ଦେବଗଡ଼: ବାରକୋଟ ଥାନା ଅନ୍ତର୍ଗତ ଖୁଲୁଣ୍ଡୀପାଣି ଗାଁ ନିକଟସ୍ଥ ଜଙ୍ଗଲରେ ଚାଲିଥିବା ଏକ ଜୁଆ ଆଡ୍ଡା ଉପରେ ବାରକୋଟ ପୋଲିସ ଅତର୍କିତ ଚଢ଼ାଉ କରିଛି । ଘଟଣା ସ୍ଥଳରୁ 2 ଜୁଆଡିକୁ ଗିରଫ କରିବା ସହିତ 19ଟି ବାଇକ ଜବତ କରିଛି ।
ସୂଚନା ଅନୁସାରେ, ବାରକୋଟ ଥାନା ଅନ୍ତର୍ଗତ ଖୁଲୁଣ୍ଡୀପାଣି ଗାଁ ନିକଟସ୍ଥ ଜଙ୍ଗଲରେ ଏକ ଜୁଆ ଆଡ୍ଡା ଚାଲିଥିବା ନେଇ ପୋଲିସ ଖବର ପାଇଥିଲା । ଏହାପରେ ଏସଡିପିଓ ସୁଲେମାନ ଏକ୍କାଙ୍କ ନିର୍ଦ୍ଦେଶକ୍ରମେ ବାରକୋଟ ଥାନା ଏସଆଇ ପ୍ରଦୀପ ରଞ୍ଜନ ପାତ୍ର ସଦଳବଳେ ସେଠାରେ ଚଢ଼ାଉ କରିଥିଲେ । ପୋଲିସକୁ ଦେଖି ଜୁଆଡିମାନେ ପୋଲିସ ଉପରେ ପଥର ମାଡ଼ କରି ଖସି ପଳାଇଥିଲେ ।
ଖସିଯିବା ସମୟରେ ଖୁଲୁଣ୍ଡିକୁଦର ଗାଁର ଲକ୍ଷ୍ମଣ କିଷାନ (51) ଓ ସୁନ୍ଦରଗଡ଼ ଜିଲ୍ଲା ଟିକାୟତପାଲି ଥାନା ଅନ୍ତର୍ଗତ ଟୁନିଆପାଲି ଗାଁର ଲୋକନାଥ ଓରାମ (୨୮)କୁ ପୋଲିସ ଗିରଫ କରିବାରେ ସକ୍ଷମ ହୋଇଛି । ଘଟଣା ସ୍ଥଳରୁ ପୋଲିସ ପଟି , ନଗଦ ଟଙ୍କା ସମେତ 19ଟି ବାଇକ ଜବତ କରିଛି । ବାରକୋଟ ଥାନାର ବିଭିନ୍ନ ଅଂଚଳରେ ଚାଲିଥିବା କୁକୁଡ଼ା ଲଢେଇ ଓ ଜୁଆ ଆଡ୍ଡା ଉପରେ ଆଗାମୀ ଦିନରେ ପୋଲିସ ଏଭଳି ଚଢ଼ାଉ ଜାରି ରଖିବାକୁ ସାଧାରଣରେ ଦାବି ହେଉଛି ।
ଦେବଗଡ଼ରୁ ସରୋଜ ଶତପଥି, ଇଟିଭି ଭାରତ
