ଢେଙ୍କାନାଳ: ଅଧାରେ ଅଟକିଛି NH-୫୫ ସଂପ୍ରସାରଣ । କାମ ଅଧାକରି ଠିକାଦାରଙ୍କ ଦେଖାନଥିବାବେଳେ ଧୂଳିରେ ଅଣନିଶ୍ବାସୀ ଲୋକଙ୍କ ଅସନ୍ତୋଷ ଆନ୍ଦୋଳନର ରୂପ ନେଇଛି । ସ୍ଥାନୀୟ ଲୋକେ ସହର ଉପକଣ୍ଠ କାଠଗଡା ଠାରେ NH-୫୫ ଅବରୋଧ କରିଛନ୍ତି । ଫଳରେ ଏହି ରାସ୍ତାରେ ଦୀର୍ଘ ଦୁଇଘଣ୍ଟା କାଳ ଯାତାୟତ ଠପ୍ ହୋଇଯାଇଛି ।
ମଙ୍ଗୁଳି ଠାରୁ ଅନୁଗୁଳ NH-୫୫ର ଚାରିଥାକିଆ ସଂପ୍ରସାରଣ(Expansion) କାର୍ଯ୍ୟ ନେଇଥିବା ଠିକାସଂସ୍ଥା ଗାୟତ୍ରୀ କନ୍ଷ୍ଟ୍ରକ୍ସନର ମନମାନୀ ନେଇ ସ୍ଥାନୀୟ ଲୋକେ ନାକେଦମ୍ ହେଲେଣି । ସଂପ୍ରସାରଣ କାର୍ଯ୍ୟପାଇଁ ରାସ୍ତାକୁ ଖୋଳି ଦିଆଯାଇଥିବାବେଳେ ଗତ କିଛି ଦିନ ହେଲା ଏହି ଠିକା ସଂସ୍ଥାର ଆଉ ଦେଖାନଥିବା ଲୋକେ ଅଭିଯୋଗ କରିଛନ୍ତି ।
ଏହାମଧ୍ୟ ପଢନ୍ତୁ: Dhenkanal Covid Update: ସାଇ କୃପା କଲେଜ ସମେତ ୩ ହଷ୍ଟେଲ ସିଲ୍
ଫଳରେ ରାସ୍ତା ଅଧାପନ୍ତରିଆ ହୋଇ ପଡିରହିଛି । ଯାହା ଫଳରେ ଢେଙ୍କାନାଳ କଲେଜ ବାଏ ପାସ୍, ଆନନ୍ଦ ନଗର, କାଠଗଡା ଆଦି ଲୋକମାନେ ନାହିଁ ନଥିବା ସମସ୍ୟାରେ ପଡୁଛନ୍ତି । ରାସ୍ତା ବିପର୍ଯ୍ୟସ୍ତ ସାଙ୍ଗକୁ ଧୂଳି ଉଡିବା ଲୋକଙ୍କୁ ଅତିଷ୍ଠ କରିଛି ଫଳରେ ସ୍ଥାନୀୟ ଲୋକେ ସମ୍ପୂର୍ଣ୍ଣ ଅଣବିଶ୍ବାସୀ ହୋଇପଡିଛନ୍ତି ।
ପ୍ରତିକ୍ରିୟା ରୂପେ ଆଜି(ଗୁରୁବାର) ସ୍ଥାନୀୟ କାଠଗଡା ବାସିନ୍ଦା କାଠଗଡା ଠାରେ NH-୫୫କୁ ଅବରୋଧ କରି ପ୍ରତିକାର ଦାବି କରିଛନ୍ତି । ଫଳରେ ଏହି ଜାତୀୟ ରାଜପଥ ସଂଯୋଗ କରୁଥିବା ରାଜ୍ୟର ପ୍ରମୁଖ ବାଣିଜ୍ୟ କେନ୍ଦ୍ର କଟକ ଓ ସମ୍ବଲପୁର ମଧ୍ୟରେ ଦୀର୍ଘ ଦୁଇଘଣ୍ଟା ଧରି ଯାତାୟାତ ଠପ୍ ହୋଇଯାଇଥିଲା । ଉଭୟ ପାର୍ଶ୍ବରେ ଶହ ଶହ ଗାଡି ମଟର ଅଟକି ରହିଥିଲା । ଖବର ପାଇ ସ୍ଲଲ ଟାଉନ୍ ପୁଲିସ ପହଞ୍ଚି ଲୋକଙ୍କୁ ବୁଝାସୁଝା କରିବାପରେ ରାସ୍ତାରୋକରୁ ଲୋକମାନେ ହଟିଥିବା ଜଣାପଡିଛି ।
ଢେଙ୍କାନାଳରୁ ଉର୍ମୀଳା ପାତ୍ର, ଇଟିଭି ଭାରତ
