ନିଆଳି: ଭଉଣୀ ବାହାଘର ମୁଣ୍ଡ ଉପରେ । କିନ୍ନର ବଳରାମ ରୋଜଗାର କରି ଟଙ୍କା ଆଣିବ ଆଉ ସେହି ଟଙ୍କାରେ ଭଉଣୀ ବାହା ହୋଇ ପର ଘରକୁ ଯାଇଥାନ୍ତା । ବିଧିର ବିଧାନ ବଡ ବିଚିତ୍ର । ଭଉଣୀ ବାହାଘର ପୂର୍ବରୁ କିନ୍ନର ବଳରାମଙ୍କ ଘଟିଛି ମୃତ୍ୟୁ । ଏଭଳି ଅଭାବନୀୟ ଘଟଣା ଘଟିଛି ପୁରୀ ଜଗନ୍ନାଥ ସିଂହଦ୍ଵାର ଗୁମୁଟ(Puri Srimandir Gumuta) ନିକଟରେ । ଆଜି(ରବିବାର) ଅପରାହ୍ନ 3ଟା ସମୟରେ ଗୁମୁଟ ଉପରୁ ଡେଇଁ ବଳରାମଙ୍କ ମୃତ୍ୟୁ ଘଟିଥିବା ଜଣାପଡ଼ିଛି ।
ପୁରୀ ଜିଲ୍ଲା ନିମାପଡ଼ା ଥାନା କଳାପାଞ୍ଚଣ ପଞ୍ଚାୟତର ଗଡ ଇଟାପୋଖରୀ କୋଠସାହି ଗ୍ରାମର ଅରକ୍ଷିତ ରାଉତଙ୍କ ରୋଜଗାରିଆ କିନ୍ନର ବଳରାମ ରାଉତ। ଗତ ଦୁଇ ଦିନ ତଳୁ ସେ ପୁରୀ ଯାଇଥିଲେ । ନାଚିବେ ଟଙ୍କା ରୋଜଗାର କରିବେ ଆଉ ସେହି ଟଙ୍କାରେ ଭଉଣୀର ପାଲଙ୍କି ଉଠିବ ବୋଲି ପ୍ରତିଶୃତି ଦେଇଥିଲେ । କିନ୍ତୁ ସ୍ବପ୍ନ ଅଧା ରହିଗଲା । କିନ୍ନର ବଳରାମ ସିଂହଦ୍ଵାର ଗୁମୁଟରୁ ଡେଇଁ ମୃତ୍ୟୁବରଣ କରିଥିବା ଖବର ମିଳିଛି ।
ଆଜି ବଳରାମଙ୍କ ଭଉଣୀର ଦେଖାଚାହାଁ ହେଉଥିଲା, ଘରେ ବନ୍ଧୁ ବାନ୍ଧବ ଭୋଜି ଭାତ । ସେପଟେ କିନ୍ତୁ ଘରର ଏକମାତ୍ର ରୋଜଗାରିଆ କିନ୍ନର ବଳରାମ ମୃତ୍ୟୁ ଖବର ଆସିଲା । ପରିବାର ଓ ସାହି ପଡୋଶୀଙ୍କ କହିବାନୁସାରେ ସେ ଦୁଇ ଦିନ ତଳୁ ପୁରୀ ଯାଇଥିଲେ । ସେ ଭଲ ପିଲା ଏମିତି କାହିଁକି କଲେ ସମସ୍ତଙ୍କ ମନରେ ସନ୍ଦେହ ସୃଷ୍ଟି ହୋଇଛି । ସେପଟେ ବଳରାମଙ୍କ ଗାଁରେ ଲୋକେ ପ୍ରଶାସନଙ୍କୁ ଦାୟୀ କରିଛନ୍ତି ।
ନିଆଳିରୁ ଉମେଶ ଚନ୍ଦ୍ର ମଲ୍ଲିକ, ଇଟିଭି ଭାରତ
