ଢେଙ୍କାନାଳ: ଘରେ ପଶି ଚୋରି କରିବାକୁ ଉଦ୍ୟମବେଳେ ବନ୍ଧାହେଲେ ଯୁବକ । ସୂଚନାନୁଯାୟୀ ଘରେ ପଶି ଚୋରି କରିବାକୁ ଉଦ୍ୟମ କରୁଥିବାବେଳେ ଅଭିଯୁକ୍ତକୁ ଗଛରେ ବାନ୍ଧିଲେ ଗ୍ରାମବାସୀ । ଅଭିଯୋଗକାରୀଙ୍କ ସୂଚନାନୁସାରେ ଯୁବକ ଜଣକ ହେଉଛନ୍ତି ପରଜଙ୍ଗ ଥାନା ଅଧିନ ସାଆନ୍ଦା ଫାଣ୍ଡି ଖଇରପଶି ଗ୍ରାମର ପିଙ୍କୁନ ପାଣି ।
ତେବେ ଗତକାଲି ବିଳମ୍ବିତ ରାତିରେ ନୂଆବତାସିଂହ ଗ୍ରାମର ରତ୍ନାକର ନାୟକଙ୍କ ପରିବାର ଲୋକେ ଶୋଇଥିବା ବେଳେ ଯୁବକ ଜଣକ ତାଙ୍କ ଘରେ ପଶି ଚୋରି କରୁଥିଲେ । ହେଲେ ହଠାତ ରତ୍ନାକରଙ୍କ ନିଦ ଭାଙ୍ଗି ଯିବାରୁ କୌଶଳ କ୍ରମେ ପରିବାରର ସମସ୍ତ ସଦସ୍ୟ ମିଶି ସଂପୃକ୍ତ ଯୁବକକୁ ଘରେ ଅଟକ ରଖିବା ସହ ଗ୍ରାମବାସୀଙ୍କୁ ଖବର ଦେଇଥିଲେ ।
ତେବେ ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚିବା ସମୟରେ ଯୁବକ ଜଣକ ଖସି ପଳାଇବାକୁ ଚେଷ୍ଟା କରୁଥିବାବେଳେ ତାକୁ ଗ୍ରାମବାସୀ କାବୁ କରିଛନ୍ତି । ପରେ ଅଭିଯୁକ୍ତକୁ ନିକଟସ୍ଥ ଆମ୍ବଗଛରେ ବାନ୍ଧିବା ସହ ପୋଲିସକୁ ଖବର ଦେଇଥିଲେ । ତେବେ ଖବର ପାଇ ଘଟଣାସ୍ଥଳରେ ସାଆନ୍ଦା ଫାଣ୍ଡି ପୋଲିସ ପହଞ୍ଚି ଯୁବକକୁ ଉଦ୍ଧାର କରିବା ସହ ଅଟକ ରଖି ଅଧିକ ପଚରାଉଚୁରା ଜାରି ରଖିଥିବାବେଳେ ଚୋରିରେ ବ୍ୟବହୃତ ବାଇକକୁ ଜବତ କରି ଅଧିକ ତଦନ୍ତ ଚଳାଇଛି ପୋଲିସ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
