ଢେଙ୍କାନାଳ: ସାମାନ୍ୟ ବଚସାରୁ ଯୁବକଙ୍କୁ ମରଣାତ୍ମକ ଆକ୍ରମଣ । ଢେଙ୍କାନାଳ ଜିଲ୍ଲା କାମାକ୍ଷାନଗର ଥାନା ଅନ୍ତର୍ଗତ କାଦୁଆ ଗ୍ରାମରେ ଅଭାବନୀୟ ଘଟଣା ଦେଖିବାକୁ ମିଳିଛି । ଆକ୍ରମଣରେ ଜଣେ ଯୁବକଙ୍କୁ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି କରାଯାଇଛି ।
ସୂଚନା ମୁତାବକ, ରବିବାର ରାତି ପ୍ରାୟ ୧୦ଟା ସମୟରେ କାଦୁଆ ଗ୍ରାମର କାଳିଆ ଦେହୁରି ଗାଁ ମୁଣ୍ଡରେ ଠିଆ ହୋଇଥିବା ବେଳେ ଗ୍ରାମର କରୁଣା,ବିକାଶ,ପାଗେଳା ଓ ଭରତ ଉଭୟଙ୍କ ମଧ୍ୟରେ ଅଶ୍ଲୀଳ ଭାଷାରେ ଗାଳିଗୁଲଜ ହେଉଥିଲେ । କାଳିଆ ବାରଣ କରିବାରୁ ସେମାନେ ତାଙ୍କ ସହ ବଚସା କରିଥିଲେ ଏବଂ ସଂଘବଦ୍ଧ ଭାବେ ଆକ୍ରମଣ କରିଥିଲେ । ଏହା ଦେଖି କାଳିଆଙ୍କ ପୁତୁରା ନବୀନ ଦେହୁରି ଉଦ୍ଧାର କରିବାକୁ ଦୌଡି ଆସିଥିଲେ । ଦାଦାଙ୍କ ବଞ୍ଚାଇବା ବେଳେ ୪ ଜଣ ମିଶି ନବୀନଙ୍କୁ ଟାଙ୍ଗିଆରେ ହାଣି ପକାଇଥିଲେ । ନବୀନର ପିଠି,ଛାତି ଓ ହାତରେ ଗଭୀର ଆଘାତ ଲାଗିଛି । ପରିବାର ଲୋକେ ତାଙ୍କୁ ଉଦ୍ଧାର କରି କାମାକ୍ଷାନଗର ମେଡିକାଲରେ ଭର୍ତ୍ତି କରିଛନ୍ତି । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଚଳାଇଛି ।
ଇଟିଭି ଭାରତ, ଢେଙ୍କାନାଳ
