ଢେଙ୍କାନାଳ: ଜିଲ୍ଲା ନିହଲ ପ୍ରସାଦ ଖଙ୍କିରା ଶିଶୁ ମୃତ୍ୟୁ ଘଟଣାର ପର୍ଦ୍ଦାଫାସ । ସମ୍ପର୍କୀୟ ପଡୋଶୀ ଭିଆଇଛନ୍ତି ହତ୍ୟାକାଣ୍ଡ । ପାରିବାରିକ ଶତ୍ରୁତାକୁ କେନ୍ଦ୍ର କରି ଶିଶୁର ତଣ୍ଟି ଚିପି ହତ୍ୟା ପରେ କୂଅକୁ ଫୋପାଡିଥିଲା । ଘଟଣା ସାମାନାକୁ ଆସିବା ପରେ ଉକ୍ତ ମହିଳାଙ୍କୁ ଗିରଫ କରି କୋର୍ଟ ଚାଲାଣ କରିଛି ନିହଲ ପ୍ରସାଦ ପୋଲିସ । ଏପରି ଜଘନ୍ୟ କାଣ୍ଡ ଘଟାଇଥିବା ମହିଳାଙ୍କୁ ଫାଶୀ ଦେବାକୁ ପରିବାର ଓ ଗ୍ରାମବାସୀ ଦାବି କରିଛନ୍ତି ।
ଢେଙ୍କାନାଳ ଜିଲ୍ଲା ନିହଲ ପ୍ରସାଦ ଥାନା ଅନ୍ତର୍ଗତ ଖଙ୍କିରା ଗ୍ରାମର ଚନ୍ଦନ ସାହୁଙ୍କ ତିନି ବର୍ଷର ପୁଅ କାଳିଆ ମୃତ୍ୟୁ ଘଟଣାର ତଦନ୍ତ କରି ନିହଲ ପ୍ରସାଦ ପୋଲିସ ରହସ୍ୟର ପର୍ଦ୍ଦାଫାସ କରିଛି । ଶବ ବ୍ୟବଚ୍ଛେଦ ରିପୋର୍ଟରୁ ଏହା ହତ୍ୟାକାଣ୍ଡ ବୋଲି ଜଣାପଡିଛି । ଫଳରେ ଏପରି ଜଘଣ୍ୟ ହତ୍ୟାକାଣ୍ଡ ଘଟାଇଥିବା ହତ୍ୟା ଅଭିଯୁକ୍ତ ଉକ୍ତ ଗ୍ରାମର ଭାରତୀ ସାହୁ ନାମକ ମହିଳାଙ୍କୁ ପୋଲିସ ଗିରଫ କରିଛି ।
ଗତ ବୁଧବାର ଅପରାହ୍ନରେ ଗାଁ ଦାଣ୍ଡରେ କାଳିଆ ଖେଳୁଥିବା ବେଳେ ହଠାତ ଗାଏବ ହୋଇଯାଇଥିଲା । ଆଉ ତା ପରଦିନ ଘର ଠାରୁ ଶହେ ମିଟର ଦୂର ହତ୍ୟା ଅଭିଯୁକ୍ତ ଭାରତୀ ସାହୁଙ୍କ କୂଅରୁ କାଳିଆଙ୍କ ମୃତଦେହକୁ ଉଦ୍ଧାର କରାଯାଇଥିଲା । ତେବେ ମୃତ ଶିଶୁ କାଳିଆର ପରିବାର ଓ ଭାରତୀ ସାହୁଙ୍କ ପରିବାର ମଧ୍ୟରେ ପୁର୍ବରୁ ଶତ୍ରୁତା ଥିଲା । ଭାରତୀ ତାଙ୍କ ପୁଅକୁ ତଣ୍ଟି ଚିପି ମାରିଦେବାକୁ ଧମକ ମଧ୍ୟ ଦେଇଥିଲେ । ଫଳରେ କାଳିଆର ଏପରି ମୃତ୍ୟୁକୁ ନେଇ ଭାରତୀ ହତ୍ୟା କରି କୂଅରେ ପକାଇଥିବା ଶିଶୁର ପରିବାର ମଧ୍ୟ ଅଭିଯୋଗ କରିଥିଲେ । ଏପରିସ୍ଥଳେ ଶିଶୁର ଶବ ବ୍ୟବଚ୍ଛେଦ ରିପୋର୍ଟରୁ ଶିଶୁ ମୃତ୍ୟୁର ପର୍ଦ୍ଦାଫାସ ହୋଇଛି ।
ଏପରିକି କାଳିଆକୁ ତଣ୍ଟି ଚିପି ହତ୍ୟା ପରେ କୂଅରେ ପକାଇଦେଇଥିବା ଅଭିଯୁକ୍ତ ଭାରତୀ ସ୍ବୀକାର କରିଥିବା ପୋଲିସ ସୂଚନା ଦେଇଛି । ହତ୍ୟା ଘଟଣା ପର୍ଦ୍ଦାଫାସ ପରେ ଖଙ୍କିରା ଗ୍ରାମବାସୀଙ୍କ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ଏକ ନିଷ୍ପାପ ଶିଶୁକୁ ଏପରି ନିର୍ଦୟ ଭାବେ ହତ୍ୟା କରିଥିବା ଭାରତୀଙ୍କୁ ଫାଶୀ ଦିଆଯାଉ ବୋଲି ପରିବାର ତଥା ଗ୍ରାମବାସୀ ଦାବି କରିଛନ୍ତି । ଏବେ ଶିଶୁ ହତ୍ୟା ଅଭିଯୋଗରେ ଭାରତୀ ସାହୁଙ୍କୁ ଗିରଫ କରି କୋର୍ଟ ଚାଲାଣ କରିଛି ନିହଲ ପ୍ରସାଦ ପୋଲିସ । ତେବେ ଜଣେ ମହିଳା ହୋଇ ଏକ ତିନି ବର୍ଷର ନିଷ୍ପାପ ଶିଶୁର ତଣ୍ଟି ଚିପି ଏପରି ଜଘନ୍ୟ ଭାବେ ହତ୍ୟା କରିଥିବା ଘଟଣା ସମ୍ପୃକ୍ତ ଅଂଚଳରେ ଚାଞ୍ଚଲ୍ୟ ଖେଳିଯାଇଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
