ଦେବଗଡ: ରାଜ୍ୟ ରାଜପଥ ଉପରେ ପଡିରହିଛି ଶହ ଶହ କ୍ୱିଣ୍ଟାଲ ଧାନବସ୍ତା । ରାସ୍ତାକୁ ଅବରୋଧ କରି ରହିଛନ୍ତି ଚାଷୀକୁଳ । ଚଳିତ ବର୍ଷ ଧାନ କିଣାରେ ଦେଖା ଦେଇଥିବା ଅବ୍ୟବସ୍ଥା ପ୍ରତିବାଦରେ ତାରଙ୍ଗ ସେବା ସମବାୟ ସମିତିର ଚାଷୀକୁଳ ରାଜରାସ୍ତାକୁ ଓହ୍ଲାଇଛନ୍ତି ।
4 ଦିନରୁ ଦେବଗଡରେ ଜାରି ରହିଛି ଚାଷୀଙ୍କ ଆନ୍ଦୋଳନ କୃଷି ପ୍ରଧାନ ଦେବଗଡ଼ ଜିଲ୍ଲାରେ ଚାଷୀ ଆନ୍ଦୋଳନ ଥମିବାର ନାଁ ନେଉନାହିଁ । ବରଂ ଏହି ଆନ୍ଦୋଳନ କ୍ରମଶଃ ତୀବ୍ରତର ହେବାରେ ଲାଗିଛି । ଧାନବିକ୍ରି ପାଇଁ ଟୋକନ ପାଇଥିବା ରିଆମାଳ ବ୍ଲକ ତାରଙ୍ଗ ସେବା ସମବାୟ ସମିତିର ଶତାଧିକ ପଞ୍ଜିକୃତ ଚାଷୀ ନିଜ ଉପାର୍ଜିତ ଧାନ ମଣ୍ଡିରେ ବିକ୍ରି କରିନପାରି ରାଜରାସ୍ତାକୁ ଓହ୍ଲାଇଛନ୍ତି । ଆଜକୁ ଦୀର୍ଘ 4 ଦିନ ହେବ ଆନ୍ଦୋଳନରତ ଚାଷୀକୁଳ ତାରଙ୍ଗ ଗାଁ ଦେଇ ଯାଇଥିବା 23 ନମ୍ବର ରାଜ୍ୟ ରାଜପଥ ଉପରେ ଧାନବସ୍ତା ରଖି ରାସ୍ତକୁ ଅବରୋଧ କରି ରଖି ଥିବାବେଳେ, ରିଆମାଳ ବ୍ଲକ କାର୍ଯ୍ୟାଳୟ, ତହସିଲ କାର୍ଯ୍ୟାଳୟ ସମେତ ତାରଙ୍ଗ, ମଲେହିପଡା ଓ ତୁହିଲାମାଳ ପଞ୍ଚାୟତ କାର୍ଯ୍ୟାଳୟରେ ତାଲା ପକାଇ ଦେଇଛନ୍ତି । ଫଳରେ ସମଗ୍ର ରିଆମାଳ ବ୍ଲକରେ ଏକପ୍ରକାର ଅଚଳାବସ୍ଥା ଦେଖାଦେଇଛି । ସୂଚନା ଅନୁଯାୟୀ, ଚଳିତ ବର୍ଷ ସରକାର ତାରଙ୍ଗ ସେବା ସମବାୟ ସମିତିରେ ଧାନବିକ୍ରି କରିବା ପାଇଁ ତାରଙ୍ଗ, ମଲେହିପଡା ଓ ତୁହିଲାମାଳ ଆଦି ତିନୋଟି ପଞ୍ଚାୟତର 537 ଜଣ ପଞ୍ଜିକୃତ ଚାଷୀଙ୍କ ପାଖରୁ ମୋଟ 26 ହଜାର କ୍ୱିଣ୍ଟାଲରୁ ଅଧିକ ଧାନ କ୍ରୟ କରିବାକୁ ଥିବାବେଳେ ଏଯାଏଁ ମୋଟ 18 ହଜାର 5 ଶହ କ୍ୱିଣ୍ଟାଲ ଧାନ କିଣାଯାଇଛି । ସେହିପରି ଗତ 30 ତାରିଖ ଠାରୁ ପାଇଥିବ ଚାଷୀଙ୍କ ଟୋକାନର ଅବଧି ଶେଷ ହୋଇଯାଇଛି । ଏବାବଦରେ ଚାଷୀକୁଳ ବାରମ୍ବାର ଜିଲ୍ଲା ପ୍ରଶାସନ ଓ ଯୋଗାଣ ବିଭାଗକୁ ଜଣାଇ ଆସୁଥିଲେ ସୁଦ୍ଧା ସମସ୍ୟାର ସମାଧାନ ହୋଇପାରିନାହିଁ । ଫଳରେ ଚାଷୀକୁଳ ବାଧ୍ୟହୋଇ ରାଜରାସ୍ତାକୁ ଓହ୍ଲାଇ ଆନ୍ଦୋଳନ ପନ୍ଥା ଗ୍ରହଣ କରିଛନ୍ତି । ପଞ୍ଜିକୃତ ସମସ୍ତ ଚାଷୀଙ୍କ ଧାନ କ୍ରୟ ଦିଗରେ ସରକାର ତୁରନ୍ତ କୌଣସି ପଦକ୍ଷେପ ନ ନେଲେ ଏହି ଆନ୍ଦୋଳନ ଆଗାମୀ ଦିନରେ ଅଧିକ ତୀବ୍ରତର କରାଯିବାକୁ ଚାଷୀକୁଳ ଚେତାବନୀ ଦେଇଛନ୍ତି । ଦେବଗଡ଼ରୁ ସରୋଜ ଶତପଥି, ଇଟିଭି ଭାରତ
