ଖୁବଶୀଘ୍ର ଆର୍ଥିକ ସହାୟତା ପାଇବେ କଟକ ବସ୍ତିବାସିନ୍ଦା କଟକ: କାଳବୈଶାଖୀରେ ପ୍ରଭାବିତ ହୋଇଥିବା ବସ୍ତି ବାସିନ୍ଦା ପାଇବେ ଆର୍ଥିକ ସହାୟତା । ଏନେଇ ରାଜ୍ୟ ସରକାରଙ୍କୁ ରିପୋର୍ଟ ଦିଆ ଯାଇଛି । ଯେଉଁଠି ବି ବାସଗୃହ ପ୍ରଭାବିତ ହୋଇଛି ଓ ଅନ୍ୟାନ୍ୟ ସମଗ୍ରୀ ନଷ୍ଟ ହୋଇଛି ସେ ବାବଦରେ ଏକ ତାଲିକା କରଯାଇ ସ୍ୱତନ୍ତ୍ର ରିଲିଫ କମିଶନରଙ୍କୁ ଦିଆଯାଇଛି । ଯାହାଦ୍ୱାରା ଯେଉଁ ବସ୍ତି ବାସିନ୍ଦାମାନେ କାଳ ବୈଶାଖୀ ତାଣ୍ଡବର ଶିକାର ହୋଇଛନ୍ତି ସେମାନଙ୍କର କ୍ଷୟକ୍ଷତିର ଭରଣା ହୋଇପାରିବ ବୋଲି କହିଛନ୍ତି କଟକର ମେୟର ସୁବାସ ସିଂ।
ସେହିପରି ଗତ 2ଟି କାଳ ବୈଶାଖୀରେ କଟକର ଜଗତପୁର ଓ ବାଲିସାହି ବସ୍ତି ଅଧିକ ମାତ୍ରାରେ ପ୍ରଭାବିତ ହୋଇଥିଲା । ତେଣୁ ଏହାକୁ ଦୃଷ୍ଟିରେ ରଖି ଏକ ତତକ୍ଷଣାତ ଏକ ସର୍ଭେ କରାଯାଇଛି । ତେବେ ଆଉ କିଛି ଦିନ ମଧ୍ୟରେ ସେମାନଙ୍କ ମୁହଁରେ ପୁଣି ହସ ଫୁଟି ପାରିବ ବୋଲି କହିଛନ୍ତି ମେୟର । ଗତ ୧୯ତାରିଖ ଅପରାହ୍ନରେ ଭୟଙ୍କର ଝଡବର୍ଷାରେ ପ୍ରଶାସନ ଉଚ୍ଛେଦ କରି ରଖିଥିବା ବସ୍ତି ଓ ଅନ୍ୟାନ୍ୟ ବସ୍ତିଗୁଡିକର କିଛି ଘର ଭାଙ୍ଗିବା ଓ ଅନେକ ଘରର ଆଜବେଷ୍ଟସ୍ ଓ ଟିଣ ସିଟ୍ ଉଡିଯିବା ଦ୍ୱାରା ବହୁ ଆସବାବପତ୍ର ମଧ୍ୟ ନଷ୍ଟ ହୋଇଯାଇଛି ।
ଗତ ଦୁଇ ଦିନ ତଳେ କାଳବୈଶାଖୀ କାରଣରୁ ବ୍ୟାପକ କ୍ଷୟକ୍ଷତି ସହିଥିଲେ କଟକର ବସ୍ତିବାସିନ୍ଦା । ଦୁଇବର୍ଷ ପୂର୍ବରୁ ବସ୍ତି ଗୁଡିକୁ ଆଇନ ସମ୍ମତ ଉପଯୁକ୍ତ ଥଇଥାନ ନକରି ହଜାର ହଜାର ପରିବାରକୁ ନଦୀ ଶଯ୍ୟାରେ ବେଆଇନ ଭାବେ ରଖାଯାଇଥିଲା । ଜଗତପୁର ବିରୂପା କୂଳ ନିମପୁର ଠାରେ ଏବଂ କାଠଯୋଡ଼ି କୂଳ ବାଲିସାହି ଠାରେ ସେମାନେ ସାମୟିକ । ବସ୍ତିଗୁଡିକୁ ଆଇନ ସମ୍ମତ ଥଇଥାନ କରା ନଯାଇ ସ୍ଥାୟୀ ଘର ନଦେବା ଫଳରେ ବସ୍ତି ବାସିନ୍ଦାମାନେ ବାରମ୍ବାର ବିପର୍ଯ୍ୟୟର ସମ୍ମୁଖୀନ ହେଉଥିବା ଅଭିଯୋଗ ହେଉଛି ।
ବର୍ତ୍ତମାନ ସ୍ଥିତିରେ ଜଗତପୁର ନିମପୁରର ବିରୁପା କୂଳ ଓ କାଠଯୋଡି କୂଳ ବାଲିସାହି ବସ୍ତିଗୁଡିକର ଅନେକ ବାସିନ୍ଦା ଖୋଲା ଆକାଶ ତଳେ ପ୍ରବଳ ଗ୍ରୀଷ୍ମ ପ୍ରବାହ ଭିତରେ ଅସହ୍ୟ ଯନ୍ତ୍ରଣା ଭୋଗୁଛନ୍ତି । ଥଇଥାନ ପାଇଁ ପୁର୍ନରୁ ବସ୍ତି ବାସିନ୍ଦାଙ୍କ ମିଳିତ ମଞ୍ଚ ପକ୍ଷରୁ ସିଏମସି ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଝଡ ବର୍ଷାରେ କେତେକ ଘର ସଂପୂର୍ଣ୍ଣ ଭାଙ୍ଗିବା ସହ ସମସ୍ତ ଆସବାବ ପତ୍ର ନଷ୍ଟ ହୋଇଯାଇଥିବାରୁ କ୍ଷତିଗ୍ରସ୍ତ ପରିବାରଗୁଡିକୁ ଅବିଳମ୍ବେ ଘର ନିର୍ମାଣ ଓ ଆନୁସଙ୍ଗିକ ସହାୟତା ଯୋଗାଇ ଦେବ, ପାଇଁ ଦାବି କରଯାଇଥିଲା । ଘଟଣାକୁ ନେଇ ସିଏମସି କର୍ପୋରେଟର ମଧ୍ୟ ସିଏମସିକୁ ଟାର୍ଗେଟ କରିଥିଲେ। ବସ୍ତିବାସିନ୍ଦାଙ୍କୁ ଯଥା ଶୀଘ୍ର ନ୍ୟାୟ ଦେବା ସହ ବସ୍ତି ଅଞ୍ଚଳରେ ଏକ ବାତ୍ୟା ଆଶ୍ରୟସ୍ଥଳୀ ନିର୍ମାଣ ପାଇଁ ଦାବି କରିଥିଲେ କର୍ପୋରେଟର ।
ଇଟିଭି ଭାରତ, କଟକ
