ଦେବଗଡ: ସରକାରଙ୍କ ସ୍ୱଚ୍ଛ ମିଶନ ଅନ୍ତର୍ଗତ ବାହ୍ୟ ମଳମୁକ୍ତ ସହର ଭାବେ ଘୋଷିତ ହୋଇଛି ଦେବଗଡ଼ ପୌରାଞ୍ଚଳ । ମାତ୍ର ଦେବଗଡ଼ ପୌରାଞ୍ଚଳ ଅଧିନରେ ଥିବା ଛଅ ନମ୍ବର ୱାର୍ଡ ହାତିଶାଳ ସାହି ସ୍ଥିତ ପ୍ରକଳ୍ପ ପ୍ରାଥମିକ ବିଦ୍ୟାଳୟର ପରିମଳ ଅବସ୍ଥା ଦେଖିଲେ ସରକାରଙ୍କ ଏହି ଘୋଷଣା କେବଳ କାଗଜପତ୍ରରେ ସୀମିତ ବୋଲି ମନେ ହେଉଛି ।
ବାହ୍ୟ ମଳମୁକ୍ତ ସହର ଭାବେ ଘୋଷଣା ହୋଇଛି ଦେବଗଡ଼ ସହର । ମାତ୍ର ବାସ୍ତବ ସ୍ଥିତି ଯେ ସମ୍ପୂର୍ଣ୍ଣ ଅଲଗା ତାହା ଦେଖିବାକୁ ମିଳିଛି ଦେବଗଡ଼ ପୌରାଞ୍ଚଳ ଅନ୍ତର୍ଗତ ପ୍ରକଳ୍ପ ପ୍ରାଥମିକ ବିଦ୍ୟାଳୟରେ । ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ଥିବା ଏହି ପ୍ରାଥମିକ ବିଦ୍ୟାଳୟରେ ଅଧ୍ୟୟନ କରୁଛନ୍ତି ୪୬ ଜଣ ଛାତ୍ରଛାତ୍ରୀ । ଏହି ବିଦ୍ୟାଳୟର ପରିବେଶ ପାଲଟିଛି ଅତ୍ୟନ୍ତ ଅସ୍ୱାସ୍ଥ୍ୟକର । ବିଦ୍ୟାଳୟ ଚତୁଃପାର୍ଶ୍ଵ ସହରର ଅଳିଆ ଆବର୍ଜନାରେ ଭର୍ତ୍ତି ହୋଇ ପଡ଼ିଥିବା ବେଳେ ବିଦ୍ୟାଳୟ ପରିସରରେ ଖୋଲିଖୋଲି ଭାବେ ମଳତ୍ୟାଗ କରୁଛନ୍ତି ଲୋକେ । ଫଳରେ ବିଦ୍ୟାଳୟ ପରିସର ଅତ୍ୟନ୍ତ ଦୁର୍ଗନ୍ଧମୟ ଓ ପ୍ରଦୂଷିତ ହୋଇପଡ଼ିଛି ।
ଏଭଳି ଅସ୍ୱାସ୍ଥ୍ୟକର ପରିବେଶରେ ଅଧ୍ୟୟନ କରିବାକୁ ବାଧ୍ୟ ହେଉଛନ୍ତି କୋମଳମତି ଛାତ୍ରଛାତ୍ରୀ । ବର୍ଯ୍ୟଜଳ ନିଷ୍କାସନ ପାଇଁ ବିଦ୍ୟାଳୟ ସମ୍ମୁଖରେ ଥିବା ଡ୍ରେନ ବର୍ଷ ବର୍ଷ ଧରି ଆବର୍ଜନାରେ ଭର୍ତ୍ତି ହୋଇ ପଡିଛି । ବିଦ୍ୟାଳୟରେ ପାଚେରୀ ନଥିବାରୁ ବିଦ୍ୟାଳୟ ପରିସରରେ ବାହାର ଲୋକେ ଅନାୟସରେ ପ୍ରବେଶ କରି ଏହାର ପରିବେଶକୁ ଅପରିଷ୍କାର କରିଚାଲିଛନ୍ତି ।
ବିଦ୍ୟାଳୟରେ ପାଚେରୀ ଦିଆଯିବା ସହ ବିଦ୍ୟାଳୟ ପରିସରକୁ ସହରର ବର୍ଯ୍ୟଜଳ ଛଡା ନଯିବାକୁ ବିଦ୍ୟାଳୟ କର୍ତ୍ତୃପକ୍ଷଙ୍କ ସମେତ ପରିଚାଳନା କମିଟି ବାରମ୍ବାର ବିଭାଗୀୟ କର୍ତ୍ତୃପକ୍ଷ ଓ ଜିଲ୍ଲା ପ୍ରଶାସନକୁ ଜଣାଇ ଆସୁଥିଲେ ସୁଦ୍ଧା କୌଣସି ସୁଫଳ ମିଳିପାରୁନାହିଁ । ଗୋଟିଏ ପକ୍ଷରେ ଜିଲ୍ଲା ପ୍ରଶାସନ ଦେବଗଡ଼ ସହରକୁ ସୁସ୍ଥ ,ସ୍ୱଚ୍ଛ ଓ ସୁନ୍ଦର କରି ଗଢିତୋଳିବାକୁ ବିଭିନ୍ନ କାର୍ଯ୍ୟକ୍ରମ ହାତକୁ ନେଇଥିବା ବେଳେ ଏକ୍ଷେତ୍ରରେ ତାହାର କୌଣସି ପ୍ରଭାବ ପରିଲକ୍ଷିତ ହେଉନାହିଁ । ଏ ସମ୍ପର୍କରେ ଦେବଗଡ଼ ଜିଲ୍ଲା ଶିକ୍ଷାଧିକାରୀ ପ୍ରଦୋଷ କୁମାର ନାୟକଙ୍କ ଦୃଷ୍ଟି ଆକର୍ଷଣ କରିବାରୁ ସେ ଏହାକୁ ସ୍ୱୀକାର କରିବା ସହିତ ବିଦ୍ୟାଳୟ ପରିସରରେ ଖୁବ ଶୀଘ୍ର ପାଚେରୀ ନିର୍ମାଣ ପାଇଁ ବ୍ୟବସ୍ଥା କରାଯିବ ବୋଲି କହିଛନ୍ତି ।
ଦେବଗଡରୁ ସରୋଜ କୁମାର ଶତପଥି,ଇଟିଭି ଭାରତ
