କଟକ: ଚଳିତ ବର୍ଷ ରାଜ୍ୟ ସରକାରଙ୍କ ପକ୍ଷରୁ ଛାତ୍ର ସଂସଦ ନିର୍ବାଚନକୁ ବାତିଲ କରାଯାଇଛି । ଯାହାକୁ ନେଇ ପ୍ରତି କଲେଜ ଓ ୟୁନିଭରସିଟିରେ ଅସନ୍ତୋଷ ଦେଖାଯାଇଛି । ଏପରିକି ଛାତ୍ରଛାତ୍ରୀମାନେ ମନ୍ତ୍ରୀ ଅରୁଣ ସାହୁଙ୍କ କୁଶ ପୁତ୍ତଳିକା ଦାହ କରିବା ସହ କାହିଁକି ନିର୍ବାଚନ ବନ୍ଦ ହେଲା ବୋଲି ପ୍ରଶ୍ନ କରିଛନ୍ତି ଛାତ୍ରଛାତ୍ରୀ । ତେବେ ନିର୍ବାଚନ ବନ୍ଦ ହେବାକୁ ବିରୋଧ କରିଛି ରେଭେନ୍ସା ବିକାଶ ଅଭିଯାନ । ସଂଗଠନ ପକ୍ଷରୁ ଆଜି ଆରଡିସି କାର୍ଯ୍ୟାଳୟ ସାମ୍ନାରେ ବିକ୍ଷୋଭ କରାଯାଇଛି ।
ଅଭିଯାନର ଆବାହକଙ୍କ ଅନୁସାରେ, ନିର୍ବାଚନ ହେଉଛି ଗଣତନ୍ତ୍ରର ଏକ ଅବିଚ୍ଛେଦ୍ୟ ଅଙ୍ଗ । ଛାତ୍ରମାନଙ୍କୁ ଛାତ୍ର ସମୟରୁ ରାଜନୀତି ସଂପର୍କରେ ଧାରଣା ଦେବା ପାଇଁ ଏହି ନିର୍ବାଚନ ହେବା ଦରକାର ବୋଲି କହିଛନ୍ତି । କାରଣ ରେଭେନ୍ସାରେ ନିର୍ବାଚନ ବନ୍ଦ ହେଲେ ବିଶ୍ବବିଦ୍ୟାଳୟର ଉନ୍ନତି ଅସମ୍ଭବ। ଯଦି ଛାତ୍ର ନେତା ନିର୍ବାଚିତ ନ ହୁଅନ୍ତି ତେବେ ଉଚ୍ଚ ପଦସ୍ଥ ଅଧିକାରୀଙ୍କ ଆଗରେ କିଏ ଅସୁବିଧା ସମୂହକୁ ଉପସ୍ଥାପିତ କରିବ । ତେଣୁ ଛାତ୍ର ନିର୍ବାଚନକୁ କରାଇବା ପାଇଁ ରାଜ୍ୟ ସରକାରଙ୍କୁ ନିବେଦନ କରିଛି ରେଭେନ୍ସା ବିକାଶ ଅଭିଯାନ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
