରେ ଅଭିଯୁକ୍ତ ଶିଶିର ବୃଦ୍ଧାଙ୍କୁ ଚଞ୍ଚକତାର ସହ ଡାକି ନେଇଥିଲେ ।
ଡାକ୍ତରଖାନା ଠାରୁ ଏକ କିଲୋମିଟର ଦୂର ବାଇକରେ ନେଇ ଏକ ନିଛାଟିଆ ଜାଗାରେ ବୃଦ୍ଧାଙ୍କୁ ଦୁଷ୍କର୍ମ କରି ଛାଡି ପଲାଇଥିଲା ଶିଶିର । ପରେ ମୁର୍ମୁଷୁ ଅବସ୍ଥାରେ ବୃଦ୍ଧା ଜଣଙ୍କ ଡାକ୍ତରଖାନାକୁ ଆସିବାପରେ ଘଟଣା ପୋଲିସ ସାମ୍ନାକୁ ଆସିଥିଲା । ଫଳରେ ଡାକ୍ତରଖାନା ସିସିଟିଭି ଫୁଟେଜକୁ ଆଧାର କରି ଟାଉନ ପୁଲିସ ଘଟଣାର ତଦନ୍ତ ପରେ ଶିଶିରକୁ କାବୁ କରିବାରେ ସକ୍ଷମ ହୋଇଥିବା ନେଇ ଢେଙ୍କାନାଳ ଏସଡିପିଓ ପ୍ରକାଶ କରିଛନ୍ତି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
