ଦେବଗଡ: କୋମାରେ ପଡିଛି ରେଙ୍ଗାଳବେଡା ଭ୍ରାମ୍ୟମାଣ ସ୍ୱାସ୍ଥ୍ୟକେନ୍ଦ୍ର । ନା ଏଠାରେ ଅଛନ୍ତି ଡାକ୍ତର, ନା ଅଛି ଔଷଧ । ଦୀର୍ଘବର୍ଷ ହେଲା ଏଠାରେ ସବୁକିଛି ଯେପରି ଠପ ହୋଇପଡିଛି । ସେପଟେ, ସ୍ବାସ୍ଥ୍ୟସେବା ପାଇବାରୁ ବଞ୍ଚିତ ହୋଇ ଆସୁଛନ୍ତି ଛଅଟି ପଞ୍ଚାୟତର 30 ହଜାରରୁ ଊର୍ଦ୍ଧ୍ବ ଜନସାଧାରଣ ।
ରେଙ୍ଗାଲି ନଦୀବନ୍ଧ ଯୋଜନା ଦ୍ୱାରା ବିସ୍ଥାପିତ ହୋଇଥିବା ଲୋକଙ୍କୁ ସ୍ବାସ୍ଥ୍ୟସେବା ଯୋଗାଇଦେବା ଲକ୍ଷରେ ସରକାରଙ୍କ ଜଳସମ୍ପଦ ବିଭାଗ ପକ୍ଷରୁ ଦେବଗଡ଼ ଜିଲ୍ଲା ରିଆମାଳ ବ୍ଲକ ଗୁଣ୍ଡିଆପାଲି ପଞ୍ଚାୟତର ରେଙ୍ଗାଳବେଡା ଠାରେ ସ୍ଥାପନ କରାଯାଇଥିଲା ଏକ ଭ୍ରାମ୍ୟମାଣ ସ୍ୱାସ୍ଥ୍ୟକେନ୍ଦ୍ର ।
ଏହି ସ୍ୱାସ୍ଥ୍ୟକେନ୍ଦ୍ରଟି କିଛି ବର୍ଷ ଚାଲିବା ପରେ ଆଜକୁ ଦୀର୍ଘ ବର୍ଷ ହେବ ବନ୍ଦ ହୋଇପଡିଛି । ନା ଏଠାରେ ଅଛନ୍ତି ଡାକ୍ତର, ନା ଏଠାରୁ ମିଳୁଛି ଔଷଧ । ସ୍ୱାସ୍ଥ୍ୟକେନ୍ଦ୍ର ଅବସ୍ଥା ନକହିଲା ଭଲ । ଘର ଖଣ୍ଡିକ ଭାଙ୍ଗିରୁଜି ପରିତ୍ୟକ୍ତ ଅବସ୍ଥାରେ ପଡିରହିଛି । ଏହି ଭ୍ରାମ୍ୟମାଣ ସ୍ୱାସ୍ଥ୍ୟକେନ୍ଦ୍ରଟିକୁ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ପରିବର୍ତ୍ତିତ କରି ଲୋକଙ୍କୁ ସ୍ବାସ୍ଥ୍ୟସେବା ଯୋଗାଇ ଦେବା ଲକ୍ଷ୍ୟରେ ସରକାର ଗତ 2012 ମସିହାରେ ଏହାକୁ ଜଳସମ୍ପଦ ବିଭାଗରୁ ସ୍ୱାସ୍ଥ୍ୟ ବିଭାଗକୁ ହସ୍ତାନ୍ତର କରି ସାରିଛନ୍ତି ।
ଏଥିପାଇଁ ସ୍ୱାସ୍ଥ୍ୟ ବିଭାଗ ପକ୍ଷରୁ ଗତ 2013 ମସିହାରେ ସମସ୍ତ ପ୍ରକ୍ରିୟା ମଧ୍ୟ ସରିଛି । ମାତ୍ର ବିଡମ୍ବନାର ବିଷୟ ଯେ, ଆଜକୁ ଦୀର୍ଘବର୍ଷ ହେଲା ଏ ସମସ୍ତ ପ୍ରକ୍ରିୟା ସରକାରୀ ଶୀତଳଭଣ୍ଡାରରେ ପଡିରହିଛି । ଏହାକୁ କାର୍ଯ୍ୟକ୍ଷମ କରିବା ଦିଗରେ ବିଭାଗୀୟ ତତ୍ପରତା ପ୍ରକାଶ ପାଉନାହିଁ । ଫଳରେ ସ୍ବାସ୍ଥ୍ୟସେବା ପାଇବାକୁ ଆଶା ବାନ୍ଧି ବସିଥିବା ଅଞ୍ଚଳବାସୀଙ୍କ ଆଶା ମଉଳି ଯିବାକୁ ବସିଛି । ସରକାରଙ୍କ ପ୍ରସ୍ତାବିତ ଏହି ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରଟି କେବେ କାର୍ଯ୍ୟକ୍ଷମ ହେଉଛି ଓ ଲୋକେ କେବେ ସ୍ବାସ୍ଥ୍ୟସେବା ପାଉଛନ୍ତି, ତାହା ଦେଖିବାକୁ ବାକିରହିଲା ।
ଦେବଗଡ଼ରୁ ସରୋଜ ଶତପଥି, ଇଟିଭି ଭାରତ
