କଟକ: ବ୍ୟାଙ୍କ ଋଣ ସୁଝି ନପାରିବାରୁ ସାଂସଦ ଅନୁଭବ ମହାନ୍ତିଙ୍କ ଭାଇ ଅନୁପ୍ରାସ ମହାନ୍ତିଙ୍କ ଜମି ଦଖଲ ବେଳେ ଉତ୍ତେଜନା । କଟକ ସେଲ୍ଟର ଛକସ୍ଥିତ ନେତାଜୀ ନଗରରେ ଥିବା ଏକ ଜମିକୁ ନିଜ ଅକ୍ତିଆରକୁ ନେବାକୁ ଉଦ୍ୟମ ଆରମ୍ଭ କରିଛି ଅର୍ବାନ କୋ ଅପରେଟିଭ ବ୍ୟାଙ୍କ । ୨୦୧୩ ମସିହାରେ ସମ୍ପୃକ୍ତ ଜମିକୁ ବନ୍ଧକ ରଖି ଗଣ୍ଡରପୁର ଅର୍ବାନ ବ୍ୟାଙ୍କ ବ୍ରାଞ୍ଚରୁ ଅନୁପ୍ରାସ ୫୬ ଲକ୍ଷ ଟଙ୍କା ଋଣ ନେଇଥିଲେ । କିନ୍ତୁ ଋଣ ନେଇ ବ୍ୟାଙ୍କ କିସ୍ତି ଦେବାରେ ଖିଲାପି କରିବାରୁ ଏନେଇ ବ୍ୟାଙ୍କ ପକ୍ଷରୁ ବାରମ୍ବାର ନୋଟିସ ପରେ ମଧ୍ୟ ଅନୁପ୍ରାସ ଟଙ୍କା ପୈଠ କରି ନଥିଲେ । ଫଳସ୍ବରୂପ ଆଜି ସଂପୃକ୍ତ ଜମିକୁ ଦଖଲକୁ ନେବାକୁ ବ୍ୟାଙ୍କ ପକ୍ଷରୁ ଉଦ୍ୟମ ହୋଇଥିବାବେଳେ ସେଠାରେ ଉତ୍ତେଜନାମୂଳକ ସ୍ଥିତି ଉପୁଜିଛି । ଠେଲାପେଲାରେ କିଛି ବ୍ୟାଙ୍କ କର୍ମଚାରୀ ଆହତ ହୋଇଥିବା ମଧ୍ୟ ଦେଖିବାକୁ ମିଳିଛି ।
ଜମିକୁ ଦଖଲକୁ ନେବାକୁ ବ୍ୟାଙ୍କ କର୍ତ୍ତୃପକ୍ଷ ପହଞ୍ଚିଥିବାବେଳେ ସ୍ଥାନୀୟ ଲୋକେ ସମ୍ପୃକ୍ତ ଜମିଟି ସ୍ଥାନୀୟ ନେତାଜୀ ସଂଘର ଦର୍ଶାଇ ବ୍ୟାଙ୍କ କର୍ମଚାରୀଙ୍କୁ ବିରୋଧ କରିଥିଲେ । ଏହାସହ ପୋଲିସ ଉପସ୍ଥିତିରେ ସେଠାରେ ଉତ୍ତେଜନାମୂଳକ ସ୍ଥିତି ଉପୁଜିବା ସହ ଠେଲାପେଲା ହୋଇଥିଲା । ପରେ ବ୍ୟାଙ୍କ କର୍ତ୍ତୃପକ୍ଷ ଜମିକୁ ଦଖଲକୁ ନେଇନପାରି ଫେରିଯାଇଥିଲେ । ଏନେଇ ନେତାଜୀ ସଙ୍ଘ ସହସଂପାଦକ ଦେବାଶିଷ ରାୟ କହିଛନ୍ତି, "ଏହି ଜମି ଦୀର୍ଘ ୬୦ ବର୍ଷ ହେବ ନେତାଜୀ ସଙ୍ଘ ଦଖଲରେ ଅଛି । ଏନେଇ କୋର୍ଟରେ ମାମଲା ମଧ୍ୟ ଚାଲିଛି । ସାଂସଦ ଅନୁଭବ ମହାନ୍ତିଙ୍କ ଭାଇ ଅନୁପ୍ରାସ ମହାନ୍ତି ଜମିର କାଗଜ ପତ୍ର ଜାଲିଆତି କରି ବ୍ୟାଙ୍କରୁ ଋଣଆଣିଛନ୍ତି ।" ସେପଟେ ବ୍ୟାଙ୍କ କର୍ତ୍ତୃପକ୍ଷ ଏହି ଅଭିଯୋଗକୁ ଖଣ୍ଡନ କରିଛନ୍ତି ।
ଏହା ମଧ୍ୟ ପଢ଼ନ୍ତୁ...ସମବାୟ ସମିତିରେ ଋଣ ଅର୍ଥ ହେରଫେର, ଜିଲ୍ଲାପାଳଙ୍କୁ ଗୁହାରି କଲେ ଚାଷୀ
ତେବେ ଏହି ଘଟଣା ପ୍ରଥମ ଥର ନୁହେଁ, ପୂର୍ବରୁ ମଧ୍ୟ ଏପରି ଘଟିଥିଲା । ବ୍ୟାଙ୍କ କର୍ମଚାରୀ ଉକ୍ତ ଜମିକୁ ଦଖଲ କରିବାକୁ ଯାଇଥିଲାବେଳେ ସ୍ଥାନୀୟ ବାସିନ୍ଦା ବିରୋଧ କରିଥିଲେ । ପୋଲିସ ଉପସ୍ଥିତିରେ ଏପରି ଘଟିଥିଲା । ତେବେ ବାଧ୍ୟ ହୋଇ ପୋଲିସ ମଧ୍ୟରାତ୍ରିରେ ସାହିର ଅନେକ ଲୋକଙ୍କୁ ଉଠାଇ ନେଇଥିଲା । ଫଳରେ ପରିସ୍ଥିତି ଆହୁରି ଅଣାୟତ୍ତ ହୋଇପଡ଼ିଥିଲା । କାରଣ ସ୍ଥାନୀୟ ବାସିନ୍ଦା ପୋଲିସର କାର୍ଯ୍ୟାନୁଷ୍ଠାନକୁ ବିରୋଧ କରି ସେତେବେଳେ ରାସ୍ତା ଅବରୋଧ କରିଥିଲେ । ପରିସ୍ଥିତି ବିଗିଡିବାରୁ ପୋଲିସ ସ୍ଥାନୀୟ ଲୋକଙ୍କ ସହ ଆଲୋଚନା କରିଥିଲା ଓ ଉତ୍ତେଜନା କମିଥିଲା । ତେବେ ସ୍ଥାନୀୟ ଲୋକଙ୍କ କହିବା ଅନୁଯାୟୀ ଉକ୍ତ ଜମିକୁ ଚଞ୍ଚକତା କରି ଅନୁପ୍ରାସ ହାତେଇଛନ୍ତି । ଏହା କିନ୍ତୁ ନେତାଜୀ ସଂଘର ଜମି । ଦୀର୍ଘ ବର୍ଷ ଧରି ସାହି ବାସିନ୍ଦା ଏହାକୁ ବ୍ୟବହାର କରି ଆସୁଛନ୍ତି । ତେବେ ଏନେଇ କିନ୍ତୁ ଅନୁପ୍ରାସ କୌଣସି ପ୍ରତିକ୍ରିୟା ଦେଇନାହାନ୍ତି । ବଡ଼କଥା ହେଉଛି ସାଂସଦଙ୍କ ଭାଇ ଅନୁପ୍ରାସ ଏହି ଜମିକୁ ବ୍ୟାଙ୍କରେ ବନ୍ଧକ ରଖି ପ୍ରାୟ ୫୬ ଲକ୍ଷ ଟଙ୍କାର ଋଣ ଆଣିଥିଲେ । ହେଲେ ଏହାକୁ ସୁଝି ନପାରିବାରୁ ବ୍ୟାଙ୍କ ଏହି ଜମିକୁ ଦଖଲକୁ ନେବାକୁ ସବୁପ୍ରକାର ପଦକ୍ଷେପ ନେଉଥିବାବେଳେ ଏହା ସମ୍ଭବ ହୋଇପାରିନାହିଁ ।
ଇଟିଭି ଭାରତ, କଟକ
