କଟକ: ବର୍ଷକୁ ବର୍ଷ କମୁଛି ମାଟ୍ରିକ ପରୀକ୍ଷାର୍ଥୀଙ୍କ ପାସ୍ ହାର । ଖାସ କରି ଗତ ୨ ବର୍ଷ ହେବ ପାସ୍ ପ୍ରତିଶତ ବିପୁଳ ବ୍ୟବଧାନରେ ହ୍ରାସ ପାଇଛି । ଅଧିକ ପରିମାଣରେ ଛାତ୍ରଛାତ୍ରୀ ଫେଲ ହେଉଛନ୍ତି । ଏହା କାହିଁକି ଓ କିପରି ହେଉଛି ? ଏ ନେଇ କାରଣ ଖୋଜି ନିର୍ଯ୍ୟାସରେ ପହଞ୍ଚିଛି ବୋର୍ଡ ।
କପି ରୋକିବା ସଫଳତା ହିଁ ପରୀକ୍ଷାରେ ବିଫଳ ହେବାର କାରଣ । ପୂର୍ବ ଅପେକ୍ଷା ବର୍ତ୍ତମାନ ସମୟରେ ପରୀକ୍ଷା ହଲରେ କଡା ସିକ୍ୟୁରିଟି ବ୍ୟବସ୍ଥା ଯୋଗୁଁ କପି ଉପରେ ଲଗାମ ଲାଗିଛି । ଯେଉଁଥିପାଇଁ ରେଜଲ୍ଟ ମଧ୍ୟ କମିଛି ବୋଲି ବୋର୍ଡ ପକ୍ଷରୁ କୁହାଯାଇଛି ।
କପି ରୋକିବାକୁ ଗତ ୨ ବର୍ଷ ହେବ ବିଭିନ୍ନ ପ୍ରକାର ପଦକ୍ଷେପ ନେଉଛି ଓଡିଶା ମାଧ୍ୟମିକ ଶିକ୍ଷା ପରିଷଦ ।
ପୂର୍ବରୁ ମାଟ୍ରିକ ପରୀକ୍ଷାର୍ଥୀମାନେ ନିଜ ନିଜ ସ୍କୁଲରେ ପରୀକ୍ଷା ଦେଉଥିଲେ । ଫଳରେ ସେମାନେ ସେଠାରେ କପି କରି ପାସ୍ ହେବାକୁ ସୁଯୋଗ ପାଉଥିଲେ । କିନ୍ତୁ ଗତ ୨ ବର୍ଷ ହେଲା ପରୀକ୍ଷା କେନ୍ଦ୍ରକୁ ପରିବର୍ତ୍ତନ କରାଯାଉଛି । ନିଜ ସ୍କୁଲ ବଦଳରେ ଅନ୍ୟ ସ୍କୁଲରେ ପରୀକ୍ଷା କେନ୍ଦ୍ର କରାଯାଉଛି । କେଵଳ ସେତିକି ନୁହେଁ ପରୀକ୍ଷା ସମୟରେ ବିଭିନ୍ନ ସ୍କ୍ୱାର୍ଡ ମଧ୍ୟ କେନ୍ଦ୍ର ଭିତରେ କପି ଯାଞ୍ଚ କରୁଛନ୍ତି । ସେହିପରି ଅନେକ କେନ୍ଦ୍ରରେ ମଧ୍ୟ ସିସିଟିଭି ଲଗାଯାଇଛି । ଫଳରେ ଅନେକ ଛାତ୍ରଛାତ୍ରୀ କପି କରିବାରେ ବିଫଳ ହୋଇ ଫେଲ ହେଉଛନ୍ତି ।
ଆଗାମୀ ବର୍ଷଠୁ ସମସ୍ତ ପରୀକ୍ଷା କେନ୍ଦ୍ରରେ ସିସିଟିଭି ଲଗାଯିବ ବୋଲି ନିଷ୍ପତ୍ତି ନିଆଯାଇଛି । ଦେଖିବାକୁ ଗଲେ ଦିନକୁ ଦିନ କଠୋର ହେଉଛି ବୋର୍ଡ଼ । ଅସାଧୁ ଉପାୟରେ ପାସ୍ କରିବାକୁ ଚାହୁଁ ଥିବା ପରୀକ୍ଷାର୍ଥୀ ବିଫଳ ହେଉଛନ୍ତି ବୋଲି ବୋର୍ଡ଼ ସଭାପତି ଜଣାଇଛନ୍ତି ।
କଟକରୁ ନାରାୟଣ ସାହୁ, ଇଟିଭି ଭାରତ
