କଟକ: ସହରରେ ପୁଣିଥରେ ଜଣ୍ଡିସ ଆତଙ୍କ । କଟକ ମହାନଗର ନିଗମର 13,18 ଓ 19 ନମ୍ବର ୱାର୍ଡରେ ଏବେ ଜଣ୍ଡିସ ବ୍ୟାପିବାରେ ଲାଗିଛି । ଗଙ୍ଗାମନ୍ଦିର ଅଞ୍ଚଳର ପାଖାପାଖି 30 ରୁ ଉର୍ଦ୍ଧ୍ବ ଲୋକ ଜଣ୍ଡିସରେ ଆକ୍ରାନ୍ତ ହୋଇସାରିଲେଣି । ତେବେ ଉକ୍ତ ଅଞ୍ଚଳରେ ନାଳ ପାଣି, ପିଇବା ପାଣିରେ ମିଶି ପାଣି ଦୂଷିତ ହେବାରୁ ଦୂଷିତ ପାଣି ପିଇ ଏଭଳି ସମସ୍ୟାର ସମ୍ମୁଖୀନ ହେଉଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି । ଅନ୍ୟପଟେ ଜଣ୍ଡିସ ଆକ୍ରାନ୍ତ ଅଞ୍ଚଳରେ ମହିଳା ଓ ଯୁବ କଂଗ୍ରେସ ଜଣ୍ଡିସ ଆକ୍ରାନ୍ତଙ୍କ ପାଖରେ ପହଞ୍ଚି, ସେମାନଙ୍କ ସ୍ବାସ୍ଥ୍ୟାବସ୍ଥା ପଚାରି ବୁଝିବା ସହ ସହ ସମସ୍ୟାର ତୁରନ୍ତ ସମାଧାନ ପାଇଁ ଦାବି କରିଛନ୍ତି।
ସହରର ଗଙ୍ଗା ମନ୍ଦିର ଅଞ୍ଚଳରେ କାୟାବିସ୍ତାର କରିଛି ଜଣ୍ଡିସ । ଜଣେ କି ଦୁଇ ଜଣ ନୁହେଁ ଏଠାରେ ପ୍ରାୟ ୩୦ ରୁ ଅଧିକ ଲୋକ ଜଣ୍ଡିସ ରୋଗରେ ଆକ୍ରାନ୍ତ ହୋଇଛନ୍ତି । ଯାହାକୁ ନେଇ ସ୍ଥାନୀୟ ଅଞ୍ଚଳର ଲୋକ ଭୟଭୀତ ଅବସ୍ଥାରେ ଅଛନ୍ତି। ଏଠାରେ ଆସୁଥିବା ପାଇପ ପାଣି ଦୂଷିତ ହୋଇଛି ବୋଲି ଅଭିଯୋଗ କରିଛନ୍ତି ସ୍ଥାନୀୟ ବାସିନ୍ଦା । ତେଣୁ ଉକ୍ତ ଅଞ୍ଚଳରେ ଦୂଷିତ ପିଇବା ପାଣି ଜଣ୍ଡିସ ବ୍ୟାପିବାର ପ୍ରମୁଖ କାରଣ ବୋଲି ଅଭିଯୋଗ ଆଣିଛନ୍ତି ସ୍ଥାନୀୟ ଲୋକେ।
ଅନ୍ୟପଟେ ଖବର ପାଇ କଂଗ୍ରେସର ଏକ ପ୍ରତିନିଧି ଦଳ ଜଣ୍ଡିସ ଆକ୍ରାନ୍ତ ଅଞ୍ଚଳରେ ପହଞ୍ଚି ଲୋକଙ୍କ ସମସ୍ୟା ପଚାରି ବୁଝିଛନ୍ତି । ଘରେ ଘରେ ବୁଲି ଜଣ୍ଡିସ ଆକ୍ରାନ୍ତଙ୍କୁ ଭେଟିବା ସହ ସେମାନଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ପଚାରି ବୁଝିଛନ୍ତି । ତେବେ କଟକ ବାରବାଟୀ ବିଧାୟକଙ୍କ ନିର୍ଦ୍ଦେଶରେ ଏହି ପ୍ରତିନିଧି ଦଳ ଜଣ୍ଡିସ ଆକ୍ରାନ୍ତ ଅଞ୍ଚଳରେ ପହଞ୍ଚି ରିପୋର୍ଟ ସଂଗ୍ରହ କରିଛନ୍ତି । ଏପର୍ଯ୍ୟନ୍ତ କୌଣସି ପ୍ରଶାସନିକ ଅଧିକାରୀ ଉକ୍ତ ଅଞ୍ଚଳରେ ପହଞ୍ଚି ନାହାଁନ୍ତି । ସହରରେ ଜଣ୍ଡିସ ଭଳି ମାରାତ୍ମକ ରୋଗ ଦେଖାଯାଇଥିବା ବେଳେ ସିଏମସି କିମ୍ବା ଜିଲ୍ଲା ପ୍ରଶାସନର କୌଣସି କାର୍ଯ୍ୟକ୍ରମ କରୁନଥିବା ଅଭିଯୋଗ କରିଛନ୍ତି ଏହି ପ୍ରତିନିଧି ଦଳ । ତେବେ ଏହି ସମସ୍ୟାର ତୁରନ୍ତ ସମାଧାନ କରିବାକୁ ଦାବି କରିଛନ୍ତି କଂଗ୍ରେସର ଏହି ପ୍ରତିନିଧି ଦଳ ।
କଟକରୁ ନାରାୟଣ ସାହୁ, ଇଟିଭି ଭାରତ
