କଟକ: ବରଗଡ଼ ଜିଲ୍ଲା ଭେଡେନ ଥାନା ରୂପାପଲ୍ଲୀ ଗାଁରେ ହୋଇଥିବା 3ଦଳିତ ମହିଳାଙ୍କୁ ଗଣଧର୍ଷଣ ଓ 2ଜଣଙ୍କୁ ହତ୍ୟା ଅଭିଯୋଗ ମାମଲାରେ ରାଜ୍ୟ ମାନବଧିକାର କମିଶନଙ୍କ ନିର୍ଦ୍ଦେଶ ଦେଇଥିଲେ । କିନ୍ତୁ ତଦନ୍ତ କରି ରିପୋର୍ଟ ଦାଖଲ କରୁନଥିବାରୁ କମିଶନ ବରଗଡ଼ ଏସ୍ପିଙ୍କ ଉପରେ ଅତ୍ୟନ୍ତ କ୍ଷୋଭ ପ୍ରକାଶ କରିଛନ୍ତି।
5 ମାସ ହେଲା କମିଶନ ନିର୍ଦ୍ଦେଶ ଦେଇଥିଲେ ମଧ୍ୟ ଏସ୍ପି ଉକ୍ତ ଘଟଣା ଉପରେ କୌଣସି ତଦନ୍ତ କରିନାହାନ୍ତି। ଏଭଳି ଗୁରୁତ୍ବପୂର୍ଣ୍ଣ ଘଟଣାରେ ଏସ୍ପି ଆଦୌ ଚିନ୍ତିତ ନୁହଁନ୍ତି ବୋଲି କମିଶନ ମତ ଦେଇଛନ୍ତି। ତେଣୁ ଏ ସମ୍ପର୍କରେ ତଦନ୍ତ ପାଇଁ କମିଶନ ଉତ୍ତରାଞ୍ଚଳ ଡିଆଇଜିଙ୍କୁ ନିର୍ଦ୍ଦେଶ ଦେଇଛନ୍ତି ।
ସୂଚନାଯୋଗ୍ୟ, କଙ୍ଗାରୁକୋର୍ଟ ଦ୍ବାରା ବାସନ୍ଦ ହୋଇଥିବା ଗୋଟିଏ ପରିବାରର 3 ମହିଳାଙ୍କୁ ଗତ 2016 ମସିହା ସେପ୍ଟେମ୍ବର 23 ତାରିଖରେ ଭେଡେନ ଥାନାର କିଛି ପୋଲିସ କର୍ମଚାରୀ ଘରୁ ପୋଲିସ ଭ୍ୟାନରେ ଉଠାଇ ନେଇ ଧର୍ଷଣ କରିଥିଲେ। ପରେ ଗାଁ ଲୋକଙ୍କ ହାତରେ ଏହି ମହିଳା ଙ୍କୁ ସମର୍ପଣ କରିଦେଇଥିଲେ। ଗାଁର କିଛି ଲୋକ ସେମାନଙ୍କୁ 10 ଦିନ ଜଙ୍ଗଲରେ ରଖି ବାରମ୍ବାର ବଳାତ୍କାର କରିଥିବାର ଅଭିଯୋଗ ହୋଇଥିଲା। ସେମାନଙ୍କ ମଧ୍ୟରୁ ଜଣେ ଖସି ଆସି ଥିବା ବେଳେ,ଆଉ 2 ଜଣଙ୍କୁ ସେମାନେ ହତ୍ୟା କରିଥିବା ଅଭିଯୋଗ ହୋଇଥିଲା। ତେବେ ଖସି ଆସିଥିବା ମହିଳା ଜଣକ ମାନବଧିକାର କମିଶନଙ୍କ ନିକଟରେ ଅଭିଯୋଗ କରିଥିଲେ।
ଆବେଦନକାରୀଙ୍କ ପରିବାର ପକ୍ଷରୁ ରେଜଷ୍ଟ୍ରି ଡାକ ଯୋଗେ ଦିଆଯାଇଥିବା ଅଭିଯୋଗ ଉପରେ ବରଗଡ ଏସପି କି କାର୍ଯ୍ୟାନୁଷ୍ଠାନ ନେଇଛନ୍ତି, ତାହା କୋର୍ଟକୁ ଜଣାଇବାଲାଗି କମିଶନ ଗତ ମାର୍ଚ୍ଚ 15ରେ ନିର୍ଦ୍ଦେଶ ଦେଇଥିଲେ। ଏହାରି ମଧ୍ୟରେ 5 ମାସ ବିତିଗଲାଣି, ତଥାପି ପୋଲିସ ଚୁପ ବସିଛି। ତେବେ ପୋଲିସର ଏଭଳି ଆଭିମୁଖ୍ୟ ଉପରେ କମିଶନ କ୍ଷୁବ୍ଧ ହୋଇଛନ୍ତି।
ତେଣୁ ଉତ୍ତରାଞ୍ଚଳ ଡ଼ିଆଇଜି ଏହାର ତଦନ୍ତ କରି ରିପୋର୍ଟ ଦେବାକୁ କମିଶନ ନିର୍ଦ୍ଦେଶ ଦେଇଛନ୍ତି। ତେବେ 4 ସପ୍ତାହ ମଧ୍ୟରେ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି କମିଶନ।
କଟକରୁ ନାରାୟଣ ସାହୁ, ଇଟିଭି ଭାରତ
