କଟକ: ଡିସେମ୍ବର ମାସ ପ୍ରଥମ ସପ୍ତାହକୁ ଶୂନ୍ୟ ସଡ଼କ ଦୁର୍ଘଟଣା ମୃତ୍ୟୁ ସପ୍ତାହ ଭାବେ ପାଳନ କରାଯାଉଛି । ଏନେଇ ସମଗ୍ର ରାଜ୍ୟର ଏକ ସ୍ବତନ୍ତ୍ର ଅଭିଯାନ ମଧ୍ୟ ଆରମ୍ଭ କରିଛି ଷ୍ଟେଟ ଟ୍ରାନ୍ସପୋର୍ଟ ଅଥରିଟି(ଏସ.ଟି.ଏ) । କିନ୍ତୁ ଏହି ଶୂନ୍ୟ ସଡ଼କ ଦୁର୍ଘଟଣା ମୃତ୍ୟୁ ସପ୍ତାହ ପାଳନ ମଧ୍ୟରେ ରାଜ୍ୟ ସାରା ପ୍ରତିଦିନ ଜାରି ରହିଛି ସିରିଜ୍ ଦୁର୍ଘଟଣା । ପ୍ରଥମ ତିନି ଦିନରେ ଦୁର୍ଘଟଣାରେ ଅନ୍ୟୁନ ୩୨ ଜଣଙ୍କ ଜୀବନ ଯାଇଛି । ସପ୍ତାହର ପ୍ରଥମ ଦିନରେ ୨୦, ଦ୍ବିତୀୟ ଦିନରେ ୬ ସହ ବେସରକାରୀ ଭାବେ ୨୬ ଜଣଙ୍କ ମୃତ୍ୟୁ ଘଟିଥିବା ବେଳେ ତୃତୀୟ ଦିନରେ ୬ ଜଣଙ୍କ ମୃତ୍ୟୁ ହୋଇଛି । ଯାହାକି ଶୂନ୍ୟ ସଡ଼କ ଦୁର୍ଘଟଣା ମୃତ୍ୟୁ ସପ୍ତାହ ପାଳନ କାର୍ଯ୍ୟକ୍ରମ ଉପରେ ପ୍ରଶ୍ନ ଉଠାଇଛି ।
ସେପଟେ ଲୋକେ ସଚେତନ ନହେଲେ ସଡ଼କ ଦୁର୍ଘଟଣାଜନିତ ମୃତ୍ୟୁକୁ ରୋକିବା ଅସମ୍ଭବ ବୋଲି କହି ହାତ ଟେକି ଦେଲା ରାଜ୍ୟ ପରିବହନ ପ୍ରାଧିକରଣ ବା ଏସ.ଟି.ଏ । ବେପରୁଆ ଭାବେ, ନିଶା ସେବନ କରି ଓ ଅତ୍ୟଧିକ ବେଗରେ ଗାଡ଼ି ଚଳନା କରିବା ହିଁ ସଡକ ଦୁର୍ଘଟଣାର ପ୍ରମୁଖ କାରଣ । କିନ୍ତୁ ଖିଲାପିକାରୀ ମାନେ ଫାଇନ ଭଳି କାର୍ଯ୍ୟାନୁଷ୍ଠାନକୁ ଭୃକ୍ଷେପ କରୁନଥିବାରୁ ସେମାନଙ୍କୁ ନିୟନ୍ତ୍ରଣ କରିବା ପାଇଁ ଅନ୍ୟ କୌଣସି ଉପାୟ ନାହିଁ । ସେଥିପାଇଁ ଲୋକେ ନିଜେ ସଚେତନ ହେଲେ ହିଁ ସଡକ ଦୁର୍ଘଟଣା ଜନିତ ମୃତ୍ୟୁକୁ ରୋକା ଯାଇ ପାରିବ ବୋଲି କହିଛି ଏସ୍ଟିଏ । ତେବେ ଲୋକମାନେ ଏଥିପାଇଁ ସଚେତନ ରହିବାକୁ ପରାମର୍ଶ ଦେଇଛି ଏସ୍ଟିଏ ।
ଏହା ମଧ୍ୟ ପଢନ୍ତୁ... ଟ୍ରକକୁ ପିଟିଲା କାର୍: ୨ ମୃତ, ରାଜଧାନୀରେ ୧୦ ଦିନରେ ଗଲାଣି ୬ ମୁଣ୍ଡ
ସଦ୍ୟ ଉଦାହରଣ ଭାବେ ଗଞ୍ଜାମ ଦିଗପହଣ୍ଡିରୁ ପ୍ରାୟ 20 ଜଣ ଲୋକ ଏକ ଭ୍ୟାନରେ ଘଟଗାଁ ମାଆ ତାରିଣୀଙ୍କ ଦର୍ଶନ ପାଇଁ ଆସୁଥିଲେ । ବାଲିଯୋଡ଼ି ନିକଟରେ ରାସ୍ତା ଉପରେ ଠିଆ ହୋଇଥିବା ଏକ ଆଇରନ ଟ୍ରକକୁ ପଛରୁ ଧକ୍କା ଦେଇଥିଲା ୱିଙ୍ଗର ଭ୍ୟାନ୍ । ଦୁର୍ଘଟଣାରେ 8 ଜଣଙ୍କ ମୃତ୍ୟୁ ହୋଇଥିବା ବେଳେ 12 ଜଣ ଗୁରୁତର ହୋଇଥିଲେ । ଘଟଣାସ୍ଥଳରେ 7 ଜଣଙ୍କ ମୃତ୍ୟୁ ହୋଇଥିଲା । ଡାକ୍ତରଖାନାରେ ଆଉ ଜଣେ ଶିଶୁ ଆଖି ବୁଜିଥିଲା । ତେବେ ଦୁର୍ଘଟଣା ଖବର ପହଞ୍ଚିବା ପରେ ପରିବାରରେ କାନ୍ଦ ବୋବାଳି ପଡିବା ସହ ସ୍ତବ୍ଧ ହୋଇଯାଇଥିଲା ପୁରା ଗାଁ । ସେହିପରି କିଛି ମାସ ପୂର୍ବେ ଏକ ବିବାହରୁ ଫେରୁଥିବା ବେଳେ ଦିଗପହଣ୍ଡିରେ ଏକ କନ୍ୟାଯାତ୍ରୀ ବସ୍ ଦୁର୍ଘଟଣାଗ୍ରସ୍ତ ହୋଇଥିଲା । ଫଳରେ ଘଟଣାସ୍ଥଳରେ 12 ଜଣଙ୍କ ପ୍ରାଣବାୟୁ ଉଡ଼ି ଯାଇଥିଲା । ଭୁବନେଶ୍ୱରରେ ଭୟଙ୍କର ସଡ଼କ ଦୁର୍ଘଟଣାରେ ଟ୍ରକ ସହ କାର୍ ଧକ୍କା ହେବାରୁ ୨ ଜଣଙ୍କ ମୃତ୍ୟୁ ଘଟିଥିଲା । ଏତଦ ସହ ଶୂନ୍ୟ ସଡକ ଦୃର୍ଘଟଣା ମୃତ୍ୟୁ ସପ୍ତାହର ପ୍ରଥମ ଦିନରେ ଟ୍ରାଫିକ ଆଇନ ଭଙ୍ଗ ଅପରାଧରେ 2807 ଟି ଇ-ଚାଲାଣ କଟାଯାଇଛି ବୋଲି ପରିବହନ ବିଭାଗ ତରଫରୁ ଜଣାପଡିଛି । ଗତ ୩ ଦିନ ମଧ୍ୟରେ ୩୨ ଜଣଙ୍କର ସଡକ ଦୁର୍ଘଟଣାରେ ମୃତ୍ୟୁ ଘଟିଛି, ଯାହା ଦ୍ବାରା ଶୂନ୍ୟ ମୃତ୍ୟୁ ସପ୍ତାହ ପାଳନକୁ ନେଇ ପ୍ରଶ୍ନ ଉଠାଇବାକୁ ବାଧ୍ୟ କରିଛି ।
ଇଟିଭି ଭାରତ, କଟକ
