ଦେବଗଡ଼: ଜିଲ୍ଲା ରିଆମାଳ ବ୍ଲକ କଣ୍ଟାବାହାଳ ପଞ୍ଚାୟତର ଗୋହିଡ଼ା ଗାଁ । ଏହି ଗାଁରେ ବସବାସ କରନ୍ତି 150 ପରିବାର । ହେଲେ ଏହି 150 ପରିବାରଙ୍କ ପାଇଁ ଗାଁରେ ଅଛି ମାତ୍ର 6ଟି ନଳକୂପ । ସେଥିମଧ୍ୟରୁ 5ଟି ନଳକୂପରୁ ପିଇବା ଉପଯୋଗୀ ପାଣି ବାହାରୁ ନଥିବାରୁ କେବଳ ଗୋଟିଏ ମାତ୍ର ନଳକୂପ ଉପରେ ନିର୍ଭର କରି ଚଳିଆସୁଛନ୍ତି ଏମାନେ । ଫଳରେ ଦିନ ତମାମ ନଳକୂପ ସାମ୍ନାରେ ମହିଳାଙ୍କ ଭିଡ଼ ପରିଲକ୍ଷିତ ହୋଇଛି । ପାନୀୟ ଜଳ ମୁନ୍ଦାଏ ପାଇଁ ଦୀର୍ଘ ସମୟ ଧରି ଲମ୍ବା ଲାଇନରେ ଛିଡା ହେବାକୁ ପଡୁଛି ମହିଳା ମାନଙ୍କୁ ।
ତେବେ ଗୋହିଡ଼ା ଗାଁରେ ଲୋକଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇଦେବା ଲକ୍ଷ୍ୟରେ ସରକାରଙ୍କ ବସୁଧା ଯୋଜନା ମାଧ୍ୟମରେ ଜିଲ୍ଲା ଗ୍ରାମ୍ୟ ଜଳ ଓ ପରିମଳ ମିଶନ ବିଭାଗ ପକ୍ଷରୁ ଦୁଇବର୍ଷ ପୂର୍ବେ ନିର୍ମାଣ କରାଯାଇଛି ଏକ ପାନୀୟ ଜଳ ପ୍ରକଳ୍ପ । ମାତ୍ର ବିଡ଼ମ୍ବନାର ବିଷୟ ଯେ, ଆଜକୁ ଦୀର୍ଘ ଦୁଇବର୍ଷ ପୂର୍ବରୁ ନିର୍ମାଣ ହୋଇଥିବା ଏହି ପ୍ରକଳ୍ପଟି ଅଦ୍ୟାବଧି କାର୍ଯ୍ୟକ୍ଷମ ହୋଇପାରିନାହିଁ । ଏଠାରେ ଲାଗିଥିବା ପାଇପ ଓ ଯନ୍ତ୍ରାଂଶ ଗୁଡିକ ମାଟିରେ ମିଶିଯିବାକୁ ବସିଲାଣି । ହେଲେ ବିଭାଗୀୟ କର୍ତ୍ତୃପକ୍ଷଙ୍କ ଚରମ ଅବହେଳା କାରଣରୁ ପ୍ରକଳ୍ପଟି କାର୍ଯ୍ୟକ୍ଷମ ହୋଇପାରୁନଥିବା ଅଭିଯୋଗ ହେଉଛି ।
ଜିଲ୍ଲାରେ ପ୍ରବଳ ଗ୍ରୀଷ୍ମ ପ୍ରବାହ ଅନୁଭୂତ ହେଉଥିବାବେଳେ ଏଭଳି ସମୟରେ ଗୋହିଡ଼ା ଗାଁରେ ନିର୍ମାଣ ହୋଇଥିବା ପାନୀୟଜଳ ପ୍ରକଳ୍ପଟି କାର୍ଯ୍ୟକ୍ଷମ ନହେବାରୁ ଗାଁରେ ଦେଖାଦେଇଛି ଉତ୍କଟ ପାନୀୟ ଜଳ ସଙ୍କଟ ।
ଦେବଗଡ଼ରୁ ସରୋଜ ଶତପଥୀ, ଇଟିଭି ଭାରତ
