ଅନୁଗୋଳ: ଏବେ ସାରା ବିଶ୍ବ କୋରୋନା ଭୟରେ ଆତଙ୍କିତ । ଦିନକୁ ଦିନ ଦେଶରେ ଭୟରୁ ଅତିଭୟଙ୍କର ରୂପ ଧାରଣ କରୁଛି ଏହି ମହାମାରୀ । ସେଥିପାଇଁ ଦେଶବ୍ୟାପୀ ଲକଡାଉନ ଘୋଷଣା କରିଛନ୍ତି ସରକାର । ଏଭଳି ସ୍ଥିତିରେ ବାହାର ରାଜ୍ୟରୁ କାମ କରି ଘରକୁ ଫେରୁଥିବା 5ଜଣ ଶ୍ରମିକଙ୍କୁ ଗ୍ରାମ ଭିତରକୁ ପ୍ରବେଶ କରିବାକୁ ଦେଉ ନାହାଁନ୍ତି ଗାଁ ଲୋକେ । ଲକ ଡାଉନ ସତ୍ତ୍ୱେ ନିଜ ଗାଁରୁ ବାହାର ରାଜ୍ୟକୁ ଯାଇଥିବା ଶ୍ରମିକ ମାନେ ବହୁ ବାଧା ବିଘ୍ନ ଦେଇ ନିଜ ଘରକୁ ଚାଲି ଚାଲି ଫେରୁଛନ୍ତି । ହେଲେ କୋରନା ଭୟରେ ଏବେ ସେମାନେ ବାସନ୍ଦ ହୋଇ ଗାଁ ମୁଣ୍ଡରେ ନଦୀ ପଠାରେ ଭୋକ ଉପାସରେ ପଡ଼ି ରହୁଛନ୍ତି ଏବଂ ଏମାନଙ୍କ ଦୁଃଖ ବୁଝିବାକୁ ସତେ ଯେମିତି କେହି ନାହାନ୍ତି । ଏଭଳି ଦୃଶ୍ୟ ଦେଖିବାକୁ ମିଳିଛି ଦେବଗଡ଼ ଜିଲ୍ଲା ବାରକୋଟ ବ୍ଲକ ସାରୁଆଳି ପଂଞ୍ଚାୟତର ଟାଇଁସିରା ଗାଁରେ ।
ଗାଁର 5 ଜଣ ଯୁବକ କଲିକତାରେ ଏକ ଘରୋଇ କମ୍ପାନୀରେ କାମ କରୁଥିଲେ । ଲକଡାଉନ କାରଣରୁ କାରଖାନା ସବୁ ବନ୍ଦ ହୋଇଯିବାରୁ ସେମାନଙ୍କୁ କାରଖାନା ପକ୍ଷରୁ ଘରକୁ ଚାଲିଯିବା ପାଇଁ ନିର୍ଦ୍ଦେଶ ଦିଆଯାଇଥିଲା । ହେଲେ ଗାଁରେ ପହଞ୍ଚିବାବେଳକୁ ଗ୍ରାମବାସୀ ମାନେ ଏମାନଙ୍କୁ କରୋନା ଭୟରେ ଗାଁକୁ ପୁରାଇ ଦେଇନଥିଲେ ଏବଂ ଏମାନଙ୍କୁ ନିଆଁ ପାଣି ବନ୍ଦ କରିବା ସହ ଗ୍ରାମରେ ଥିବା ନଦୀ ଏବଂ ପୋଖରୀର ପାଣି ବ୍ୟବହାର ଉପରେ ମଧ୍ୟ କଟକଣା ଲଗାଇଥିଲେ । ଫଳରେ ଦୀର୍ଘ 6 ଦିନ ହେବ ଏହି 5 ଜଣ ଯୁବକ ଦୁଃଖ କଷ୍ଟରେ ଏଠାରେ ପଡି ରହିଛନ୍ତି । ଏ ସମ୍ପର୍କରେ ସ୍ଥାନୀୟ ପଞ୍ଚାୟତ କର୍ତ୍ତୃପକ୍ଷ, ବରକୋଟ ବ୍ଲକ ପ୍ରଶାସନ କିମ୍ବା ଦେବଗଡ଼ ଜିଲ୍ଲା ପ୍ରଶାସନ କୌଣସି ପଦକ୍ଷେପ ନେଉନଥିବା ଅଭିଯୋଗ ହୋଇଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
