କଟକ: ରାତି ପାହିଲେ ସାରା ଦେଶ ପାଳିବ ଆଲୋକର ପର୍ବ ଦୀପାବଳି । ରବିବାର ଦୀପାବଳି ଥିବାବେଳେ ଶନିବାର ସକାଳେ କଟକ ଜଗତପୁରସ୍ଥିତ ବାଣ ଗୋଦାମରେ ଚଢାଉ କରିଛି ଜଗତପୁର ପୋଲିସ । ଚଢାଉ ବେଳେ ବିପୁଳ ପରିମାଣର ବାଣ ଓ ବାଣ ତିଆରି ସାମଗ୍ରୀ ଜବତ ହୋଇଛି । ଏଥିସହିତ ଘଟଣାରେ 3 ଜଣଙ୍କୁ ଅଟକ ରଖିଛି ପୋଲିସ । ଜବତ ବାଣର ଆନୁମାନିକ ମୂଲ୍ୟ 5 ଲକ୍ଷ ଟଙ୍କାରୁ ଊର୍ଦ୍ଧ୍ବ ହେବ ବୋଲି ଜଣାପଡିଛି ।
ଇସଲାମପୁର, ତ୍ରିଲୋଚନପୁର ଆଦି ଅଞ୍ଚଳରେ ବେଆଇନ ବାଣ ଗୋଦାମ ଚାଲିଥିବା ନେଇ ବିଶେଷ ସୂତ୍ରରୁ ଖବର ପାଇଥିଲା ପୋଲିସ । ଏହି କ୍ରମରେ ଶନିବାର ସକାଳେ ଉକ୍ତ ସ୍ଥାନ ଗୁଡିକରେ ଜଗତପୁର ଥାନା ପୋଲିସ ଚଢାଉ କରିଥିଲା । ତେବେ ଉକ୍ତ ଘଟଣାରେ ବାଣ ଚାଲାଣ କରାଯାଉଥିବା ଗୋଟିଏ ପିକଅପ୍ ଗାଡି ଜବତ କରିଛି ପୋଲିସ । ବେଆଇନ ଭାବେ ବାଣ ପ୍ରସ୍ତୁତ କରିବା ଅଭିଯୋଗରେ 3 ଜଣଙ୍କୁ ଥାନାରେ ଅଟକ ରଖି ପଚରାଉଚରା ଜାରି ରଖିଛି । ଏଥି ସହ ବାଣ ପ୍ରସ୍ତୁତ ପାଇଁ ଲୁହା ଗୁଣ୍ଡ, ରଙ୍ଗ ଆଦି ସାମଗ୍ରୀ ଜବତ ହୋଇଛି ।
କଟକରୁ ନାରାୟଣ ସାହୁ, ଇଟିଭି ଭାରତ
