କଟକ: ରାଜ୍ୟବାସୀଙ୍କୁ ଉନ୍ନତ ସ୍ବାସ୍ଥ୍ୟ ସେବା ଯୋଗାଇବାରେ ସୁନାମ ଅର୍ଜନ କରିଥିବା କଟକର ଗାରିମାରେ ଲାଗିଛି କଳଙ୍କ । ବେଆଇନ ଭାବେ ଲିଙ୍ଗ ନିରୂପଣ ଏବଂ ଗର୍ଭପାତ କରାଯାଉଥିବା ଏକ ବିରାଟ ରାକେଟର ପର୍ଦ୍ଦାଫାଶ କରିଛି କଟକ କମିଶନରେଟ ପୋଲିସ । ଏହି ରାକେଟର ଚେର ରାଜ୍ୟର 10ଟି ଜିଲ୍ଲାକୁ ଲମ୍ବିଥିବା ପୋଲିସ ସ୍ପଷ୍ଟ କରିଥିବା ବେଳେ ଏହି ବେଆଇନ କାର୍ଯ୍ୟ କରିବା ଅଭିଯୋଗରେ ଗୋଟିଏ ଲ୍ୟାବକୁ ସିଲ୍ କରାଯାଇଥିବା ବେଳେ ୨ ଜଣଙ୍କୁ କରିଛି ପୋଲିସ । ଉଭୟଙ୍କୁ ଗିରଫ କଲା ମଙ୍ଗଳାବାଗ ପୋଲିସ। ଅଲ୍ଟ୍ରାସାଉଣ୍ଡ ମେସିନ ସହ 19 ହଜାର ଟଙ୍କା ଜବତ। ଲିଙ୍ଗ ନିରୂପଣ ଅଭିଯୋଗରେ ମଙ୍ଗଳାବାଗର ଆଲଫା ଡାଇଗନଷ୍ଟିସ ସେଣ୍ଟରରେ ରେଡ଼ କରିଥିଲା ପୋଲିସ।
କାଠଗୋଲା ଅଞ୍ଚଳର ଏକ ଗଳିରେ ପ୍ରାୟ ୨ ବର୍ଷ ହେଲା ଚାଲିଥିଲା ପାଥୋ ଲ୍ୟାବ। ପ୍ରାୟ ଗୋଟିଏ ବର୍ଷ ଧରି ଏହି ଲ୍ୟାବରେ ବେଆଇନ ଲିଙ୍ଗ ନିରୂପଣ ହେଉଥିବାର ଅଭିଯୋଗ ମଧ୍ୟ ହେଉଥିଲା । ତେବେ ଏହି କଳା କାରନାମାକୁ ରଙ୍ଗେ ହାତ ଧରିବା ପାଇଁ ପୋଲିସ ରଚନା କରିଥିଲା ଏକ ସୁଚିନ୍ତିତ ଯୋଜନା । ଏହି ଯୋଜନାରେ ପୋଲିସ ଜଣେ ସ୍ବେଚ୍ଛାସେବୀ ମହିଳାଙ୍କ ସହାୟତା ନେଇଥିଲା । ସମ୍ପୃକ୍ତ ମହିଳା ଜଣକ ନିଜକୁ ଗର୍ଭବତୀ ଦର୍ଶାଇବା ସହ ତାଙ୍କ ଗର୍ଭସ୍ଥ ଶିଶୁର ଲିଙ୍ଗ ନିରୂପଣ କରିବା ପାଇଁ ଚାହୁଁଥିବା କଥା କହିବା ପରେ ଲ୍ୟାବର କର୍ମଚାରୀମାନେ ଏଥିପାଇଁ 5 ହଜାର ଟଙ୍କା ଲାଗିବ ବୋଲି କହିଥିଲେ ।
ଏହାର ଠୋସ ପ୍ରମାଣ ପାଇବା ପରେ ବାହାରେ ସାଧା ପୋଷାକରେ ଅପେକ୍ଷା କରି ରହିଥିବା ପୋଲିସ କର୍ମଚାରୀ ତୁରନ୍ତ ସେଠାରେ ପହଁଚି ଯାଇଥିଲେ । ଆଉ ଏକ ଚାଞ୍ଚଲ୍ୟକର ତଥ୍ୟ ମୁତାବକ ଲିଙ୍ଗ ନିରୂପଣ ପରେ ଗର୍ଭସ୍ଥ ଭୃଣ କନ୍ୟା ସନ୍ତାନ ବୋଲି ଜଣାପଡ଼ିବା ପରେ ଗର୍ଭପାତ କରାଇବାର ବ୍ୟବସ୍ଥା ମଧ୍ୟ ଲ୍ୟାବର କର୍ମଚାରୀମାନେ କରୁଥିଲେ । କଥା କେବଳ ଏତିକିରେ ଶେଷ ହୋଇନାହିଁ ସମ୍ପୃକ୍ତ ଲ୍ୟାବର କର୍ମଚାରୀ କଟକ ସମେତ ରାଜ୍ୟର ପ୍ରାୟ 10ଟି ଜିଲ୍ଲାରେ ଥିବା ଦଲାଲ ମାନଙ୍କ ଜରିଆରେ ଏଠାକୁ ଗର୍ଭବତୀଙ୍କୁ ପଠାଉଥିବା କହିଛନ୍ତି କଟକ ଡିସିପି ।
ଗର୍ଭବତୀଙ୍କ ଲିଙ୍ଗ ନିରୂପଣକୁ ଅପରାଧ ଭାବେ ବିବେଚନା କରାଯାଇଛି । ଏହା ସତ୍ତ୍ବେ କଟକରେ ବେଧଡ଼କ ଭାବେ ଚାଲିଥିଲା ଏହି ବେଆଇନ କାର୍ଯ୍ୟ । ଏହାର ପର୍ଦ୍ଦାଫାଶ କରିବା ସହିତ ଲିଙ୍ଗ ନିରୂପଣ କରୁଥିବା ଏକ ଗ୍ୟାଙ୍ଗକୁ ଧରିଛି ପୋଲିସର ଏକ ସ୍ବତନ୍ତ୍ର ଟିମ । ଏହା ଅଭିଯୋଗରେ ମଙ୍ଗଳବାଗର କାଠଗୋଲା ଅଞ୍ଚଳରେ ଥିବା ଆଲଫା ହେଲଥ କେୟାର ନାମକ ଲ୍ୟାବକୁ ପୋଲିସ ସିଲ କରିବା ସହ ଲିଙ୍ଗ ନିରୂପଣ କରୁଥିବା ଲ୍ୟାବର ୨ ଜଣ କର୍ମଚାରୀଙ୍କୁ ମଧ୍ୟ ପୋଲିସ ଅଟକ ରଖିଛି ।
ବଡ଼ କଥା ହେଉଛି କି ଏହି ଲ୍ୟାବର ସାଇନ ବୋର୍ଡରେ ଲେଖାଥିବା ଡାକ୍ତର ଏଠାକୁ ଆସୁ ନ ଥିଲେ କି ଏହି ଲ୍ୟାବଟି ଚଳାଇବାକୁ ଅନୁମତି ମଧ୍ୟ ଜିଲ୍ଲା ସ୍ବାସ୍ଥ୍ୟ ବିଭାଗ ଦେଇନଥିଲା । ଏପରିକି ଅଲ୍ଟ୍ରା ସାଉଣ୍ଡ ମେସିନ ଜରିଆରେ ଲିଙ୍ଗ ନିରୂପଣ କରୁଥିବା ବ୍ୟକ୍ତି ଜଣଙ୍କର ଶିକ୍ଷାଗତ ଯୋଗ୍ୟତା ମାତ୍ର ଯୁକ୍ତ ଦୁଇ ରହିଥିଲା ।
ଏବେ ପ୍ରଶ୍ନ ଉଠୁଛି,ଦୀର୍ଘ ଦିନ ଧରି ଏଭଳି ବେଆଇନ ଭାବେ ଚାଲୁଥିବା ଲ୍ୟାବକୁ ପୂର୍ବରୁ କେହି କେମିତି ଜାଣିପାରୁ ନଥିଲେ କାହିଁକି ? ସହରରେ ଆଉ କେତୋଟି ଲ୍ୟାବରେ ଏପରି ବେଆଇନ କାରବାର ହେଉଛି ? ବାରମ୍ବାର ଏହିପରି ଚଢ଼ାଉ କରାଗଲେ ଏହା ଉପରେ ଅଙ୍କୁଶ ଲଗାଯାଇ ପାରିବ ବୋଲି ସାଧାରଣରେ ମତ ପ୍ରକାଶ ପାଇଛି ।
କଟକରୁ ନାରାୟଣ ସାହୁ, ଇଟିଭି ଭାରତ
