ଦେବଗଡ: ଲୋକଙ୍କ ଯାତାୟତ ବ୍ୟବସ୍ଥାକୁ ସୁଗମ କରିବା ଲକ୍ଷ୍ୟରେ ସରକାର ଖର୍ଚ୍ଚ କରୁଛନ୍ତି କୋଟି କୋଟି ଟଙ୍କା । ହେଲେ ବର୍ଷ ପରେ ବର୍ଷ ବିତିଯାଉଛି, କିନ୍ତୁ ସରୁନି ପୋଲ ନିର୍ମାଣ କାର୍ଯ୍ୟ । ଏମିତି କିଛି ଦୃଶ୍ୟ ଦେଖିବାକୁ ମିଳିଛି ଦେବଗଡ଼ ଜିଲ୍ଲା ତିଳେଇବଣି ବ୍ଲକ ଛେପଲିପାଲି ପଞ୍ଚାୟତ ଅନ୍ତର୍ଗତ ଶୁଳିଆ ଗାଁରେ ।
ଉକ୍ତ ଗାଁରେ ଥିବା ଗୋହିରା ନଦୀ ଉପରେ ଏକ ପୋଲ ନିର୍ମାଣ ପାଇଁ ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନାରେ 3 କୋଟି 21 ଲକ୍ଷ ଟଙ୍କା ମଞ୍ଜୁର କରିଥିଲେ ସରକାର । ଏଥିପାଇଁ ଗତ 2017 ମସିହାରେ ଦେବଗଡ଼ ଜିଲ୍ଲା ଗ୍ରାମ୍ୟ ନିର୍ମାଣ ବିଭାଗ ପକ୍ଷରୁ ଟେଣ୍ଡର ମଧ୍ୟ ଡକାଯାଇଥିଲା । ଏହି ଟେଣ୍ଡରଟି ଦେବଗଡ଼ ଜିଲ୍ଲାର ତୁଳସୀ କନଷ୍ଟ୍ରକସନ ନାମକ ଠିକାସଂସ୍ଥା ପାଇଥିଲା । ଟେଣ୍ଡର ଚୁକ୍ତିନାମା ଅନୁଯାୟୀ, ଏହି ପୋଲ ନିର୍ମାଣ କାର୍ଯ୍ୟ ଗତ 2017 ମସିହା ଅକ୍ଟୋବର 25 ତାରିଖ ଦିନ ଆରମ୍ଭ ହୋଇ ଗତ 2019 ମସିହା ଅକ୍ଟୋବର 24 ତାରିଖ ଦିନ ସମାପ୍ତ ହେବାର ଥିଲା । ମାତ୍ର ବିଡ଼ମ୍ବନାର ବିଷୟ ଯେ, ଏହି କାର୍ଯ୍ୟଟି ସମାପ୍ତ ହେବାର ନିର୍ଦ୍ଧାରିତ ସମୟ ଠାରୁ ଦୀର୍ଘ ଆଠମାସ ବିତିଯାଇଥିଲେ ସୁଦ୍ଧା କାର୍ଯ୍ୟଟି ଅଦ୍ୟାବଧି ସମାପ୍ତ ହେବାର ନାଁ ନେଉନାହିଁ । ସମ୍ପୃକ୍ତ ଠିକାସଂସ୍ଥାର ଖାମଖିଆଲି ମନୋଭାବ ସାଙ୍ଗକୁ ବିଭାଗୀୟ କର୍ତ୍ତୃପକ୍ଷଙ୍କ ଉପଯୁକ୍ତ ତଦାରଖ ଅଭାବ ପାଇଁ କାର୍ଯ୍ୟଟି ନିର୍ଦ୍ଧାରିତ ସମୟରେ ସମାପ୍ତ ହୋଇପାରି ନଥିବା ସାଧାରଣରେ ଅଭିଯୋଗ ହୋଇଛି ।
ଅନ୍ୟପକ୍ଷରେ ଗୋହିରା ନଦୀ ଅତିକ୍ରମ କରି ପ୍ରତିଦିନ ଜିଲ୍ଲାର ରିଆମାଳ ଓ ତିଳେଇବଣି ବ୍ଲକର ଛେପଲିପାଲି, ନୂଆଡିହି, ଗୁଣ୍ଡିଆପାଲି, ଖିଲେଇ ଓ ରଞ୍ଜଣା ଆଦି 5 ଖଣ୍ଡ ପଞ୍ଚାୟତର ଲୋକେ ଦେବଗଡ଼ ସଦର ମହକୁମାକୁ ଯାତାୟତ କରିଥାନ୍ତି । ମାତ୍ର ପୋଲ ନିର୍ମାଣରେ ଅହେତୁକ ବିଳମ୍ବ ହେଉଥିବା ଓ ଚଳିତ ବର୍ଷ ବର୍ଷାଋତୁ ପୂର୍ବରୁ ଏହି ପୋଲ ନିର୍ମାଣ କାର୍ଯ୍ୟ ସମାପ୍ତ ହେବାର କୌଣସି ଲକ୍ଷଣ ଜଣାପଡୁନଥିବାରୁ ଏନେଇ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ପରିଲକ୍ଷିତ ହୋଇଛି ।
ତେଣୁ ଲୋକଙ୍କ ଯାତାୟତ ସମସ୍ୟାକୁ ଦୃଷ୍ଟିରେ ରଖି ପୋଲ ନିର୍ମାଣ କାର୍ଯ୍ୟ ତୁରନ୍ତ ସମାପ୍ତ କରିବା ଦିଗରେ ବିଭାଗୀୟ ଉଚ୍ଚ କର୍ତ୍ତୃପକ୍ଷ ବିହିତ ପଦକ୍ଷେପ ନେବାକୁ ଅଞ୍ଚଳବାସୀ ଦାବି କରିଛନ୍ତି ।
ଦେବଗଡ଼ରୁ ସରୋଜ ଶତପଥୀ, ଇଟିଭି ଭାରତ
