ଦେବଗଡ: ପ୍ରଧାନପାଟ ସଂରକ୍ଷିତ ଜଙ୍ଗଲରୁ ମୟୂର ଶିକାର କରିଥିବା ଜଣେ ଶିକାରୀକୁ ଗିରଫ କରିଛି ଦେବଗଡ଼ ବନବିଭାଗ । ଏଥିସହ ସମ୍ପୃକ୍ତ ଶିକାରୀ ପାଖରୁ ଗୋଟିଏ ଦେଶୀ ବନ୍ଧୁକ ଜବତ କରାଯାଇଛି । ଗିରଫ ଅଭିଯୁକ୍ତ ଜଣକ ନୁଆଁ କଦଳିପାଳ ଗାଁର ଲିଙ୍ଗରାଜ ପେଣ୍ଠେଇ (40) ।
ଗତ 15 ତାରିଖରେ ବାରକୋଟ ରେଞ୍ଜ ଅଧିନ ନୁଆଁ କଦଳିପାଳ ଗାଁ ନିକଟସ୍ଥ ପ୍ରଧାନପାଟ ସଂରକ୍ଷିତ ଜଙ୍ଗଲରୁ ଲିଙ୍ଗରାଜ ଏକ ମୟୂର ଶିକାର କରିଥିଲେ । ଏହି ଶିକାର ଦୃଶ୍ୟଟି ଜଙ୍ଗଲରେ ଖଞ୍ଜା ଯାଇଥିବା ଏକ ଟ୍ରପ କ୍ୟାମେରାରୁ ବନ କର୍ମଚାରୀମାନେ ଦେଖିବାକୁ ପାଇଥିଲେ ଓ ଏହାର ଅନୁସନ୍ଧାନ ଆରମ୍ଭ କରିଥିଲେ । ବନବିଭାଗ କର୍ମଚାରୀମାନେ ଏ ସଂକ୍ରାନ୍ତରେ ଲିଙ୍ଗରାଜକୁ ପଚରାଉଚରା କରିବାରୁ ସେ ନିଜ ଦୋଷ ସ୍ବୀକାର କରିଥିଲା । ପରେ ଲିଙ୍ଗରାଜକୁ ଗିରଫ କରାଯିବା ସହ ତା ନିକଟରୁ ମୟୂରପୁଚ୍ଛ ସହିତ ଶିକାରରେ ବ୍ୟବହୃତ ଗୋଟିଏ ଦେଶୀ ବନ୍ଧୁକ ଜବତ କରାଯାଇଛି ।
ଶନିବାର ଅଭିଯୁକ୍ତକୁ କୋର୍ଟ ଚାଲାଣ କରାଯାଇଥିବା ବନବିଭାଗ ସୂତ୍ରରୁ ଜଣାଯାଇଛି ।
ଦେବଗଡ଼ରୁ ସରୋଜ ଶତପଥୀ, ଇଟିଭି ଭାରତ
