କଟକ: ଆଜି ହେଉଛି ଶ୍ରାବଣ ମାସର ପ୍ରଥମ ସୋମବାର । ଏହି ଉପଲକ୍ଷେ ଚଳଚଞ୍ଚଳ ହୋଇଉଠିଛି ପ୍ରସିଦ୍ଧ ଶୈବପୀଠ ଧବଳେଶ୍ବର । ମହାଦେବଙ୍କୁ ଜଳଲାଗି କରିବା ପାଇଁ ହଜାର ହଜାର କାଉଡିଆ ପୀଠରେ ଭିଡ ଜମାଇଛନ୍ତି । ଜଳଲାଗି କରିବା ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି ।
ଆଜି ଭୋରରୁ ଠାକୁରଙ୍କ ନୀତିକାନ୍ତି ସରିବାପରେ ବଡସିଂହାର ବେଶରେ ମହାପ୍ରଭୁଙ୍କୁ ସୁସଜ୍ଜିତ କରାଯାଇଥିଲା । ମନ୍ଦିରର ପହୁଡ ଖୋଲାଯିବା ପରେ କାଉଡିଆମାନେ ମହାପ୍ରଭୁଙ୍କ ନିକଟରେ ଜଳଲାଗି କରିଥିଲେ । ବୋଲବମ ହରହର ବମ ଧ୍ବନି ସମଗ୍ର ପୀଠକୁ ଚଳଚଞ୍ଚଳ କରିଛି ।
ଭିଡିଓ ସୌଜନ୍ୟ: ସମ୍ବାଦଦାତା, କଟକ
ଭକ୍ତଙ୍କୁ ରକ୍ଷା କରିବାକୁ କଳା ବଳଦକୁ ଧଳା କରିଥିବାରୁ ଭୋଳାଶଙ୍କର ଏଠାରେ ଧବଳେଶ୍ବର ନାମରେ ପ୍ରସିଦ୍ଧ । ଶ୍ରାବଣ ସୋମବାରରେ ମହାଦେବଙ୍କୁ ଜଳଲାଗି କଲେ ପାପ କ୍ଷୟ ସହିତ ମାନସିକ ପୂରଣ ହୋଇଥାଏ ବୋଲି ବିଶ୍ବାସ ରହିଛି ।
କଟକରୁ ନାରାୟଣ ସାହୁ, ଇଟିଭି ଭାରତ
