ନିଆଳି: ପଞ୍ଚାୟତ ନିର୍ବାଚନ ଯେତେ ପାଖେଇ ଆସୁଛି ପ୍ରାର୍ଥୀଙ୍କ ମଧ୍ୟରେ ସେତେ ମୁହାଁମୁହିଁ ପରିସ୍ଥିତି ସୃଷ୍ଟି ହେଉଛି । ଓ୍ବାର୍ଡ ମେମ୍ବର ପ୍ରାର୍ଥୀତ୍ବକୁ ନେଇ ଯୁବକଙ୍କୁ ହୋଇଛି ପ୍ରାଣାନ୍ତକ ଆକ୍ରମଣ । ନିଆଳି ନିର୍ବାଚନ ମଣ୍ଡଳୀ ଅନ୍ତର୍ଗତ କଣ୍ଟାପଡ଼ା ବ୍ଲକ୍ ଅଡ଼ଶପୁର ପଞ୍ଚାୟତରେ ଏଭଳି ଘଟଣା ଦେଖିବାକୁ ମିଳିଛି । ସଳଇ ବେଦପୁର ୧୨ ନମ୍ବର ୱାର୍ଡ ମେମ୍ବର ପ୍ରଭାବ କୁମାର ରାୟଙ୍କ ଉପରେ ଏହି ଆକ୍ରମଣ ହୋଇଛି । ଗୌତମ ଖଟାଇ ନାମକ ବ୍ୟକ୍ତି ପ୍ରଭାବଙ୍କୁ ନିର୍ବାଚନ ନ ଲଢ଼ିବା ପାଇଁ ଧମକାଇଛନ୍ତି ।
ଆଗାମୀ ନିର୍ବାଚନରେ ପ୍ରାର୍ଥୀତ୍ବକୁ ନେଇ ବିବାଦ ଲାଗି ରହିଥିଲା । ଏହାକୁ ନେଇ ଗୌତମ ଏକ TATA ACE ଗାଡ଼ି ନେଇ ପ୍ରଭାବ କୁମାର ରାୟଙ୍କୁ ଧକ୍କା ଦେଇ ମାରିବାକୁ ଚେଷ୍ଟା କରିଥିଲେ । ସେହି ଗାଁରେ ସନ୍ତୋଷ ପରିଡ଼ା ନାମକ ବ୍ୟକ୍ତି ଏହି ଆକ୍ରମଣ କରାଇଥିବା ନେଇ ପ୍ରଭାବଙ୍କ ପରିବାର ପକ୍ଷରୁ ଅଭିଯୋଗ ହୋଇଛି । ଗାଡ଼ିରେ ଧକ୍କା ଦେବା ପରେ ପ୍ରଭାବଙ୍କୁ ଗୌତମ ଗାଳିଗୁଲଜ କରିଥିବା ଅଭିଯୋଗ ହୋଇଛି ।
ଏନେଇ ଓଲଟପୁର ଥାନାରେ ଅଭିଯୋଗ ହୋଇଛି । ସେପଟେ ପ୍ରଭାବଙ୍କୁ ପ୍ରଥମେ ଅଡ଼ଶପୁର ମେଡିକାଲରେ ଭର୍ତ୍ତି କରାଯାଇଥିଲା ପରେ ତାଙ୍କ ସ୍ବାସ୍ଥ୍ୟାବସ୍ଥାରେ ଉନ୍ନତି ନହେବାରୁ ତାଙ୍କୁ କଟକ ମେଡିକାଲକୁ ସ୍ଥାନାନ୍ତର କରାଯାଇଛି ।
ନିଆଳିରୁ ଉମେଶ ଚନ୍ଦ୍ର ମଲ୍ଲିକ, ଇଟିଭି ଭାରତ
