ଦେବଗଡ଼: ବାରକୋଟ ବ୍ଲକ ସରୁଆଳି ପଞ୍ଚାୟତ ଅନ୍ତର୍ଗତ ଓତଳ ଗାଁରେ ବସବାସ କରନ୍ତି ପାଉଡି ଭୂୟାଁ ଆଦିବାସୀ ସମ୍ପ୍ରଦାୟର ୧୦୦ଟି ପରିବାର । ଦୁର୍ଗମ ପାର୍ବତ୍ୟ ଘେରା ଏହି ଅପହଞ୍ଚ ଇଲାକାରେ ବସବାସ କରନ୍ତି ପାଉଡି ଭୂୟାଁ ସମ୍ପ୍ରଦାୟ ଆଦିମ ଜନଜାତିର ଲୋକେ । ତେବେ ବିଦ୍ୟୁତ ସେବା ଯୋଗାଇଦେବା ଲକ୍ଷ୍ୟରେ ସରକାର ଏଠାରେ କାର୍ଯ୍ୟକାରୀ କରିଛନ୍ତି ରାଜୀବ ଗାନ୍ଧୀ ଗ୍ରାମୀଣ ବିଦ୍ୟୁତ କରଣ ଯୋଜନା । ଗାଁରେ ବସବାସ କରୁଥିବା ସମସ୍ତ ବିପିଏଲ ପରିବାରଙ୍କୁ ସରକାର ଯୋଗାଇ ଦେଇଛନ୍ତି ବିଦ୍ୟୁତ ସେବା । ମାତ୍ର ଅତ୍ୟନ୍ତ ପରିତାପର ବିଷୟ ହେଲା ବିଦ୍ୟୁତ ବିଭାଗର ଚରମ ଅବହେଳା ଯୋଗୁଁ ଓତଳ ଗ୍ରାମବାସୀ ବିଦ୍ୟୁତ ସେବା ପାଇବାରୁ ବଞ୍ଚିତ ହୋଇ ଆସୁଛନ୍ତି ।
ଦିନେ ନୁହେଁ କି ଦୁଇଦିନ ନୁହେଁ ଆଜକୁ ଦୀର୍ଘ 6 ମାସ ହେଲା ଓତଳ ଗାଁରେ ବିଦ୍ୟୁତ ସେବା ସମ୍ପୂର୍ଣ୍ଣ ଠପ ହୋଇ ପଡିଛି । ଗ୍ରାମବାସୀ ଘନ ଅନ୍ଧକାରରେ ଦିନ କାଟୁଥିବା ବେଳେ, ଏହି ପାର୍ବତ୍ୟ ଅଞ୍ଚଳରେ ଅଧିକାଂଶ ସମୟରେ ବନ୍ୟଜନ୍ତୁଙ୍କ ଭୟ ରହୁଥିବାରୁ ଲୋକେ ନାହିଁନଥିବା ସମସ୍ୟାର ସମ୍ମୁଖୀନ ହେଉଛନ୍ତି । ପିଲାମାନଙ୍କୁ ପାଠ ପଢିବାରେ ମଧ୍ୟ ବହୁ ସମସ୍ୟା ହେଉଛି । ତେବେ ଗାଁରେ ଲାଗିଥିବା ବିଦ୍ୟୁତ ଟ୍ରାନ୍ସଫର୍ମର ଅଚଳ ହୋଇଯିବାରୁ ଗାଁରେ ବିଦ୍ୟୁତ ସେବା ଠପ ହୋଇ ପଡ଼ିଥିବା ବିଭାଗୀୟ କର୍ମଚାରୀ ସଫେଇ ଦେଉଛନ୍ତି । ହେଲେ ଏହାର ମରାମତି ପାଇଁ ଗ୍ରାମବାସୀ ବାରମ୍ବାର ବିଭାଗୀୟ କର୍ତ୍ତୃପକ୍ଷ ଓ ଜିଲ୍ଲା ପ୍ରଶାସନକୁ ଜଣାଇ ଆସୁଥିଲେ ସୁଦ୍ଧା ଏହି ସମସ୍ୟାର ସମାଧାନ ହୋଇ ପାରୁନାହିଁ । ଫଳରେ ଏନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।
ଦେବଗଡରୁ ସରୋଜ କୁମାର ଶତପଥୀ, ଇଟିଭି ଭାରତ
