କଟକ: ପାଖେଇ ଆସୁଛି ଆଲୋକର ପର୍ବ ଦୀପାବଳି । ଯାହା ହିନ୍ଦୁମାନଙ୍କ ଏକ ମୁଖ୍ୟ ପର୍ବ । ପରମ୍ପରା ଅନୁସାରେ ଘରେ ଘରେ ଜଳିବ ଦୀପ ଆଉ ଖେଳିବ ଆନନ୍ଦର ଲହରୀ । ତେବେ ଦୀପାବଳିକୁ ନେଇ ଏବେଠୁ ଚଳଚଞ୍ଚଳ ହେଲାଣି ସିଲଭରସିଟି । ସବୁଆଡେ ଜୋରସୋରସେ ଚାଲିଛି ଦୀପ ପ୍ରସ୍ତୁତି । କିନ୍ତୁ ଏଥର କୌଣସି ମାଟି ଦୀପ ନୁହେଁ କି ଟେରାକୋଟା ଦୀପ ନୁହେଁ, ଗୋବରରୁ ପ୍ରସ୍ତୁତ ପଞ୍ଚଗବ୍ୟ ଦୀପର ରହିଛି ଅଧିକ ଚାହିଦା। ଯାହାକୁ ପ୍ରସ୍ତୁତ କରୁଛନ୍ତି କଟକ ନୂଆପଡା ଅଞ୍ଚଳର ରବୀନ୍ଦ୍ରନାଥ ଓ ତାଙ୍କ ପତ୍ନୀ। ପ୍ରଦୁଷଣ ମୁକ୍ତ ଦୀପାବଳି ପାଇଁ ଏହି ନୂଆ ପ୍ରୟାସ କରିଛନ୍ତି କଟକର ଏହି ଦମ୍ପତି ।
ଅପରପଟେ ଏହି ଦୀପ ସମ୍ପୂର୍ଣ ରୂପରେ ମାଟି ଦୀପଠାରୁ ଭିନ୍ନ । ଏହି ପଞ୍ଚଗବ୍ୟ ଦୀପକୁ ସାଧାରଣ ଦୀପ ଭଳି ତେଲ ଓ ଶଳିତାର ବ୍ୟବହାର କରି ଦୀପ ଜାଳି ହେବ । ତେଲ ଶେଷ ହେବା ପରେ ଦୀପପାତ୍ରଟି ସମ୍ପୂର୍ଣ ଜଳି ପାଉଁଶ ହୋଇଯାଉଛି ଏବଂ ସେହି ପାଉଁଶକୁ ପୁଣି ସାର ରୂପେ ଗଛରେ ବ୍ୟବହାର କରିହେଉଛି। ଏହା ଦ୍ଵାରା ବାୟୁ ମଧ ପ୍ରଦୂଷଣ ହେବ ନାହିଁ ବରଂ ଶୁଦ୍ଧ ହେବ । ତେବେ ଗୋମାତାର ସୁରକ୍ଷା ଓ ଗାଇର ଜୈବିକ ପଦାର୍ଥର ପ୍ରଚାର ପ୍ରସାର ପାଇଁ ଏହି ନୂଆ ବାଟ ଆପଣାଇଛନ୍ତି ରବିନ୍ଦ୍ରଙ୍କ ପରିବାର । ଗତ ବର୍ଷ ସିମୀତ ସଂଖ୍ୟାରେ ଏହି ଦୀପ ପ୍ରସ୍ତୁତ କରାଯାଇଥିବା ବେଳେ ଏଥର ଏହି ସଂଖ୍ୟା ଢେର ବଢିଛି । ଏସବୁ ଦୀପର ବଜାରରେ ବେଶ ଚାହିଦା ରହିଛି ଏବଂ ଏହା ପ୍ରଦୂଷଣ ମୁକ୍ତ ତଥା ପରିବେଶ ଉପଯୋଗୀ ହୋଇଥିବାରୁ ଏହାକୁ ଗ୍ରାହକ ଖୁବ୍ ପସନ୍ଦ କରୁଛନ୍ତି ।
କୋରୋନା ମହାମାରୀ ସମୟରେ କେବଳ ଦୀପାବଳି ପାଳନ କରିବା ପାଇଁ ପରାମର୍ଶ ଦିଆଯାଇଛି । ଯେଉଁଥିରେ ବାଣକୁ ଉପେକ୍ଷା କରାଯାଇ ଦୀପ ଜଳିବାକୁ ଦିଆଯାଇଛି ପରାମର୍ଶ। ତେଣୁ ଏହି ପଞ୍ଚଗବ୍ୟର ଦୀପ ଏବେ ଅନେକଙ୍କ ପସନ୍ଦ ପାଲଟିଛି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
