ଦେବଗଡ: ଚାଷ ଜମିକୁ ଜଳ ଯୋଗାଇ ଦେବା ଲକ୍ଷ୍ୟରେ ସରକାରଙ୍କ ରାଜକୋଷରୁ ଲକ୍ଷାଧିକ ଟଙ୍କା ବ୍ୟୟରେ ନିର୍ମାଣ କରାଗଲା କେନାଲ । ହେଲେ ବିଭାଗୀୟ ଯନ୍ତ୍ରୀ ଓ ଠିକାଦାରଙ୍କ ସଲାସୁତରାରେ ନିର୍ମାଣ ହୋଇଥିବା କେନାଲକୁ କିଛି ଦିନ ନପୁରୁଣୁ ମାଟିରେ ମିଶି ଯିବାକୁ ବସିଛି ଏହି କେନାଲ । ସ୍ଥାନୀୟ ଗୁଣ୍ଡେଇମୁରାର ଦେଖିବାକୁ ମିଳିଛି ଏଭଳି ପରିସ୍ଥିତି । ଜିଲ୍ଲାର କ୍ଷୁଦ୍ର ଜଳସେଚନ ବିଭାଗ ପକ୍ଷରୁ ବାରକୋଟ ବ୍ଲକ ଗୁଣ୍ଡେଇମୁରାଠାରେ ମତୁଆଳି ନାଳ ଉପରେ ନିର୍ମାଣ ହୋଇଛି ଏହି ଚେକ ଡ୍ୟାମ । ଗତ ଏପ୍ରିଲ ମାସରେ ଏହି ଚେକ ଡ୍ୟାମର ଲେଫ୍ଟ କେନାଲ କାର୍ଯ୍ୟ ଆରମ୍ଭ ହୋଇଥିଲା ।
ମୋଟ 5400 ମିଟର କେନାଲ କାମ ପାଇଁ ବ୍ୟୟ ହୋଇଥିଲା 27 ଲକ୍ଷ ଟଙ୍କା । କୁଚିଣ୍ଡା ଅଞ୍ଚଳର ଜଣେ ଠିକାଦାର ଏହି କାର୍ଯ୍ୟ କରି ଆସୁଥିଲେ । ବିଭାଗୀୟ ସୂତ୍ରରୁ ମିଳିଥିବା ସୂଚନା ଅନୁଯାୟୀ ଏପର୍ଯ୍ୟନ୍ତ ଏହି କେନାଲର ମୋଟ 4400 ମିଟର କାମ ସମାପ୍ତ ହୋଇଛି ଓ ସମ୍ପୃକ୍ତ ଠିକାଦାରଙ୍କୁ 22 ଲକ୍ଷ ଟଙ୍କା ଦିଆଯାଇଛି । ହେଲେ ଦୁଃଖର ବିଷୟ କି ଏହି କେନାଲ କାର୍ଯ୍ୟ ନସରୁଣୁ ଏହାର ଅବସ୍ଥା ଅତି ଶୋଚନୀୟ ହୋଇପଡିଛି । କେନାଲର ଅଧିକାଂଶ ସ୍ଥାନରେ ଫାଟ ସୃଷ୍ଟି ହୋଇଥିବା ବେଳେ ଆଉ କେତେକ ସ୍ଥାନରେ କେନାଲ ସମ୍ପୂର୍ଣ୍ଣ ରୂପେ ଭୁଷୁଡି ପଡିଛି ।
କେନାଲ ନିର୍ମାଣରେ ଖର୍ଚ୍ଚ ହୋଇଥିବା ଅର୍ଥ ତୁଳନାରେ ଅତି ନିମ୍ନ ମାନର ନିର୍ମାଣ କାର୍ଯ୍ୟ କରି ସମ୍ପୃକ୍ତ ଠିକାଦାର ଅନୁଦାନ ଟଙ୍କା ଉଠାଇ ନେଇଥିବାରୁ କେନାଲଟି ବ୍ୟବହାର ଉପଯୋଗୀ ହୋଇପାରୁନଥିବା ଅଭିଯୋଗ ହେଉଛି । ଫଳରେ ଏହି କେନାଲ ଉପରେ ନିର୍ଭର କରି ଚାଷ କାର୍ଯ୍ୟ କରିବାକୁ ଆଶା ବାନ୍ଧି ବସିଥିବା ଗୁଣ୍ଡେଇମୁରା, ତାଲଖାଲି, ପବିତ୍ରପୁର, ମାଙ୍କରମୁଣ୍ଡା, ରେଗଡା ଓ କଣ୍ଟାପାଲି ଆଦି ଗ୍ରାମର ଚାଷୀକୁଳଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ଏହି କେନାଲର ନିର୍ମାଣ କାର୍ଯ୍ୟରେ ବ୍ୟାପକ ଦୁର୍ନୀତି ଓ ଅର୍ଥ ଆତ୍ମସାତ ହୋଇଥିବା ଆଶଙ୍କା କରାଯାଉଛି । ତେବେ ଦୁର୍ନୀତି ନିବାରଣ ବିଭାଗ ଦ୍ଵାରା ଏହାର ବିଦ୍ଧିବଦ୍ଧ ତଦନ୍ତ କରାଯିବାକୁ ସ୍ଥାନୀୟ ଲୋକେ ଦାବି କରିଛନ୍ତି ।
ଦେବଗଡରୁ ସରୋଜ ଶତପଥି, ଇଟିଭି ଭାରତ
