କଟକ: ନେତାଜୀ ବସ୍ ଟର୍ମିନାଲ୍ ପାଇଁ କାଳୀ ମନ୍ଦିର ଉଚ୍ଛେଦ ଉପରେ ହାଇକୋର୍ଟ ଲଗେଇଥିବା ରହିତାଦେଶ ପରେ ସ୍ଥିତି ଅନୁଧ୍ୟାନ କଲା ଜିଲ୍ଲା ପ୍ରଶାସନ । ଲୋକଙ୍କ ସୁବିଧା, ବସ୍ ଯିବା ଆସିବା ସୁବିଧା କେମିତି ସଠିକ ହୋଇପାରିବ, ସେ ନେଇ ସ୍ଥିତି ଅନୁଧ୍ୟାନ କରିଥିଲେ RDC , ଜିଲ୍ଲାପାଳ ଓ ସିଏମସି କମିଶନର । ଶ୍ମଶାନ ସହ କିଛି ଧର୍ମାନୁଷ୍ଠାନକୁ କିପରି ଅନ୍ୟତ୍ର ସ୍ଥାନରେ ସ୍ଥାନାନ୍ତରିତ କରାଯାଇ ତାର ରକ୍ଷଣାବେକ୍ଷଣା ସଠିକ ଭାବରେ କରାଯାଇପାରିବ, ତାକୁ ନେଇ ଅଧିକ ଗୁରୁତ୍ବ ଦେଇଛି ପ୍ରଶାସନ ।
କାଳୀ ମନ୍ଦିର ମାମଲା ବର୍ତ୍ତମାନ କୋର୍ଟରେ ବିଚାରାଧୀନ ରହିଥିବାବେଳେ କୋର୍ଟଙ୍କ ରାୟପରେ ବିଚାର କରାଯିବ ବୋଲି ସ୍ପଷ୍ଟ କରିଛନ୍ତି ଜିଲ୍ଲାପାଳ। ସେହିପରି ବସ୍ ଟର୍ମିନାଲ ପ୍ରକଳ୍ପ କାର୍ଯ୍ୟରେ କୌଣସି ଅସୁବିଧା ନାହିଁ । ସ୍ଥିତିବାନ ସମ୍ପତ୍ତି ଉଚ୍ଛେଦ ହେବ ନାହିଁ, ସେ ବିଷୟରେ ଜିଲ୍ଲାପାଳ ଆଲୋଚନା କରିବେ ବୋଲି କହିଛନ୍ତି । ନିର୍ଦ୍ଧାରିତ କାର୍ଯ୍ୟକ୍ରମ ଅନୁସାରେ ପ୍ରଥମେ ସରକାରୀ ବିଦ୍ୟାଳୟକୁ ଅନ୍ୟତ୍ର ବିଦ୍ୟାଳୟରେ ମିଶ୍ରଣ କରାଯାଇ ତାକୁ ଉଚ୍ଛେଦ କରାଯାଇଛି । ଆଗାମୀ ଦିନରେ ସିଏମସି ଅଧୀନରେ ଥିବା ଅନୁଷ୍ଠାନ ଉଚ୍ଛେଦ କରାଯିବ ।
ଏହାସହ ସରକାରୀ ଜମିକୁ ଜବରଦଖଲ କରି ରହିଥିବା ଲୋକଙ୍କୁ ପ୍ରଥମେ ପ୍ୟାକେଜ ଦିଆଯାଇ ପରେ ଉଚ୍ଛେଦ କରାଯିବ ବୋଲି କହିଛନ୍ତି ସିଏମସି କମିଶନର ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
