କଟକ: ସମ୍ବଲପୁରରେ ଓକିଲଙ୍କ ଉତ୍ତେଜିତ ଆନ୍ଦୋଳନ ଘଟଣାରେ କଠୋର କାର୍ଯ୍ୟାନୁଷ୍ଠାନ ନେଇଛି ବାର କାଉନସିଲ ଅଫ ଇଣ୍ଡିଆ । ପ୍ରଥମ ପର୍ଯ୍ୟାୟରେ ୨୯ ଜଣ ଓ ଦ୍ବିତୀୟ ପର୍ଯ୍ୟାୟରେ ୧୪ ଜଣ ଓକିଲଙ୍କ ଲାଇସେନ୍ସ ରଦ୍ଦ କରିଛି । ଏହାକୁ ନେଇ ତୀବ୍ର ପ୍ରତିକ୍ରିୟା ରଖିଥିଲା ସମ୍ବଲପୁର ବାର ଆସୋସିଏସନ । ବାର କାଉନସିଲ ଅଫ ଇଣ୍ଡିଆର କାର୍ଯ୍ୟାନୁଷ୍ଠାନକୁ ସମାଲୋଚନା କରିଛି ସମ୍ବଲପୁର ବାର ଆସୋସିଏସନ । ଏହାକୁ ନେଇ ପ୍ରତିକ୍ରିୟା ରଖିଛନ୍ତି ରାଜ୍ୟ ଆଇନଜୀବୀ ପରିଷଦର ସଚିବ ।
ଓକିଲଙ୍କ ଲାଇସେନ୍ସ ରଦ୍ଦ କରିବା ଅଧିକାର ବାର କାଉନସିଲ ଅଫ ଇଣ୍ଡିଆ ପାଖରେ ନାହିଁ ବୋଲି ଅଭିଯୋଗ କରିଥିଲା ସମ୍ବଲପୁର ବାର ଆସୋସିଏସନ । ଏହାକୁ ନେଇ ଆଇନଜୀବୀ ପରିଷଦର ସଚିବ ଯଯାତୀ କେଶରୀ ସାମନ୍ତସିଂହାର କହିଛନ୍ତି, "ଏହାକୁ ନେଇ ପୂର୍ବରୁ ମାଡ୍ରାସ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି । ତେଣୁ ନିର୍ଦ୍ଦେଶନାମା ଅନୁଯାୟୀ ଓକିଲଙ୍କ ଲାଇସେନ୍ସ ରଦ୍ଦ କରିବା କ୍ଷମତା ବାର କାଉନସିଲ୍ ଅଫ୍ ଇଣ୍ଡିଆର ରହିଛି ।"
ହାଇକୋର୍ଟ ବେଞ୍ଚ ସ୍ଥାପନା ଦାବିରେ ଓକିଲ ସଂଘ ଧାରଣାରେ ବସିଥିଲେ । ତେବେ ଧାରଣାରୁ ନିବୃତ୍ତ ହେବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଥିଲେ । ଏହି ନିର୍ଦ୍ଦେଶର ଅବମାନନା କରି ଓକିଲ ସଂଘର ଧାରଣା ଜାରି ରହିଥିଲା । ତେବେ ଗତ ଡିସେମ୍ବର ୧୨ ତାରିଖରେ ଏହା ସବୁ ସୀମା ଟପି ଯାଇଥିଲା । ଜିଲ୍ଲା ଜଜ୍ଙ୍କ କୋର୍ଟ ଚାମ୍ବରରେ ପଶି ଆନ୍ଦୋଳନରତ ଓକିଲମାନେ ଭଙ୍ଗାରୁଜା କରିଥିଲ । ଏହାପରେ ପ୍ରଥମ ପର୍ଯ୍ୟାୟରେ ୨୯ ଜଣ ଓ ଦ୍ବିତୀୟ ପର୍ଯ୍ୟାୟରେ ୧୪ ଜଣ ଓକିଲଙ୍କ ଲାଇସେନ୍ସ ରଦ୍ଦ କରିଛି ବାର କାଉନସିଲ ଅଫ ଇଣ୍ଡିଆ ।
ଇଟିଭି ଭାରତ, କଟକ
