ଢେଙ୍କାନାଳ: କୋରୋନାକୁ ସାଥିରେ ଧରି ଢେଙ୍କାନାଳ ସହର ପରିକ୍ରମା କରିଛନ୍ତି ଯମରାଜ । ମହାମାରୀ କୋରୋନାର ଭୟାଭୟତା ସମ୍ପର୍କରେ ଜନସାଧାରଣଙ୍କୁ ସଚେତନତା କରିବାକୁ ଢେଙ୍କାନାଳ ଯୁବ ବିଜେଡି ଏଭଳି ନିଆରା ପ୍ରୟାସ କରିଛି । କୋରୋନା ଓ ଯମରାଜ ବେଶରେ ଯୁବ ବିଜେଡି କର୍ମୀମାନେ ସହର ପରିକ୍ରମା ସହ ମାସ୍କ ବଣ୍ଟନ କରିଛନ୍ତି ।
ସେହିପରି କୋରୋନା ଆସିଲେ କିପରି ଯମରାଜ ଆସନ୍ତି ସେ ସମ୍ପର୍କରେ ନାଟକୀୟ ଢଙ୍ଗରେ ଲୋକମାନଙ୍କୁ ବୁଝାଇଛନ୍ତି ଯୁବ ବିଜେଡି । ଏହି ଅବସରରେ ଢେଙ୍କାନାଳ ବିଧାୟକ ସୁଧୀର ସାମଲ ଯୋଗ ଦେଇ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ ।
ସହରର ରଥଗଡ଼ାଠାରୁ ବିଜେଡି କର୍ମୀ ଦେବାଶିଷ ମିଶ୍ର ଯମରାଜ ଓ ବିନୋଦ ମହାନ୍ତି କୋରୋନା ବେଶ ଧାରଣ କରି ସହରରେ ଲୋକମାନଙ୍କୁ ସଚେତନ କରିବା ସହ ମାସ୍କ ବାଣ୍ଟୁଥିବା ଦେଖିବାକୁ ମିଳିଥିଲା । କିପରି ସାମାଜିକ ଦୂରତା ରଖିବା ସହ ଘରୁ କୋରୋନା ମହାମାରୀକୁ ପ୍ରତିହତ କରିବା ପାଇଁ ସମ୍ମିଳିତ ଉଦ୍ୟମ ଆବଶ୍ୟକ ସେ ସମ୍ପର୍କରେ ବୁଲି ବୁଲି ବୁଝାଉଥିଲେ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
