ଦେବଗଡ଼: ପଣ୍ଡ ହେଲା ATM ଲୁଟ୍ । ଦେବଗଡ଼ ଥାନା ଅନ୍ତର୍ଗତ କଣ୍ଢଳ ଗାଁରେ ରାତିରେ ଡ୍ୟୁଟି କରୁଥିବା ଦୁଇଜଣ ଗୃହରକ୍ଷୀଙ୍କ ତତ୍ପରତା ଓ ଉପସ୍ଥିତ ବୁଦ୍ଧି ଯୋଗୁଁ ପଣ୍ଡ ହୋଇଛି ଏକ ବଡ ଧରଣର ATM ଲୁଟ । ସୂଚନାନୁଯାୟୀ ଦେବଗଡ଼ ଥାନା ଅନ୍ତର୍ଗତ କଣ୍ଢଳ ଗାଁ ସ୍ଥିତ 49 ନମ୍ବର ଜାତୀୟ ରାଜପଥ କଡ଼ରେ ୟୁନିୟନ ବ୍ୟାଙ୍କ ଓ ଷ୍ଟେଟ ବ୍ୟାଙ୍କର ରହିଛି ଦୁଇଗୋଟି ଏଟିଏମ ।
ସୋମବାର ରାତ୍ର ପ୍ରାୟ 1ଟା ସମୟରେ ଏକ ବୋଲେରୋ ଗାଡିରେ ଚାରିଜଣ ଦୁର୍ବୃତ୍ତ ଆସି ଉକ୍ତ ଦୁଇଗୋଟି ATMରେ ପଶି ପ୍ରଥମେ ସିସିଟିଭି କ୍ୟାମେରା ଭାଙ୍ଗିବା ସହ ଏଟିଏମ ମେସିନକୁ ଭାଙ୍ଗି ଟଙ୍କା ଲୁଟ କରିବାକୁ ଉଦ୍ୟମ କରିଥିଲେ । ATM ମେସିନ ଭଙ୍ଗାଯାଉଥିବା ଶବ୍ଦ ଶୁଣି କଣ୍ଢଳ ଗାଁରେ ରାତ୍ର କାଳୀନ ଡ୍ୟୁଟି କରୁଥିବା ଦାମୋଦର ସାହୁ ଓ ଜଗବନ୍ଧୁ ବାଘ ନାମକ ଦେବଗଡ଼ ଥାନାର ଦୁଇଜଣ ଗୃହରକ୍ଷୀ ସେଠାକୁ ଯାଇ ଲୁଟେରାଙ୍କୁ ପ୍ରତିରୋଧ କରିଥିଲେ ।
ଗୃହରକ୍ଷୀଙ୍କ ଚିତ୍କାର ଶୁଣି ଚାରିଜଣ ଲୁଟେରା ସେମାନଙ୍କ ଉପରକୁ ପଥର ଫୋପାଡ଼ି ଆକ୍ରମଣ କରିଥିଲେ । ମାତ୍ର ନିଜ ଜୀବନକୁ ପାଣି ଛଡାଇ ଗୃହରକ୍ଷୀ ମାନେ ମଧ୍ୟ ଲୁଟେରାଙ୍କ ଉପରକୁ ପଥର ଫୋପାଡ଼ି ପାଲଟା ଆକ୍ରମଣ କରିଥଲେ । ତେବେ କିଛି ସମୟ ଧରି ଉଭୟଙ୍କ ମଧ୍ୟରେ ଖଣ୍ଡଯୁଦ୍ଧ ଲାଗି ରହିବାରୁ ଶେଷରେ କୌଣସି ଉପାୟ ନପାଇ ଚାରିଜଣ ଲୁଟେରା ସେଠାରୁ ବୋଲେରୋ ଯୋଗେ ବାରକୋଟ ଅଭିମୁଖେ ଫେରାର ହୋଇ ଯାଇଥିଲେ ।
ଲୁଟେରା ମାନେ ଦୁଇଟି ଏଟିଏମ ମେସିନ ଭାଙ୍ଗି ଦେଇଥିଲେ ସୁଦ୍ଧା ଗୃହରକ୍ଷୀଙ୍କ ତତ୍ପରତା ଯୋଗୁଁ ଟଙ୍କା ଲୁଟ କରିବାରେ ବିଫଳ ହୋଇଥିଲେ ଲୁଟେରା । ଏନେଇ ସୋମବାର ସକାଳ ସମୟରେ ଘଟଣା ସ୍ଥଳରେ ଦେବଗଡ଼ ପୋଲିସ ଏବଂ ସମ୍ପୃକ୍ତ ବ୍ୟାଙ୍କ ଅଧିକାରୀ ମାନେ ପହଞ୍ଚି ଘଟଣାର ଅନୁସନ୍ଧାନ ଜାରି ରଖିଛନ୍ତି ।
ଏପର୍ଯ୍ୟନ୍ତ ଲୁଟେରାଙ୍କ ସନ୍ଧାନ ମିଳିପାରିନଥିବା ନେଇ ସୂଚନା ମିଳିଛି । ଗୃହରକ୍ଷୀଙ୍କ ତତ୍ପରତା ଓ ଉପସ୍ଥିତ ବୁଦ୍ଧି କାରଣରୁ ଦୁଇଟି ରାଷ୍ଟ୍ରାୟତ ବ୍ୟାଙ୍କ ଏଟିଏମ ଲୁଟ ହେବାରୁ ବର୍ତ୍ତିଯାଇଥିବା ବେଳେ, ଗୃହରକ୍ଷୀଙ୍କ ଏଭଳି କାର୍ଯ୍ୟକୁ ବିଭିନ୍ନ ମହଲରେ ପ୍ରଶଂସା କରାଯାଇଛି ।
ଦେବଗଡ଼ରୁ ସରୋଜ କୁମାର ଶତପଥି, ଇଟିଭି ଭାରତ
